އިގްތިސާދީގޮތުން ގުޅިފައިވާ ގައުމުތަކާއި އެ ގައުމެއްގެ ފައިސާއިން ވިޔަފާރި މުއާމަލާތް ކުރުން ހިމަނައި, އެމްޑީޕީން ދެވަނަ ދައުރަކަށް ހުށަހަޅާ މެނިފެސްޓޯގެ ފަހުބައި އިއުލާންކޮށްފި އެވެ.

މާލޭ ސޯޝަލް ސެންޓަރުގައި ރޭ ބޭއްވި އެމްޑީޕީގެ 'ޒަމާނަކުން އައި ޒަމާނެކޭ' ކެމްޕޭން ހަރަކާތުގެ ތެރެއިން އެމްޑީޕީީ މެނިފެސްޓޯގެ އެންމެ ފަހު ސިޔާސަތު "އިގުތިސާދީ ބޮޑު ބަދަލު" ވަނީ އިއުލާންކޮށްފައެވެ. 

"އިގުތިސާދީ ބޮޑު ބަދަލު" ސިޔާސަތު ބަހާލާފައި ވަނީ ހަތަރު ބަޔަކަށެވެ. އެއީ؛

1. ބާރުވެރި އިގުތިސާދު

2. އިގުތިސާދީ ހަރަކާތްތަކުގައި އެންމެ ބައިވެރިވުން

3. އެކާވީސްވަނަ ގަރުނަށް މާލީ ދާއިރާ

4. ވިލުންތެރި އިގުތިސާދު

އޭގެތެރެއިން އެކާވީސްވަނަ ގަރުނަށް މާލީ ދާއިރާގެ ދަށުން ހިމަނާފައިވާ ކަންކަމުގެ ތެރެއިން، ފަހި މާލީ ސިޔާސަތާއި ފައިނޭންޝަލް ސެކްޓަރ ރިފޯމްކުރުމަށް، ބޭރު ފައިސާ ހޯދުމަށް އޮތް ތަކުލީފުތަކަށް ލުޔެއް ހޯދައިދިނުމުގެ ގޮތުން ފަތުރުވެރިކަމުގެ ދާއިރާއިން ރާއްޖެއަށް ވަންނަ ބޭރު ފައިސާ ރާއްޖެއިން ބޭރަށް ލީކުވާ މިންވަރު މަދުކުރުން ވަނީ ހިމަނާފައެވެ. 

އަދި ރާއްޖޭގެ އިގުތިސާދު ޑީޑޮލަރައިޒްކޮށް، ވިޔަފާރީގެގޮތުން ގުޅިފައިވާ ގައުމުތަކާ އެކީ ކުރާ ވިޔަފާރީގެ މުއާމަލާތްތައް އެގައުމެއްގެ ފައިސާއިން ކުރާގޮތަށް ހަމަޖެއްސުމަށް ވެސް ވަނީ ހިމަނާފައެވެ. 

ރައީސް ސޯލިހްގެ މެނިފެސްޓޯގައި ހިމެނޭ "އިގްތިސާދީ ބޮޑު ބަދަލު" ސިޔާސަތު އިފްތިތާހު ކުރުން-- ފޮޓޯ/ އެމްޑީޕި

މީގެ އިތުރުން މި ބައިގައި ހިމެނޭ ކަންކަމަކީ؛ 

• ދައުލަތުން ދޭ ސަބްސިޑީތައް އެފިޝަންޓްކޮށް، ހައްގުވެރި ފަރާތްތަކަށް ދެވޭ އެހީއެއްކަން ކަށަވަރުކުރެވޭގޮތަށް ސަބްސިޑީގެ ނިޒާމު ބަދަލުކުރުން

• އާސަންދައިގެ ނިޒާމުގެ ތެރެއިން ފޯރުކޮށްދެވޭ އެހީ ދެމެހެއްޓެނިވި ގޮތުގައި ކުރިއަށްގެންދެވޭ، އަދި އެކަށީގެންވާ މިންވަރުގައި ފޯރުކޮށްދެވޭކަން ކަށަވަރުކުރަން 2024 ވަނަ އަހަރު އާސަންދަ ނިޒާމުގެ ކަވަރޭޖް ބަދަލުކުރުން. އަދި ހިދުމަތްތައް ފުޅާކޮށް މޯލްޑިވިއަން އެއާރލައިނާ ގުޅިގެން މެޑިކަލް އިވެކުވޭޝަން ހިދުމަތް ފޯރޮކޮށްދިނުމަށް ޚާއްސަ އެއަރ އެމްބިއުލާންސް ތައާރަފް ކުރުން. 

• ދުނިޔޭގެ މާކެޓްތަކަށް އަންނަ ޝޮކްތަކުގެ ސަބަބުން ދިމާވާ އިގުތިސާދީ ހީނަރުކަމުން ފަރުދުންނާއި ވިޔަފާރިތައް ރައްކާތެރިކުރުމަށްޓަކައި މާލީ އަދި އިގުތިސާދީ ސިޔާސަތުތަކަށް ބަދަލުގެނެސް ސޭފްޓީ ނެޓެއް ޤާއިމުކުރުން

• ދެމެހެއްޓެނިވި ފިސްކަލް ސްޓްރެޓެޖީއެއްގެ ދަށުން ދައުލަތުގެ އާމްދަނީ އިތުރުކޮށް ޚަރަދުކުޑަކުރުމުގެ ސިޔާސަތުތައް ތަންފީޒުކޮށް މެދުރާސްތާގައި ބަޖެޓް ޑެފިސިޓް ބޮޑުތަނުން ކުޑަކޮށް ޖީޑީޕީގެ ނިސްބަތުން ދަރަނީގެ މިންވަރު ކުޑަކުރުން. ބަޖެޓް ޑެފިސިޓް ކުޑަކޮށް ދައުރު ނިމެންވާއިރަށް ޖީޑީޕީގެ ނިސްބަތުން ދަރަނީގެ މިންވަރު 80% އަށް ކުޑަކުރުން. 

• ދެމެހެއްޓެނިވި ގޮތެއްގައި ދައުލަތުގެ ޚަރަދުތައް ހިފަހައްޓާ އެކްސްޗޭންގ ރޭޓް ޕްރެޝަރ ކުޑަކުރުމުގެ ގޮތުން، ރިނުވަބަލް އެނަރޖީ، ޑިޖިޓަލް އިންފްރާސްޓްރަކްޗަރ، ސްޕެޝަލައިޒް ހެލްތްކެއަރ، އަދި އެގްރިކަލްޗަރ ފަދަ ދާއިރާތަކަށް އިންވެސްޓްކުރުން

• ދައުލަތުގެ ދަރަނީގެ ސްޓޮކްގެ ރިސްކް ކުޑަކުރުމުގެ ގޮތުން އެވްރެޖް މެޗުރިޓީ މިހާރަށް ވުރެ އިތުރުކޮށް، ހެޔޮ އަގުގައި ދައުލަތުގެ ދަރަނި ފައިނޭންސްކުރުން

• މާލީ ދާއިރާގެ ވާދަވެރިކަން އިތުރުކުރުމަށް ގާނޫނީ އޮނިގަނޑަށް ގެންނަންޖެހޭ ބަދަލުތައް ގެނައުން