ސެޕްޓެންބަރ 9 ވަނަ ދުވަހު އޮންނަ ރިޔާސީ އިންތިޚާބު ކާމިޔާބު ކުރެވިއްޖެނަމަ ރާއްޖޭގެ ޖުޑިޝަރީ ސިޔާސީ ނުފޫޒުން މިނިވަންކޮށް ރައްޔިތުންގެ އިތުބާރު އޮތް ބާރަކަށް ހެދުމަށް ވެރިކަމުގެ އެންމެ ފުރަތަމަކޮޅުވެސް މަސައްކަތް ފަށްޓަވާނޭ ކަމުގައި އިންތިޚާބު ކާމިޔާބުކުރާނެ ކަމަށް އެންމެ ގިނަ ބަޔަކު ގަބޫލުކުރާ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑޮކްޓަރ މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެންޑިޑޭޓަކަށް ވެވަޑައިގަތުމަށްފަހު ރާއްޖޭގެ މީޑިއާއަކަށް އެމަނިކުފާނު ދެއްވި ފުރަތަމަ އިންޓަވިއު ވޮއިސްއަށް ދެއްވަމުން ޑޮކްޓަރ މުއިއްޒު ވިދާޅުވީ އެމަނިކުފާނުގެ ވެރިކަމުގައި އެންމެ އިސްކަންދެއްވާ ކަންކަމުގެތެރޭގައި ޖުޑިޝަރީއަށް މިނިވަންކަމާއި ބާރުތައް ދޫކޮށްލެއްވުން ހިމަނިގެންދާނެ ކަމަށެވެ.
'' ރައްޔިތުންނަށް އެބަޖެހޭ މިގައުމުގައި މިހާރު ހަމަޖެހުމުގެ ނޭވާއެއް ލެވެން. އަބަދު ވެރިކަމުގެ ނިޒާމުގެތެރެއިން ޝަރުއީ ދާއިރާއަށް ނުފޫޒާއި ބާރު ފޯރުވުމުގެ ވާހަކަ އިވެމުންދަނީ. އެހެންވީމާ ޖުޑިޝަރީއަކީ މިހާރު އަޅުގަނޑުމެންގެ ތެރޭގައި އިތުބާރު އުފައްދަންޖެހިފައިވާ އެއްބާރު"
ޑރ. މުހައްމަދު މުޢިއްޒު ވިދާޅުވިއެވެ.
މުއިއްޒު ވިދާޅުވީ ޖުޑިޝަރީއަކީ މިނިވަންކަމާއި މުސްތަގިއްލުކަމާއެކު ހިނގާތަނަކަށް ހަދައި ރައްޔިތުންގެ އިތުބާރު ހޯދައިދިނުމަށްޓަކައި ޖޭއެސްސީ އެކުލަވާލެވިފައި އޮތް ގޮތް ބަދަލުކުރައްވައި ޖޭއެސްސީއަށް މިހާރު ނަގާފައިވާ ޖުޑިޝަލް އެޑްމިނިސްޓްރޭޝަންގެ ބާރުތައް ޖޭއެސްސީން އަލުން ޖުޑިޝަލް އެޑްމިނިސްޓްރޭޝަނަށް ބަދަލުކުރައްވާނެ ކަމަށެވެ.
" ހަގީގަތުގައި ޖުޑިސަލް ސާވިސް ކޮމިޝަނަކީ ޖުޑިޝަލް އެޑްމިނިސްޓްރޭޝަންގެ ކަންކަން ހިންގަންޖެހޭނެ ފަރާތެއް ނޫން. ޖުޝަލް އެޑްމިނިސްޓްރޭޝަންއަށް ޚާއްސަކުރެވިފައިވާ ޑިޕާޓްމަންޓް އެބައޮތް. އެތަނުން ޖުޑިޝަލް ސާވިސް ކޮމިޝަނަށް މިހާރު ނަގާފައި އޮތް އިދާރީ ހިންގުން ބަދަލުވާޖްނެހޭނެ. އެއިދާރާއަށް ( ޖުޑިޝަލް އެޑްމިނިސްޓްރޭޝަން ) އިޚްތިޔާރާއި ބާރުދީގެން ޖުޑީޝަރީ ރަނގަޅަށް ހިންގޭނީ" އަދި މިހާރަށްވުރެ ފުރިހަމައަށް ކަފާލަތުގެ ނިޒާމެއް ގާއިމުކުރެއްވުމަށް ގާނޫނީ އޮނިގަނޑަށް ބަދަލުގެންނަވާނެކަމަށްވެސް ވިދާޅުވިއެވެ.
