ދަޢުލަތުގެ މީޑިއާ(ޕީއެސްއެމް) އާއި ޤައުމީ ޔުނިވަރސިޓީ (އެމްއެންޔޫ)އިން ގުޅިގެން ކޮންމެ ރިޔާސީ ދައުރަކާއި ދިމާކޮށް ކެންޑިޑޭޓުންގެ މެދުގައި ބާއްވަމުން އަންނަ ރިޔާސީ ބަހުސްގައި އެންމެ ކެންޑިޑޭޓެއް ބައިވެރިވެވަޑައިގެންނެވި ނަމަވެސް، އެ ބަހުސް ބޭއްްވުމަކީ ޕީއެސްއެމް ގެ ޒިންމާއެއް ކަމަށް، ރިޔާސީ އިންތިހާބުގައި އަމިއްލަގޮތުން ބައިވެރިވަޑައިގަންނަވާ، ފާރިސް މައުމޫން ވިދާޅުވެއްޖެއެވެ. 

އަންނަ ހުކުރު ދުވަހުގެ ރޭ 21:00 އިން 23:00 އަށް ބޭއްވުމަށް ނިންމާފައިވާކަން އިއުލާން ކުރެވުނު ޕީއެސްއެމް ގެ ރިޔާސީ ބަހުސް ކެންސަލް ކުރިކަން އަންގައި ޕީއެސްއެމްއިން ނެރުނު ބަޔާނެއްގައި ބުނީ، ރިޔާސީ އިންތިހާބާއި ގުޅިގެން ކެންޑިޑޭޓުން ބައިވެރިވެވަޑައިގަންނަވާ ތަފާތު ކެމްޕެއިން ހަރަކާތްތައް ރާއްޖޭގެ އެކި ކަންކޮޅުތަކުގައި ހިނގަމުންދާތީ އެ ދުވަހުގައި ބާއްވަން ތައްޔާރުވަމުންދިޔަ ޕީއެސްއެމްގެ ބަހުސްގައި ބައެއް ކެންޑިޑޭޓުންނަށް ބައިވެރިވެވެން ނެތުމުންނާއި، އިންތިހާބަށް ވަގުތު ކުޑަތަންވެފައި ވުމުން ޕީއެސްއެމްގެ ބަހުސް ފަހުގެ ތާރީހަކަށް ބަދަލުކުރުމަކީ ކެންޑިޑޭޓުންނަށް ކެމްޕެއިން ކުރުމަށް ދަތިތަކެއް ކުރިމަތިވާނެކަމެއް ކަމަށް ދެކޭ ކަމަށެވެ. 

އެހެންކަމުން ޕީއެސްއެމްގެ ބަހުސް ފަހުގެ ތާރީހަކަށް ބަދަލު ކުރުމަކީ އެންމެ ރަނގަޅު ގޮތް ނޫންކަމަށް ފެންނާތީ، އެ މީޑިއާއިން ގަސްތުކުރަނީ މިހާރު ވެސް ބަހުސެއް ރާވާފައިވާ ފަރާތަކާއި ގުޅިގެން ބަހުސް ކުރިއަށް ގެންދިއުމަށް ކަމަށްވެސް ޕީއެސްއެމްގެ ބަޔާނުގައި ވެއެވެ.

އެގޮތުން ސަންގު ޓިވީން ބައްވާ ބަހުސްގައި ޕީއެސްއެމުން ޕާޓްނަރ ވެގެން ކުރިއަށް ގެންދިއުމުގެ އިންތިޒާމުތައް ވަމުންދާކަމަށް ބެސް ހާމަކޮށްފައި ވެއެވެ. ނަމަވެސް ސަންގު ޓީވީގެ ބަހުސްގައި އަމިއްލަ ކެންޑިޑޭޓުންނަށް ބައިވެރިއެއް ނުވެވެއެވެ. 

މިކަމާއި ގުޅިގެން ފާރިސް ކުރެއްވި ޓްވީޓެއްގައި ވަނީ، ޕީއެސްއެމްގެ އެ ނިންމުން ބަދަލު ކުރުމަށް އެ އެދިލައްވާފައެވެ. 

ފާރިސް ވިދާޅުވީ، ކެންޑިޑޭޓުންގެ މެނިފެސްޓޯ އާއި ސިޔާސަތުތައް ބަހުސެއްގެ ސިފާގައި ފެނިގެން ދިޔުމަކީ، އެ ވޯޓުލާ ރައްޔިތުންގެ ހައްގެއް ކަމަށެވެ. 

ޕީއެސްއެމް އިން ބަހުސް ކެންސަލް ކުރަން ނިންމާފައިވަނީ،  އެ ރޭ އެމްޑީޕީގެ “އުފާވެރި މާލެ“ ގެ ނަމުގައި އިވެންޓެއް ބާއްވާތީ، އެ ޕާޓީން ބަހުސް ފަސް ކޮށްދިނުމަށް އެދިފައިވާ ދަނޑިވަޅެއްގައެވެ. 

އެކަމާއި ގުޅިގެން ގިނަ ބައެއްގެ ފާޑުކިޔުންތައް ޕީއެސްއެމަށް އަމާޒުވަމުން އަންނަ އިރު، މީގެ ކުރިންވެސް އިންތިހާބުގެ ކެންޕެއިން ކަންކަން ކުރިއަށް ގެންދަމުން ދިޔަ އިރުވެސް މި ބަހުސް ކެންސަލް ކޮށްފައެއް ނުވެއެވެ. އެގޮތުން، 2018 ވަނަ އަހަރު އެންމެ ކެންޑިޑޭޓަކާއި އެކުވެސް އެ ބަހުސް ވަނީ ކުރިއަށް ގެންގޮސްފަ އެވެ.