ދައުލަތުގެ މީޑިއާ، ޕީއެސްއެމް އިން އިންތިޒާމު ކޮށްގެން ބާއްވާ ރިޔާސީ ކެނޑިޑޭޓުންގެ "ރިޔާސީ ބަހުސް" ކެންސަލް ކޮށްފިއެވެ.

ރިޔާސީ ބަހުސް ބޭއްވުމަށް ޕީއެސްއެމް އިން ކަނޑައެޅި ތާރީހަކީ އަންނަ ހުކުރު ދުވަހުގެ ރޭ 21:00 އިން 23:00 އަށެވެ.

އެހެންނަމަވެސް އެކަން ކެންސަލް ކުރިކަން އަންގައި ޕީއެސްއެމްއިން ނެރުނު ބަޔާނެއްގައި ބުނީ، އިންތިހާބަށް ކުރިމަތިލައްވާފައިވާ ހުރިހާ ކެންޑިޑޭޓުންނަށް ބައިވެރިވެވޭ ގޮތަށް މި ބަހުސް ބޭއްވުމަކީ ޕީއެސްއެމްގެ އަމާޒެއް ކަމަށެވެ.

ނަމަވެސް، ރިޔާސީ އިންތިހާބާއި ގުޅިގެން ކެންޑިޑޭޓުން ބައިވެރިވެވަޑައިގަންނަވާ ތަފާތު ކެމްޕެއިން ހަރަކާތްތައް ރާއްޖޭގެ އެކި ކަންކޮޅުތަކުގައި ހިނގަމުންދާތީ އެ ދުވަހުގައި ބާއްވަން ތައްޔާރުވަމުންދިޔަ ޕީއެސްއެމްގެ ބަހުސްގައި ބައެއް ކެންޑިޑޭޓުންނަށް ބައިވެރިވެވެން ނެތުމުންނާއި، އިންތިހާބަށް ވަގުތު ކުޑަތަންވެފައި ވުމުން ޕީއެސްއެމްގެ ބަހުސް ފަހުގެ ތާރީހަކަށް ބަދަލުކުރުމަކީ ކެންޑިޑޭޓުންނަށް ކެމްޕެއިން ކުރުމަށް ދަތިތަކެއް ކުރިމަތިވާނެކަމެއް ކަމަށް ޕީއެސްއެމުން ދެކޭ ކަމަށް އެ ބަޔާނުގައި ވެއެވެ.

އެހެންކަމުން ޕީއެސްއެމްގެ ބަހުސް ފަހުގެ ތާރީހަކަށް ބަދަލު ކުރުމަކީ އެންމެ ރަނގަޅު ގޮތް ނޫންކަމަށް ފެންނާތީ، އެ މީޑިއާއިން ގަސްތުކުރަނީ މިހާރު ވެސް ބަހުސެއް ރާވާފައިވާ ފަރާތަކާއި ގުޅިގެން ބަހުސް ކުރިއަށް ގެންދިއުމަށް ކަމަށްވެސް ޕީއެސްއެމްގެ ބަޔާނުގައި ވެއެވެ.

އެގޮތުން ސަންގު ޓިވީން ބައްވާ ބަހުސްގައި ޕީއެސްއެމުން ޕާޓްނަރ ވެގެން ކުރިއަށް ގެންދިއުމުގެ އިންތިޒާމުތައް ވަމުންދާކަމަށް ބެސް ހާމަކޮށްފައި ވެއެވެ. 

ޕީއެސްއެމް އިން މިފަދައިން ނިންމާފައިވާއިރު، އެ ބަހުސް ފަސް ކޮށްދިނުމަށް އެދިފައިވާ ކަމަށް އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ޞާލިހު ގެ ތަރުޖަމާނު މާރިޔާ ވަނީ ވިދާޅުވެފަ އެވެ. އެގޮތުން، އެ ރޭ އެމްޑީޕީގެ “އުފާވެރި މާލެ“ ގެ ނަމުގައި އިވެންޓެއް ބާއްވާތީ، އެ ޕާޓީން ބަހުސް ފަސް ކޮށްދިނުމަށް އެދިފައިވާނެ ކަމަށް އޭނާ ވިދާޅުވި އެވެ. 

ދަޢުލަތުގެ މީޑިއާ(ޕީއެސްއެމް) އާއި ޤައުމީ ޔުނިވަރސިޓީ (އެމްއެންޔޫ)އިން ބާއްވަން ނިންމި މި ބަހުސްގައި ހުރިހާ ކެންޑިޑޭޓުންވެސް ބައިވެރިވާން ވަނީ އާބަސް ދީފައެވެ.