މި ރާއްޖޭގައި އޮތް އެންމެ ބޮޑު ދެ ޕާޓީން ހަޑި ހުތުރު ވަނަންތަކުން މުޚާތަބުކުރަމުންދާ ކަމަށާއި، މިހާރު ގައުމާއި އެ ޕާޓީތަކުގެ ހައްގުގައި ކޮށްދެވުނު އެއްވެސް ކަމެއް ނެތްފަދަ މޭރުމަކުން އަބުރު ކަތިލަމުންދާކަމަށް ކުރީގެ ރައީސް އަދި ޕީޕީއެމްގެ އެޑްވައިޒަރުގެ ގޮތުގައި ހުންނެވުމަށް ފަހު ޖުމްހޫރީ ޕާޓީއާއި ގުޅިވަޑައިގެން ޑރ މުޙައްމަދު ވަހީދު ހަސަން މަނިކު ވިދާޅުވެއްޖެ އެވެ. 

ނ. މަނަދޫގައި އޮތް ޤާސިމް އިބްރާހިމްގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ޑރ ވަހީދު ވަނީ އެމަނިކުފާނުގެ ހަޔާތުގައި ގައުމާއި ރައްޔިތުންގެ ހައްގުގައި ކޮށްދެއްވާފައިވާ މުހިންމު މަސައްކަތްޕުޅުގެ އަގު ވަޒަންކުރުމުގެ ބަދަލުގައި، އެމަނިކުފާނު ކުޑައިމީސްކޮށް ސިޔާސީ ޕާޓީތަކުން ދައްކަވަމުންދާ ވާހަކަތަކާއި ގުޅިގެން އަމިއްލަ ދިފާއުގައި ރައްދުދެއްވާފަ އެވެ. 

އެމަނިކުފާނުގެ ވާހަކަފުޅު ފެއްޓެވީ އެމެރިކާއިން ތައުލީމު ހާސިލުކޮށްގެން އަނބުރާ މާލެއަޑައިގެން ސިޔާސީ މަސައްކަތްޕުޅު ފެއްޓެވި ހިސާބުންނެވެ. ރައްޔިތުންގެ މަޖިލީހުގެ މެމްބަރެއްގެ ގޮތުގައި މަސައްކަތްޕުޅު ކުރައްވަން ފެއްޓެވުމުން އޭރުގެ ސަރުކާރުން ކުރިމަތިކުރުވި ދުއްތުރާތަކުގެ ވާހަކަ ޑރ ވަހީދު ވަނީ އެ ޖަލްސާގައި ވިދާޅުދެއްވާފަ އެވެ. އަދި އެފަހުން ރާއްޖެ ދޫކުރައްވާ ވަޑައިގަންނަވަން ޖެހުނު ސަބަބަށް ވެސް އަލިއަޅުވާލެއްވި އެވެ. 

އެކަން ފާހަގަުރައްވާ ޑރ ވަހީދު ވިދާޅުވީ ދެން އަނބުރާ ރާއްޖެ ވަޑައިގަތީ އެމްޑީޕީ އުފެއްދުމަށް ކަމަށެވެ. އެ މަސައްކަތުގައި ވަރަށް މުހިންމު ދައުރެއް އަދާކުރެއްވި ކަމަށް ޑރ ވަހީދު ވިދާޅުވި އެވެ. އެހެން ނަމަވެސް، އެ ޕާޓީގެ ތެރެއިން ވެސް އެމަނިކުފާނު ބޭރުކޮށްލެއްވި ކަމަށާއި، އެފަހުން އެމްޑީޕީގެ ވެރިކަމުގައި ނަޝީދުގެ އަރިހުގއި މަސައްކަތްޕުޅު ފެއްޓެވީވެސް ގައުމަށް ޚިދުމަތްކުރުމުގެ ހެޔޮ ނިޔަތުގައި ކަމަށް ޑރ ވަހީދު ވިދާޅުވި އެވެ. 

ނަޝީދުގެ ވެރިކަމުގައި ކުރިމަތިވި ކަންތައްތަކުގެ ތެރެއިން، އިސްތިއުފާދެއްވުމުން ވެރިކަމާއި ހަވާލުވެވަޑައިގަތީ ގާނޫނީ ހަމަތަކުގެ ތެރެއިން ކަމަށާއި، އެހެން ނަމަވެސް އޭރުވެސް ރީތި ނަންފުޅެއް ލިބިވަޑައިގެންފައި ނުވާކަމަށް ޑރ ވަހީދު ވިދާޅުވި އެވެ. އަދި އެމަނިކުފާނުގެ ވެރިކަމަށް ޖެއްސުންކުރުމަށް އެމްޑީޕީން އެތައް ކަމެއް ކޮށްފައިވާކަމަށް ޑރ ވަހީދު ވިދާޅުވި އެވެ. 

