މިއިންތިޚާބުގައި އެމްޑީޕީއަށް ވޯޓުލުން ނޫންގޮތެއް ނެތް ކަމަށް އެމްޑީޕީގެ ރިޔާސީ ކެންޑިޑޭޓް އަދި ރާއްޖެގެ ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ރިޔާސީ އިންތިޚާބަށް ތާއީދު ހޯދުމަށް ރ.އަތޮޅަށް އެމްޑީޕީ އާއި ކޯލިޝަނުން ކުރައްވަމުންގެންދަވާ ދަތުރުފުޅުގައި ރ. މާކުރަތަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ވާހަކަދައްކަވަމުންނެވެ.

ރައީސް ވިދާޅުވީ ރާއްޖޭގައި ތިބީ ދެފަޅިއަކަށް ދެޕާޓީއަކަށް ތާއީދު ކުރާ މީހުން ކަމަށެވެ. އެއީ އެމްޑީޕީއަށް ސަޕޯޓް ކުރާ ފަރާތްތަކާއި ޕީޕީއެމްއަށް ސަޕޯޓު ކުރާ ފަރާތްތައްކަމަށެވެ. މީގެ އިތުރުންވެސް މިއިންތިޚާބަށް ކުރިމަތިލައްވައިގެން އުޅޭ ފަރާތްތައް އެބަ އުޅުއްވާ ކަމަށެވެ.

ހުރިހާ ކެންޑިޑޭޓުންގެ ތެރެއިން ޑރ މުޢިއްޒަކީ އޮތް ޗޮއިސް އެއް ނޫންކަމަށް ރައީސް ޞާލިޙް ވިދާޅުވިއެވެ.

ދެން ތިއްބެވި ކެންޑިޑޭޓުންގެ ތެރޭގައި އެމްޑީޕީ ކޯލިޝަނާއި ކައިރިއަށް އާދެވޭނެ ބޭފުޅަކުވެސް ނެތްކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ޤައުމުގެ މުސްތަޤްބަލަށްޓަކައި، ޤާނޫނު އަސާސީން މަތިކޮށްފައި މިއޮތް އަމާނާތުގައި ރަނގަޅަށް ހިފައިގެން ކުރިއަށް ދާން އެބަޖެހޭ ކަމަށެވެ.

ރައީސް ވިދާޅުވީ ކެންޑިޑޭޓުންގެ މެނިފެސްޓޯތައް ބައްލަވައި ކިޔުއްވައި އެހެން ކެންޑިޑޭޓުންގެ މެނިފެސްޓޯއާއި އެމްޑީޕީގެ މެނިފެސްޓޯއާއި އަޅައި ކިޔުއްވުމަށެވެ. ރާއްޖޭގެ ތަރައްޤީއަށާއި ރާއްޖޭގެ މުސްތަޤްބަލާއި މެދު ލިޔެފައިވާ ވާހަކަތައް ކިޔުއްވުމުން ތަފަތު ވަރަށް ބޮޑަށް ފެނިގެންދާނެ ކަމަށް ރައީސް ވިދާޅުވިއެވެ.

ރ.އަތޮޅަށް ކުރައްވަމުން ގެންދަވާ ދަތުރުފުޅުގައި ކޯލިޝަންގެ އިސްވެރިން ދަނީ ބައިވެރިވަމުންނެވެ.