ދިވެހި ރާއްޖެއަށް އިގުތިސާދީ ބޮޑު ބަދަލެއް ގެނައުމަށް ދިވެހި އެގްޒިމް ބޭންކަކާއި އިންވެސްޓްމަންޓް ފަންޑެއް ގާއިމް ކުރުން ހިމެނޭހެން، ގިނަ ވައުދުތަކެއް، އެމްޑީޕީން ދެވަނަ ދައުރަކަށް ހުށަހަޅާ މެނިފެސްޓޯގައި ހިމަނައިފި އެވެ.

މާލޭ ސޯޝަލް ސެންޓަރުގައި ރޭ ބޭއްވި އެމްޑީޕީގެ 'ޒަމާނަކުން އައި ޒަމާނެކޭ' ކެމްޕޭން ހަރަކާތުގެ ތެރެއިން އެމްޑީޕީީ މެނިފެސްޓޯގެ އެންމެ ފަހު ސިޔާސަތު "އިގުތިސާދީ ބޮޑު ބަދަލު" ވަނީ އިއުލާންކޮށްފައެވެ. 

"އިގުތިސާދީ ބޮޑު ބަދަލު" ސިޔާސަތު ބަހާލާފައި ވަނީ ހަތަރު ބަޔަކަށެވެ. އެއީ؛

1. ބާރުވެރި އިގުތިސާދު

2. އިގުތިސާދީ ހަރަކާތްތަކުގައި އެންމެ ބައިވެރިވުން

3. އެކާވީސްވަނަ ގަރުނަށް މާލީ ދާއިރާ

4. ވިލުންތެރި އިގުތިސާދު

މީގެ ފުރަތަަމަ ބައި ކަމުގައިވާ ބާރުވެރި އިގްތިސާދުގައި، ދިވެހި ކުންފުނިތަކަށް ބޭރުގެ މަޝްރޫއުތަކުގައި ބައިވެރިވުމުގެ ފުރުސަތު ފަހިކޮށްދީ، އެކަމަށް ބޭނުންވާ ފައިނޭންސް ފޯރުކޮށްދިނުމުގެ އަމާޒުގައި، ދިވެހި އެގްޒިމް ބޭންކެއް ގާއިމްކުރުމަށް ވަނީ ހިމަނާފައެވެ.

ރައީސް ސޯލިހްގެ މެނިފެސްޓޯގައި ހިމެނޭ "އިގްތިސާދީ ބޮޑު ބަދަލު" ސިޔާސަތު އިފްތިތާހު ކުރުން-- ފޮޓޯ/ އެމްޑީޕި

ހަމަ އެއާއެކު ސަރުކާރު ހިއްސާވާ ކުންފުނިތަކުގެ ފައިދާ އިތުރު ކުރުމަށާއި ހިންގުން ހަރުދަނާކޮށް، އާ އިންވެސްޓްމަންޓްތަކަށް ބޭރުގެ ކެޕިޓަލް ރާއްޖެއަށް ހޯދުމަށް ކުރާނެ ކަންކަން ވެސް މެނިފެސްޓޯ ގެ އެބައިގައި ވަނީ ހިމަނާފައެވެ. 

އެގޮތުން ސަރުކާރު ބައެއް ކުންފުނިތަކުގެ ހިއްސާތަކާއި ރާއްޖޭގެ އެހެނިހެން ސްޓްރެޓީޖިކް އެސެޓްތައް، ދެމެހެއްޓެނިވި ގޮތެއްގައި އޭގެން މަންފާ ކުރާނެ ގޮތަށް ނެޝަނަލް އިންވެސްޓްމަންޓް ފަންޑެއް ގާއިމްކޮށް، ރާއްޖެ އާއި ރާއްޖެއިން ބޭރުގައި އިންވެސްޓުކުރުން ހިމެނެއެވެ. 

ރައީސް ސޯލިހްގެ މެނިފެސްޓޯގައި ހިމެނޭ "އިގްތިސާދީ ބޮޑު ބަދަލު" ސިޔާސަތު އިފްތިތާހު ކުރުން-- ފޮޓޯ/ އެމްޑީޕި

މީގެ އިތުރުން މިބައިގައި ހިމެނޭ ކަންކަމުގެ ތެރޭގައި، ދިވެހިރާއްޖޭގެ އައިސީޓީ ދާއިރާގެ ހުނަރުވެރިންނާއި އެހެނިހެން އުފެއްދުންތެރިން ރާއްޖޭގައި ތިބެގެން އެމީހުންގެ އުފެއްދުންތެރިކަން ބޭރުގެ ބާޒާރަށް ނެރެ މާކެޓްކޮށް ކުރިއެރުވޭނެ ވަސީލަތްތަކާއި ނެޓްވޯކް ގާއިމުކުރުން ހިމެނެއެވެ. 

އަދި ސަރަހައްދީ އަދި ބައިނަލްއަގުވާމީ ވިޔަފާރީގެ ޖަމިއްޔާތަކުގައި ބައިވެރިވެ ދިވެހި ވިޔަފާރިތަކަށް ބޭރުގެ މާކެޓްތަކަށް ވަނުމުގެ ފުރުސަތު ފަހިކޮށްދީ ވިޔަފާރިތައް ރާއްޖެއިން ބޭރުގައި ފުޅާކުރުމަށް ބޭނުންވާ މާލީ އަދި ފަންނީ އެހީތެރިކަން ފޯރުކޮށް ދިނުންވެސް މެނިފެސްޓޯ ގެ މިބައިގައި ވަނީ ހިމަނާފައެވެ.