އެކަންކަން ފާހަގަކުރައްވާ ޑރ ވަހީދު ވިދާޅުވީ ވެރިކަމުގައި ހުންނަވައިގެން އެމަނިކުފާނު އެ ހައްސާސް ވަގުތުގައި އަމަލުކުރެއްވީ ގައުމާއި ރައްޔިތުންނަށް އެންމެ ފައިދާ ބޮޑު ގޮތަށް ކަމަށެވެ. އެގޮތުން ރައްޔިތުން އެދުނު ގޮތަށް އިންޑިއާގެ ޖީއެމްއާރު ކުންފުނީގެ އަތުން ދިވެހިންގެ އެއާޕޯޓު އަނބުރާ ހޯދައިދީ، އިންޑިއާއަށް ދައްކަން ޖެހުނު ފައިސާ ދެއްކުމުގެ ކަންކަން ހަމަޖައްސައިދެއްވި ކަމަށާއި، އެއީ ގައުމީ މަސްލަހަތު އިސްކުރައްވާ ކޮށްދެއްވި ކަމެއްކަން ޑރ ވަހީދު ފާހަގަުރެއްވި އެވެ. 

ރައީސް ޔާމިނުގެ ވެރިކަމުގައި އަޅުއްވާދެއްވި ބޮޑެތި ބިނާތަކުގެ މަޝްވަރާ ފެށިގެން އައީވެސް ޑރ ވަހީދާއި ހަމައިންކަން އެމަނިކުފާނުގެ ވާހަކަފުޅުގައި ފާހަގަކުރެއްވި އެވެ. އެގޮތުން ރައީސް ޔާމިނުގެ އެންމެ ބޮޑު ކާމިޔާބީކަމަށް ވާ ސިނަމާލެ ބްރިޖު އެޅުމުގެ މަޝްވަރާ ޗައިނާއާއެކު އެންމެ ފުރަތަމަ ކުރެއްވީ ޑރ ވަހީދުކަމަށް އެމަނިކުފާނު ވިދާޅުވި އެވެ. އަދިވެސް އެ ވެރިކަމުގައި ކުރެވުނު ތަރައްގީގެ ބައެއް މަސައްކަތްތަކުގެ މަޝްވަރާ ފެއްޓުނީ ރައީސް ވަހީދުގެ ވެރިކަމާއި ހަމައިންކަން ފާހަގަކުރެއްވި އެވެ. 

އެހުރިހާ ކަންކަން ފާހަގަކުރައްވާ ޑރ ވަހީދު ވިދާޅުވީ، އެމަނިކުފާނުގެ ހަޔާތުގައި ގައުމާއި ރައްޔިތުންނަށްޓަކައި އެތައް ޚިދުމަތްތަކެއް ފޯރުކޮށްދެއްވި ނަމަވެސް މިއަދު އެމަނިކުފާނު ކޮށްދެއްވި އެއްވެސް ކަމެއް ނެތްފަދަ ގޮތަކަށް ވާހަކަދައްކަވަމުން ގެންދަވާ ކަމަށެވެ.

މިއަދު އެމަނިކުފާނަކީ އެއްބަޔަކަށް "ކަޅު ކާޅަކަށް"، އަނެއް ބަޔަކަށް "ބާޒަކަށް" ވެފައިވާތީ، އަދި އެފަދައިން މުޚާތަބު ކުރަމުންދާތީ ރައްޔިތުންނަށް އެމަނިކުފާނުގެ ވާހަކަ ގަބޫލުކުރަން ދަތިފުޅުވެސް ވެދާނެ ކަމަށެވެ. 

ޑރ ވަހީދު ވިދާޅުވީ ތަފާތު ވަނަންތަކުން ގޮވި ނަމަވެސް، އަދި ކޮށްދިން ޚިދުމަތެއް ނެތްކަމަށް ބުނި ނަމަވެސް މިއަދުވެސް ސިޔާސީ މަސައްކަތްޕުޅަށް ނިކުމެ ހުންނަވާ މި ރިޔާސީ އިންތިޚާބުގައި ޤާސިމް އިބްރާހިމަށް ތާއީދުކުރައްވަން ނިންމެވީ ފަހަރެއްގައިވެސް އިތުރު ގޮތެއް ނެތިގެން ނޫންކަމަށެވެ.

އެމަނިކުފާނަށް ރާއްޖެއިން ބޭރުގައިވެސް އާއިލާއާއެކު އުފާވެރިކަމާއެކު އުޅެވޭނެ ގޮތްތައް އެބަހުރި ކަމަށާއި، އެހެން ނަމަވެސް ރާއްޖޭގެ ރައްޔިތުން އުޅެން އޮތް ތަނަކީ ދިވެހިރާއްޖެ ކަމަށްވެފައި ގައުމުގެ ހާލަތު މިއަދު އޮތީ ވަރަށް ނާޒުކު ފައްތަރެއްގައި ކަމަށް ވާތީ، މިއަދުވެސް އިޚްލާސްތެރިކަމާއި އެކު ކުރައްވަމުން ގެންދަަވާ މަސައްކަތްޕުޅަކީ ގައުމާއި ރައްޔިތުންގެ ހައްގުގައި ކުރައްވާ މަސައްކަތްޕުޅު ކަމަށް ޑރ ވަހީދު ވިދާޅުވި އެވެ.

އަދި އެ މަސައްކަތްޕުޅު ކުރައްވާއިރު، މީހުންގެ ފަރާތުން ކުރިމަތިވާ ފުރައްސާރައަށް މީގެކުރިން ވެސް ބައްލަވާފައި ނުވާނެކަމަށާއި، ކުރިއަށް ވެސް އެކަންކަމަށް ފަރުވާލެއް ނުބަހައްޓަވާނެކަމަށް ޑރ ވަހީދު ވިދާޅުވި އެވެ.