މިއަދަށް ތާވަލް ކުރެވިފައިވާ، ކުރީގެ ރައީސް ޔާމީން އަބްދުލްގައްޔޫމްގެ އާރަށް އިސްތިއުނާފީ މައްސަލައިގެ ޝަރީޢަތުގެ އަޑުއެހުން ކެންސަލް ކޮށްފި އެވެ. 

ހައިކޯޓުން ބުނީ، މިއަދު މެންދުރު ފަހު 2 ޖަހާއިރު ބޭއްވުމަށް ތާވަލު ކުރެވިފައިވާ، ރައީސް ޔާމީންގެ ފަރާތްޕުޅުން އިސްތިއުނާފު ކުރައްވާފައިވާ މައްސަލައިގެ އަޑު އެހުން ކެންސަލް ކޮށްފައިވާ ކަމަށާ، މި އަޑު އެހުން ކެންސަލް ކުރެވިފައިވަނީ ޕްރޮސިކިއުޓަރ ޖެނެރަލް އޮފީހުގެ އެދިވަޑައިގަތުމަށް ކަމަށެވެ. 

ރައީސް ޔާމީނުގެ މައްޗަށް ކުރިމިނަލް ކޯޓުން ކުރި ހުކުމް، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައި ވަނީ މިއަހަރުގެ ފެބުރުއަރީ މަހުގައެވެ. އެހެން ނަމަވެސް ޝަރީޢަތް ތާވަލުނުކުރެވި ގިނަ ދުވަސްތަކެއް ވުމަށްފަހު އެ މައްސަލައިގެ އަޑުއެހުންތައް ފެށީ ޖޫން މަހުގައެވެ. 

Advertisement

ޖޫން މަހުގައި ފެށި އަޑުއެހުންތަކުގެ ތެރެއިން މައްސަލަ ނިންމުމަށް އަޑުއެހުމެއް ނުވަތަ ދެ އަޑުއެހުމަށް ވެފައިވަނިކޮށް މައްސަލަ ބައްލަވާ ފަނޑިޔާރުންގެ ތެރެއިން ފަނޑިޔާރަކު ޗުއްޓީ ނެންގެވުމާއި ގުޅިގެން އަޑުއެހުންތައް އޮތީ މެދުކެނޑިފަ އެވެ. 

އަދި އެ މައްސަލައިގެ އަޑުއެހުންތައް ޖޫން މަހުގައި މެދުކެނޑުނު ގޮތަށް އެއްވެސް އަޑުއެހުމެއް ނުބޭއްވި އޮތުމަށްފަހު، މިއަދަށް އަޑުއެހުން ތާވަލް ކުރެވިފައި ވަނިކޮށް މިއަދުވެ އަޑުއެހުންވެސް ކެންސަލްވުމާއެކު މައްސަލަ އަނެއްކާވެސް އިތުރަށް ދިގުލައިގެންދާނެއެވެ. 

މި މައްސަލައިގައި ރައީސް ޔާމިނުގެ ފަރާތްޕުޅުން ވަނީ ހުރިހާ އިސްތިއުނާފީ ނުކުތާތަކެއް ހުށައަޅާ، ދައުލަތުން ޖަވާބުވެސް ދީފައެވެ. 

ދެން އޮންނާނީ މައްސަލައިގައި ދެ ފަރާތުން ފާހަގަކުރަން ހުރި އިތުރު ކަންކަން ފާހަގަކުރުމަށް ފަހު މައްސަލައިގެ ހުކުމް ހުކުމެވެ.