ވެރިކަމުގައި ކުރިއަށް ދިޔައީ ވާދަވެރިންނަށް ފުރުސަތު ދީގެން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރ.އަތޮޅަށް ކުރައްވަމުން ގެންދަވާ ދަތުރުފުޅުގައި ރ.ފައިނަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައެވެ.

ރައީސް ޞާލިޙް ވިދާޅުވީ ވޭތުވެގެން މިދިޔަ ފަސް އަހަރަކީ ރާއްޖޭގެ ތާރީޚުގައި އެންމެ ގިނަ މަސައްކަތް އެއްފަހަރާ ކުރެވުނު ފަސް އަހަރުގެ ގޮތުގައިކަމަށެވެ. ރައީސް ވިދާޅުވީ ކުރަން ބޭނުންވި ކަންކަން ކުރަން މުޅި ފަސްއަހަރު އެކީ ލިބިވަޑައިނުގެންނެވި ކަމަށާއި، ދައުރުގެ ތެރެއިން ކޮވިޑް އައުމުން ހުރިހާ އެންމެންގެ އަމާޒު ހުއްޓުނީ މީހުންގެ ފުރާނަ ސަލާމަތްކުރުމުގެ މަސައްކަތައް ކަމަށެވެ. އަދި އަމާޒަކީ ދައުރުގެ ކުރިއަށް މިއޮތް ކުޑަ ދުވަސްކޮޅު ނުނިމިހުރި މަސައްކަތްތައް ފުރިހަމަ ކުރެއްވެވުން ކަމަށެވެ.

"މިމަސައްކަތްތަކާއި އެކު ކުރިއަށް ދެވުނީ ސިޔާސީ ހަލަބޮލިކަމުގެ ތެރެއަށް ނުގޮސް އަޅުގަނޑުމެންގެ އަމާޒު އެއްދިމާއަކަށް ހިފެހެއްޓުމުން، ޚިޔާލު ތަފާތުވާ މީހުން އުޅޭނެ، ސިޔާސީ ގޮތުން ވާދަވެރިންވެސް އުޅޭނެ، އެބޭފުޅުންނަށް ފުރުސަތު އޮންނަން ޖެހޭނެ، ޚިޔާލު ފާޅުކުރުމުގެ، އަދި ބަސްބުނުމުގެ ފުރުސަތު އޮންނަންޖެހޭ، އަޅުގަނޑުމެން ކުރިއަށް މިދިޔައީ އަޅުގަނޑުމެންގެ ވާދަވެރިންނަށް އެފުރުސަތު ދީގެން" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ސިޔާސީ ހަލަބޮލި ކަމުގެ ތެރެއަށް ވަދެގެން އުޅުނުނަމަ ކުރވިފައި މިހިރަ ކަންކަން ނުކުރެވުނީސް ކަމަށެވެ. ރައީސް ވިދާޅުވީ ކުރިއަށް އޮތް ތަނުގައިވެސް ޚިޔާލު ތަފާތުވާ ފަރާތްތަތަކަށް ޚިޔާލު ފާޅުކުރުމުގެ ފުރުސަތު ދީގެން ކުރިއަށް ވަޑައިގަންނަވާނެ ކަމަށެވެ.

ރައީސް ވިދާޅުވީ ރަށްރަށަށް ގޮސް އިދިކޮޅު ކެނޑިޑޭޓުން ވާނެ މާގިނަ ވަޢުދެއް ނެތް ކަމަށާއި އަސާސީ ގިނަ ކަންކަން މިހާރުމިދަނީ ފުދި ނިމެމުން ކަމަށެވެ.

ރ. އަތޮޅަށް ރައީސް ޞާލިޙް މިކުރައްވާ ދަތުރު ފުޅުގައި ރައީސް އަރިހުގައި އެމްޑީޕީ ކޯލިޝަންގައި ހިމެނޭ ޕާޓީތަކުގެ އިސް ލީޑަރުންވެސް ބައިވެރިވެއެވެ.