މީގެއިތުރަށް އެމަނިކުފާނުގެ މެނިފެސްޓޯގައިވާ ބޯހިޔާވަހިކަމުގެ ސިޔާސަތުގެ ތެރެއިން ޖުޑިޝަރީގައި މަސައްކަތްކުރާ ފަރާތްތަކަށް ބޯހިޔާވަހިކަން ފޯރުކޮށްދެއްވައި އެހެން ފަރާތްތަކަށް ބަރޯސާވާން ނުޖެހޭފަދަ ބަޔަކަށް ހައްދަވާނެކަމަށްވެސް ވިދާޅުވިއެވެ.
" އަޅުގަނޑުމެންގެ މެނިފެސްޓޯގައި އޮތް އެންމެ މުހިއްމު އެއް ސިޔާސަތަކީ ގެދޮރުވެރިކަން. ޖުޑިޝަރީގައި މަސައްކަތްކުރާ ފަރާތްތަކަކީވެސް މިދެންނެވިހެން އެހެން ފަރާތްތަކަށް ޑިޕެންޑްވާން ނުޖެހޭ ގެދޮރުވެރިކަން ކަށަވަރުވެފައިވާ ބަޔަކަށް އަޅުގަނޑުގެ ސަރުކާރެއްގައި ވާނެ. ޖުޑިޝަރީގައި މަސައްކަތްކުރާ ފަރާތްތަކަކީ އަމިއްލަ ފައިމައްޗަށް ތެދުވެ އަބުރުވެރި އެހެންފަރާތްތަކަށް ސަލާންޖަހަން ނުޖެހޭ ވަކި ބާރަކަށް ވާންޖެހޭނެ. އެގޮތަށް ކަންތައްކުރެވޭނީ ސަރުކާރުން މަގުފަހިކޮށްދީގެން. އެހެންވީމާ ހަގީގީ މާނައިގައި މިނިވަން ބާރަކަށްވާނެ. އެތަނަކީ ސިޔާސީ ނުފޫޒު ފޯރުވަން އުޅުނަސް ނުފޯރުވޭނެ ތަނަކަށް ހެދުމަށް އެއަމާޒަށް ދިއުމަށް ކުރަންޖެހޭ ކަންކަން އަޅުގަނޑު ކުރާނަން"
ޑރ. މުހައްމަދު މުޢިއްޒު ވިދާޅުވިއެވެ.
ޖަލުގައި ބަންދުކޮށްފައިވާ ޜާއްޖޭގެ އެންމެ ގިނަ ބައެއްގެ ތާއީދު ލިބިވަޑައިގެންފައިވާ ޕީޕީއެމްގެ ލީޑަރ ރައީސް ޔާމީން މިނިވަންކުރެއްވުމަށް މަސައްކަތްޕުޅު ކުރެއްވުމަކީ ޑޮކްޓަރ މުހައްމަދު މުއިއްޒުގެ އެންމެ އިސްކަންދެއްވާނެ ވައުދުތަކުގެތެރޭގައި ހިމެނެ ވައުދެކެވެ. އެކަމަކު ވިދާޅުވީ އެމަސައްކަތްޕުޅު ކުރައްވާނީ ގާނޫނީ ހަމަތަކުގެ މަތިންކަމަށެވެ. ފަނޑިޔާރުގޭގެ މިނިވަންކަމާ މުސްތަގިއްލުކަން ކަށަވަރުކޮށްދިނުމާއެކު ރައީސް ޔާމީން މިނިވަންވެވަޑައިގަންނަވާނެކަމަށް ޔަގީންކުރައްވާ ކަމަށް މީގެކުރިން ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
