ވަޑިންނަށް ދިމާވެފައިވާ މާލީ ދަތިކަމަށް ހައްލެއް ހޯއްދަވައިދިނުމުގެ ގޮތުން އަންނަ ދައުރުގައި އެފަރާތްތަކަށް ފަސޭހައިން ލޯން  ލިބޭނެ ނިޒާމެއް ތަޢާރަފް ކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ.

ރިޔާސީ ކެންޕެއިނަށް ރ އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު އިންނަމާދޫއަށް ވަޑައިގެން ވާހަކަ ދައްކަވަމުން ރައީސް ޞާލިހް ވިދާޅުވީ، އިންނަމާދޫ އަކީ ރާއްޖޭގެ އިގްތިސާދު ކުރިއެރުވުމަށް މުހިންމު ދައުރެއް އަދާކުރާ ރަށެއް ކަމަށެވެ. އަދި އެއީ ރާއްޖޭގެ ވަޑިން އެންމެ ގިނަ، ހުނަރުވެރި މަސައްކަތްތެރިން ގިނަ ރަށެއްކަންވެސް އެމަނިކުފާނު ފާހަގަކުރެއްވިއެވެ. 

އެހެންނަމަވެސް، ވަޑިންނަށް އެކި ދަތިތައް ހުރިކަމަށާ އެގޮތުން އިންވެސްޓެއް ފެށުމަށް ފައިސާ ހޯދަން ދަތިވުމާއި މަސައްކަތް ކުރާނެ ޖާގަ ނެތް ކަމަށް ރައީސް ޞާލިހު ވިދާޅުވި އެވެ.

މީގެ އިތުރުން ސަރުކާރުގެ އެކިއެކި ސްކީމް ތަކުގައި ބައިވެރިވެގެން މަސައްކަތްތެރިންނަށް މާލީ އެހީތެރިކަން ލިބޭނެ ސިޔާސަތުތައް ކުރިއަށް އޮތް ދައުރުގައި ބައްޓަންކޮށްދެއްވާނެ ކަމަށްވެސް ރައީސް ޞާލިހު ވަޢުދުވެވަޑައިގެންނެވިއެވެ. 

މިއާއެކު ފައިބަރު މަސައްކަތް ކުރަން އެރަށް ކައިރީ އޮންނަ ފަޅުރަށް، ވަންދޫ އިން ބިން ދޫކުރަން ވަޑިން އެދެމުންދާ ކަން ފާހަގަކުރައްވައި ރައީސް ވިދާޅުވީ އެކަންވެސް ލަސްތަކެއް ނުވެ ކޮށްދެއްވާނެ ކަަމަށެވެ. އަދި އެރަށުން ބިން ދޫނުކުރެވި އޮތީ އީއައިއޭ ހެދުން ފަދަ ކަންކަން ނުނިމި ހުރުމުން ކަމަށްވެސް ވިދާޅުވި އެވެ.