ރިޔާސީ އިންތިހާބުގެ ދެވަނަ ބުރުގައި، އިތުރު ބަޔަކާއި ކޯލިޝަން ހަދަންޖެހޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

ރިޔާސީ އިންތިހާބުގެ ފުރަތަމަ ބުރުގެ ނަތީޖާއިން ދައްކާ ގޮތުން، ރައީސް ސާލިހާއި އިދިކޮޅު ކެންޑިޑޭޓް ޑރ. މުހައްމަދު މުއިއްޒާ ދެމެދު 15،000 ވުރެ ގިނަ ވޯޓުގެ ފަރަގު އެބަ އޮތެވެ. އެއީ ހަތް ޕަސެންޓުގެ ފަރަގެކެވެ.

މުއިއްޒަށް ލިބިވަޑައިގެންނެވީ 100,122 ވޯޓެވެ. އެއީ 46.07 ޕަސެންޓެވެ. ރައީސް ސާލިހަށް 84,997 ވޯޓު ލިބިވަޑައިގެންނެވިއެވެ. އެއީ 39.11 ޕަސެންޓް ވޯޓެވެ.

Advertisement

މި ނަތީޖާ އާއި އެކު ދެވަނަ ބުރަކަށް އިންތިހާބު ގޮސްފައިވާއިރު، ރޭ މެންދަމު، އެމްޑީޕީގެ ކެމްޕެއިން މައި-އިދާރާ ސޯލްޓް ކެފޭ ހިންގާ އިމާރާތުން ރައީސް ޞާލިހު ނުކުތް ވަގުތު ނޫސްވެރިން ވަނީ އިންތިހާބުގެ ނަތީޖާ އާ، ކުރިއަށް އޮތް ދެވަނަބުރާއި ގުޅޭ ގޮތުން ސުވާލު ކޮށްފައެވެ.

އެގޮތުން، ފުރަތަމަ ބުރުން ލިބުނީ އުންމީދު ކުރި ނަތީޖާއެއްތޯ ސުވާލު ކުރުމުން އެއަށް ސީދާ ޖަވާބެއް ނުދެއްވައި ރައީސް ވިދާޅުވީ ވޯޓުގެ ކުރިން ވިސްނިފައި ނެތް، ބައެއް ކަންތައްތައް ގޮސްފައިވާ ކަމަށެވެ.

"އެބަހުރި ވިސްނިފައި ނެތް، ބައެއް ކަންތައްތައް ގޮސްފައި. އެހެންވީމާ އެއާ ދޭތެރޭގައި މީޓުކޮށްގެން މި ތައްޔާރު ވަނީ." ރައީސް ޞާލިހް ވިދާޅުވި އެވެ. 

މިއާއެކު އިންތިހާބުގެ ދެވަނަ ބުރުގައި ކުރީގެ ރައީސް މުހައްމަދު ނަޝީދުގެ ތާއިދު ހޯއްދެވުމަށް މަސައްކަތް ކުރައްވާނަންތޯ ނޫސްވެރިއެއް ވަނީ ސުވާލު ކޮށްފައެވެ. އެއަށްވެސް ސީދާ ޖަވާބެއް ނުދެއްވި ނަމަވެސް އިތުރު ބަޔަކާ ކޯލިޝަން ހަދަންޖެހޭ ކަމަށް ރައީސް ޞާލިހު ވަނީ ވިދާޅުވެފަ އެވެ. 

ދެ ވަނަ ބުރާމެދު ޔަގީންކަން އެބަ އޮތްތޯ ނޫސްވެރިއަކު ސުވާލު ކުރުން ރައީސް ވިދާޅުވީ އެކަމާ ދޭތެރޭގައި ވިސްނާނީ މާދަމާ ކަމަށެވެ.

"އަޅުގަނޑު މަސައްކަތް ކުރާނީ. މާދަމާ އެއާމެދު އަޅުގަނޑުމެން ވިސްނާނީ." ރައީސް ޞާލިހް ވިދާޅުވި އެވެ. 

ރިޔާސީ އިންތިހާބު ދެވަނަ ބުރަކަށް ގޮސްފައިވާއިރު، ދެވަނަ ބުރުގެ ވޯޓުލުން އޮންނާނީ މިމަހު 30 ވާ ހޮނިހިރު ދުވަހު އެވެ.