ރިޔާސީ އިންތިހާބުގެ ކެމްޕެއިނަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް އުފަން އަތޮޅަށް ކުރައްވަމުން ގެންދަވާ ދަތުރުފުޅުގައި އެމަނިކުފާނު އުފަން ރަށް އދ. ދިއްދޫއަށް ވަޑައިގެންފިއެވެ.

އއ ދިއްދުއަކީ ގާސިމް އިބްރާހިމް މަންމާފުޅުގެ ރަށެވެ. އެމަނިކުފާނު އުފަންވެވަޑައިގެންނެވީ އެ ރަށުގައެވެ. އަދި މަންމާފުޅު އަވަހާރަވުމާ ޖެހެންދެންވެސް ގެންގުޅުއްވީ އެރަށުގައެވެ.

ދިއްދުއަށް ވަޑައިގަތުމަށްފަހު ގާސިމް އިބްރާހިމް އެންމެ ފުރަތަމަ ޒިޔާރަތްކުރެއްވީ އެމަނިކުފާނުގެ މަންމާފުޅު ފަސްދާނުލެވިފައިވާ ތަނަށެވެ. މަންމާފުޅުގެ މަހާނައަށް ޒިޔާރަތްކުރައްވާ މަންމާފުޅަށް ހެޔޮ ދުއާކުރެއްވިއެވެ.

Advertisement

ގާސިމް މަންމާފުޅު ފަސްދާނުލެވިފައިވާ ތަނަށް ޒިޔާރަތްކުރައްވަނީ-- ފޮޓޯ/ ޖޭޕީ

މަންމާފުޅުގެ މަހާނަ ކައިރިއަށް ޒިޔާރަތް ކުރެއްވުމަށްފަހު، ދިއްދޫ ރައްޔިތުންގެ އަރިހަށް ވަޑައިގެން، އެރަށު ރައްޔިތުންނާ މުހާތަބްކުރައްވާ ވާހަކަދައްކަވަމުން ގާސިމް ވަނީ އުފަންވި ރަށަށް އަދި މަންމާފުޅުގެ ރަށަށް އައުމުން އުފާވެރި އިޚުސާސްތަކެއް ކުރެވޭ ކަން ފާހަގަކުރައްވާފައެވެ.

އަދި ތުއްތު އިރާއި ގުޅިގެން ހަނދުމަ ހުންނެވި ވާހަކަތައް ހިއްސާ ކުރައްވަމުން ގާސިމް ވިދާޅުވީ އެމަނިކުފާނު އުފަންވެ މަންމާފުޅު ނިޔާވުމާއި ހަމައަށް ދިއްދޫގައި ދިރިއުޅުއްވި ކަމަށެވެ. އަދި މަންމާފުޅު ނިޔާވުމުން މާމާފުޅު އައިސް އެމަނިކުފާނު މާމިގިއްޔަށް ގެންދެވީ ކަމަށް ވިދާޅުވި އެވެ. 

ގާސިމް ވިދާއަޅުވީ ކުޑައިރުގެ އެދުވަސްވަރުގެ ވާހަކަ ތައް އެމަނިކުފާނުގެ މާމާފުޅުގެ ފަރާތުންނާއި އެހެންގާތްތިމާގެ ބޭފުޅުންގެ ފަރާތުން އަޑުއިވިލެއްވުމުން އެދަތި ނިކަމެތި ދިރިއުޅުއްވުމުގެ އަސަރާއިއެކު އެމަނިކުފާނަށް ވަރަށް ފުން އަސަރުތަކަކާއި އިހުސާސްތަކެއް ކުރުވާ ކަމަށެވެ.

ގާސިމް މަންމާފުޅު ފަސްދާނުލެވިފައިވާ ތަނަށް ޒިޔާރަތްކުރައްވަނީ-- ފޮޓޯ/ ޖޭޕީ

ގާސިމް ވިދާޅުވީ ދިއްދޫގައި އެމަނިކުފާނާއި އާއިލީގޮތުން ގުޅުން ނޯންނަ މީހެއް މަދުވާނެ ކަމަށެވެ. އެހެންކަމުން އެމަނިކުފާނަށް އެރަށުން ފުރިހަމަ ތާއީދު ލިބޭނެ ކަމަށް ގަބޫލުކުރައްވާ ކަން ފާހަގަކުރައްވައި ގާސިމް ވިދާޅުވީ އެމަނިކުފާނަށް ވޯޓުދޭންވީ އެނޫންވެސް ގިނަ ސަބަބުތައް ހުރިކަމަށެވެ. 

އެގޮތުން ގާސިމް ވިދާޅުވުމަކީ މިނިވަންކަމާއި ޤައުމުގެ އިސްތިގްލާލް ހިމާޔަތްކުރުމަކީ ހުރިހާ ރައްޔިތުންގެ ކޮނޑުގައި އެޅިފައިވާ ޒިންމާއެއްކަމަށެވެ. ގާސިމް ވިދާޅުވީ އިންޑިއާ އާއި ގާތްގުޅުން ކެނޑިގެން ދާން އެއްވެސް ރައްޔިތަކު ބޭނުމެއް ނުވާނެކަމަށާއި ނަމަވެސް އިންޑިއާގެ އަޅުވެތިކަމަށް ދިއުމަކީ އެއަށްވުރެ ނުރައްކާތެރި ނިކަމެތި ހާލަތެއްކަމަށްވުމާއެކު އެހާލަތަށް ގައުމު ގެންދިޔައީ ގައުމުގެ ވެރިންގެ ގައްދާރުވުމާއެކު ކަމަށެވެ.

އެހެންކަމުން މިހާލަތުން އަރާގަތުމުން ހުރިހާ ރައްޔިތުން އެކީ މަސައްކަތް ކުރަންޖެހޭ ކަމަށް ގާސިމް ވިދާޅުވި އެވެ.