ނަން ނުވިޔަސް ރައްޔިތުންނަށް ފަހި ދިރިއުޅުމެއް ހޯދައިދިނުމަށް އެންމެ ބޮޑު ގުރުބާނީއެއް ވީ ބޭފުޅަކީ އެމަނިކުފާނު ކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ.
ޤާސިމް އިބްރާހިމް އެފަދައިން ވިދާޅުވެފައި ވަނީ އއ އަތޮޅަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގައި، ބޮޑުފުޅުދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.
ޤާސިމްގެ ވާހަކައިގައި ވަނީ ރާއްޖޭގައި މީގެ އަހަރުތަކެއް ކުރިން ރައްޔިތުން އަސާސީ ޚިދުމަތްތައް ނުލިބިގެން އުޅެމުންދިޔަ ދަތި ހާލަށް އަލިއަޅުވާލައްވާފަ އެވެ.
އެގޮތުން ސިއްހީ ޚިދުމަތުގެ ފެންވަރު އޭރު ދަށްވުމާއި، އެކަށީގެންވާ ފަރުވާތައް ލިބެން ނެތުމުގެ ސަބަބުން މާބަނޑު އަންހެނުންނާއި ކުޑަކުދިން ދުނިޔެ ދޫކޮށްފައިވާކަން ގާސިމް ފާހަގަކުރެއްވި އެވެ. އަދި ބޮޑެތި ބަލަތަކަށް ފަރުވާ ހޯދޭނެ ގޮތެއް ނެތުމުގެ ސަބަބުން ވެސް އެތައް ބަޔަކު ނިޔާވެގެން ދިޔަކަން ފާހަގަކުރެއްވި އެވެ.
"މާބަނޑު އަންހެނުން އެނދަށް އަރާ ނުވިހިގެން މައިމީހާއާއި ދަރިފުޅާއި މަރުވެގެން އެބަދޭ. ތުއްތު ކިތައް ކުދިން ތޯ މަރުވެގެން ދިޔައީ؟ ކޮންމެ މީހަކަށް ބައްޔެއް ޖެހުނީމާ، ކޮންމެ ކަހަލަ ބައްޔެއް ނަމަވެސް.. ވާނުވާއެއް ނޭނގޭ. މަރުވެގެންދާތަން ފެންނަނީ"
ޖޭޕީގެ ރިޔާސީ ކެންޑިޑޭޓު ޤާސިމް އިބްރާހިމް
އެކަން ފާހަގަކުރައްވާ ޤާސިމް ވިދާޅުވީ މިހާރު އެކަންކަން މާޒީވެ ހިނގައްޖެ ކަމަށެވެ. މިއަދު ދިވެހިންގެ ހާލަތު އެތައް ތަނެއް ކުރިއަރާ ގޮސްފައިވާއިރު، ރައްޔިތުންގެ ދިރިއުޅުމުގެ ފެންވަރު ރަނގަޅުކޮށް ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނީ ސަރުކާރުތަކުން ނޫން ކަމަށާއި، އެ ކަމަށްޓަކައި އެންމެ ބޮޑު ރިސްކެއް ނަންގަވައިގެން މަސައްކަތްޕުޅު ކުރެއްވި ބޭފުޅަކީ އެމަނިކުފާނުކަމަށް ޤާސިމް ވިދާޅުވި އެވެ.
"ކީއްވެގެންތޯ އެކަން އެ ވަނީ؟ އެވަނީ އަޅުގަނޑުމެން ކުރި މަސައްކަތް މިއަދު ވެރިކަމުގައި ތިބި މީހުންނެއް ނޫނޭ އެ މަސައްކަތް ކުރީ އެންމެ ބޮޑު ރިސްކު ނަގައިގެން. އަޅުގަނޑުމެން އެކަން ކުރީ.. މިއިންނެވި ޑރ ވަހީދާއި އަޅުގަނޑާއި ރައީސް ނަޝީދުވެސް އޭގެ ތެރޭގައި ހިމެނިވަޑައިގަންނަވާ. އެކަމަކު އެންމެ ބޮޑު ރިސްކެއް ނަގައިގެން އެންމެ ބޮޑު އަނިޔާލިބިގެން އެންމެ ބޮޑަށް އިސްކޮށް ހުރެގެން އެކަން ކުރި މީހަކީ އަޅުގަނޑު. ނަން ނުއްވަކަސް ކަންކުރި މީހަކީ އަޅުގަނޑު"
ޖޭޕީގެ ރިޔާސީ ކެންޑިޑޭޓު ޤާސިމް އިބްރާހިމް
އެ ވާހަކައާއި ގުޅުވާ ޤާސިމް ވިދާޅުވީ ރިޔާސީ އިންތިޚާބުގައި ވޯޓުދެއްވާއިރު ރައްޔިތުން އެކަންކަމަށް ވަރަށް ފުންކޮށް ވިސްނާ ވަޑައިގަތުމަށް އެދިވަޑައިގަންނަވާ ކަމަށެވެ.
Advertisement
This content is created and paid for by advertisers and does not involve Voice Journalists
