ވ އާރަށް ކުއްޔަށް ދޫކުރުމުގެ މުއާމަލާތް ހިންގުމުގައި ރައީސް އަބްދުالله ޔާމީން އަބްދުލްގައްޔޫމު ޚިޔާނާތްތެރިވެފައިވާކަން ސާބިތުކުރުމަށް ދައުލަތުން ކޯޓަށް ހުށައެޅީ އެ މުއާމަލާތް ހިނގުމުގެ ކުރީގެ މާ ކުރީގެ މާލީ ބަޔާނެއްކަން ހާމަވެއްޖެ އެވެ.

ވ އާރަށުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ކޮށްފައިވާ ހުކުމް، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފު ކޮށްފައިވާއިރު، މިއަދު ވަނީ އެ މައްސަލައިގެ އަޑުއެހުމެއް ހައި ކޯޓުގައި ބާއްވާފަ އެވެ.

މިއަދުގެ އަޑުއެހުމުގައި އޮތީ ރައީސް ޔާމިނުގެ ފަރާތްޕުޅުން ހުށައަޅާފައިވާ އިސްތިއުނާފީ ނުކުތާތަކަށް ދައުލަތުގެ ފަރާތުން ޖަވާބުދިނުމެވެ. އެގޮތުން މިއަދުގެ އަޑުއެހުމުގައި ދައުލަތުން ވަނީ ރައީސް ޔާމިނުގެ އެޗްއެސްބީސީ އެކައުންޓަށް ޖަމާކުރި 1 މިލިއަން ޑޮލަރަކީ ޔޫސުފް ނައީމް އަތުން ބައްލަވައިގަތް ޑޮލަރުކަމަށް ބުނާ ބުނުން ދޮގުކޮށް، އެ 1 މިލިއަން ޑޮލަރަށްވާ 15 މިލިއަން ރުފިޔާއަކީ ވުޖޫދުގައިވާ ފައިސާކަން އެނގޭނެ މާލީ އެއްވެސް ހެތްކެއް ނެތްކަން ސާބިތުކުރުމަށް މަސައްކަތްކޮށްފަ އެވެ.

Advertisement

އެ މައުލޫގައި ދައުލަތުގެ ވަކީލު ވިދާޅުވީ 1 މިލިއަން ޑޮލަރަށްވާ 15 މިލިއަން ރުފިޔާއަކީ ވުޖޫދުގައިވާ ފައިސާއެއްކަން މާލީ ބަޔާންތަކާއި އެނޫންވެސް ރެކޯޑުތަކުން ފެންނަން ނެތް ކަމަށެވެ. އެހެންކަމުން ޑޮލަރު މާރުކުރިކަމަށް ބުނާ ވާހަކައަކީ ބުއްދީގެ ހަމަތަކުން ބަލާއިރު ގަބޫލުކުރެވޭނެ ކަމެއް ނޫން ކަމަށެވެ. އަދި ފަނޑިޔާރު ހުކުމް ކުރެއްވުމުގައި ވެސް އެކަމަށް ބައްލަވާފައިވަނީ ރަނގަޅަށްކަމަށް ދައުލަތުގެ ވަކީލު ވިދާޅުވި އެވެ.

އެހެން ނަމަވެސް އެކަން ސާބިތުކޮށްދިނުމަށް ދައުލަތުން ހުށައަޅާފައިވަނީ 2013 ވަނަ އަހަރުގެ މާލީ ބަޔާނެކެވެ. އެއީ އާރަށުގެ މުއާމަލާތް ހިނގުމުގެ މާ ކުރީގެ މާލީ ބަޔާނެކެވެ. އާރަށުގެ މުއާމަލާތް ހިނގާފައިވަނީ 2015 ވަނަ އަހަރުގައެވެ.

އެކަން މިއަދުގެ ޝަރީއަތުގައި ފަނޑިޔާރުންގެ ބެންޗުން ވެސް ފާހަގަކުރެއްވި އެވެ. ޑޮލަރުމާރުކުރުމަށް ފައިސާ ހުރިތޯ ނުވަތަ ނެތް ތޯ ޔަގީންކުރުމަށް ބަލަންޖެހޭނީ 2014 ވަނަ އަހަރުން 2018 ވަނަ އަހަރުގެ ނިޔަލަށް އެކުލަވާލާފައިވާ މާލީ ބަޔާންތައް ނޫން ތޯ އެ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު ހުޒައިފާ މުހައްމަދު ވަނީ ދައުލަތުގެ ވަކީލާއި ސުވާލުވެސް ކޮށްފަ އެވެ.

ސާފު ޖަވާބެއް ނުދެއްވާ ދައުލަތުގެ ވަކީލު ވިދާޅުވީ އެ މާލީ ބަޔާނަށް ބަލާއިރު، 15 މިލިއަން ރުފިޔާ ރައީސް ޔާމިނުގެ އެކައުންޓުގައި ނެތުމަކީ، އެއީ ޑޮލަރު އެކްސްޗޭންޖު މުއާމަލާތެއް ނޫންކަން ހާމަކޮށްދޭ ކަމެއް ކަމަށެވެ. އަދި އެއީ ރިޝްވަތުގެ ގޮތުގައި ލިބުނު ފައިސާކަމަށް ކްރިމިނަލް ކޯޓުން މައްސަލަ ބެއްލެވި ފަނޑިޔާރު ޝަކީލު ނިންމެވި ނިންމުމަކީ ރަނގަޅު ނިންމުމެއްކަމަށް ބާރުލިބޭ ކަމެއް ކަމަށެވެ.

އާރަށު މައްސަލައިގައި މިހާރު ކުރިއަށް ދަނީ ދައުލަތުގެ ފަރާތުން އިސްތިއުނާފީ ނުކިތާތަކަށް ޖަވާބުދާރީވުމުގެ ފަހު ފުރުސަތެވެ. އާރަށު މައްސަލައިގެ އިސްތިއުނާފު އަޑުއެހުންތައް ނުނިމި ވަރަށް ބޮޑަށް ދިގުލައިގެންދާކަން ފާހަގަކޮށްލެވެއެވެ.

މިވަގުތު އާރަށު މުއާމަލާތާއި ގުޅިގެން ރައީސް ޔާމިނުގެ މައްޗަށް ކޮށްފައިވާ ޖަލު ހުކުމް ތަންފީޒު އެމަނިކުފާނު ކުރައްވަމުންދާއިރު، މި މައްސަލަ ލަސްވުމަކީ ރައީސް ޔާމިނުގެ ވަރަށް ގިނަ ހައްގުތަކަށް ހުރަސްއެޅޭ ކަމެއްކަން ފާހަގަކޮށް ގާނޫނީ ވަކީލުންނާއި އިދިކޮޅު ލީޑަރުންގެ އިތުރުން ރައީސް ޔާމިނުގެ ސަޕޯޓަރުން ގެންދަނީ ކަންބޮޑުވުން ފާޅުކުރަމުން ނެވެ. ޗ