ރިޔާސީ އިންތިހާބުގެ ފުރަތަމަ ބުރު ނިމިގެން ގޮސްފައިވާއިރު، އެ ބުރުގެ ތެރެއިން ވަރަށް ގިނަ "މިސްޓޭކްސް" ހެދިފައި ހުރި ކަމަށް އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

ރިޔާސީ އިންތިޚާބުގައި އެއްބުރުން ކާމިޔާބީ ލިބޭނެ ކަމަށް މީގެ ކުރިން އެމްޑީޕީ އާއި ގުޅިފައިވާ ކޯލިޝަނުން ހެދި ހިސާބުތަކަށްފަހު އެފަރާތްތަކުން ވިދާވެފައި ވާއިރު، އިންތިހާބުގެ ފުރަތަމަ ބުރުގައި 15,000 އަށްވުރެ ގިނަ ވޯޓުގެ ބޮޑު ފަރަގަކުން، އެ އިންތިހާބު ކާމިޔާބު ކުރައްވާފައިވަނީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒު އެވެ. އެއީ ހަތް ޕަސެންޓުގެ ފަރަގެކެވެ.

މުއިއްޒަށް ލިބިވަޑައިގެންނެވީ 100,122 ވޯޓެވެ. އެއީ 46.07 ޕަސެންޓެވެ. ރައީސް ސާލިހަށް 84,997 ވޯޓު ލިބިވަޑައިގެންނެވިއެވެ. އެއީ 39.11 ޕަސެންޓް ވޯޓެވެ.

މި ނަތީޖާ އާއި ގުޅިގެން ރާއްޖެޓީވީގެ "ފަށާއިރު" ޕްރޮގްރާމް އަށް މިއަދު ދެއްވި ފޯން ކޯލް ބަސްދީގަތުމެއްގައި ރައީސް ޞާލިހު ވިދާޅުވީ ފުރަތަަމަ ބުރުގެ ނަތީޖާ ނުކުތީ އުއްމީދު ކުރެއްވި ގޮތަކަށް ނޫން ކަމަށެވެ. 

މިއާއެކު ރައީސް ޞާލިހް ވިދާޅުވީ ފުރަތަމަ ބުރުގެ ނަތީޖާ އެފަދައިން ނުކުތީ ކީއްވެތޯ މިހާރު ބައްލަވާފައިވާ ކަމަށާ، އިންތިހާބުން ކުރި ނުހޯދުނު މައިގަނޑު ސަބަބަކީ ވޯޓު ލާނެ ކަމަށް އުއްމީދު ކުރެއްްވި ފަރާތްތަކުން ވޯޓުލާން ނުނިކުތުން ކަމަށެވެ. 

މިއާއެކު ރައީސް ޞާލިހް ވިދާޅުވީ، ވޯޓުލާ ގަޑި "ޓަސް ލާފައި 4 ޖެހި އިރު ބަންދު" ކުރުމުން ހަވީރު ވޯޓުލާން އަންނަންތިބި ވަރަށް ގިނަ މީހުންނަށް ނާދެވުނު ކަމަށެވެ. އެއީވެސް މައްސަލަ އެއް ކަމަށާ، އަދި މީގެ ކުރީ އިންތިހާބު ތަކުގައި، އެމްޑީޕީގެ ޓީމު ތަކުން، މީހުން ވޯޓުލާން ނެރެން މަސައްކަތް ކުރި މިންވަރަށް މިފަހަރު ނުކުރެވުން ވެސް އެއީ ވޯޓު މަދުވި ސަބަބެއް ކަމަށް ރައީސް ޞާލިހު ފާހަގަ ކުރެއްވިއެވެ. 

އެހެންކަމުން، އެކަންކަމާއި މެދު މި ދެތިން ދުވަހު ވާހަކަދެކެވި، އެކަން ބެލެވިފައިވާ ކަމަށާ، ވޯޓުލާނެ ކަމަށް ބުނި އެންމެން ވޯޓުލާން ނެރެވިއްޖެ ނަމަ، އިންތިހާބު ކާމިޔާބު ކުރުމަކީ ނުވާނެ ކަމެއް ކަމުގައި ފެނިވަޑައިނުގަންނަވާ ކަމަށް ރައީސް ޞާލިހު ވިދާޅުވި އެވެ.