ރިޔާސީ އިންތިޚާބުގެ ކެމްޕޭނުގައި ސަރުކާރަށް ތާއީދު ހޯދުމަށް ސީދާކޮށް އަދި ނުސީދާކޮށް ސިފައިން ބޭނުންކޮށްފައިވާ ކަމަށާ އެހެން އެކަން ކޮށްފައިވަނީ ގާނޫނު އަސާސީ އާއި ޚިލާފަށް ކަމަށް ރައީސް ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ސިޔާޒު ވިދާޅުވެއްޖެއެވެ. 

ދިވެހިރާއްޖޭގައި އިންޑިޔާ ސިފައިން ތިބި މައްސަލާގައި، އިންޑިއާ ސިފައިން ރާއްޖޭގައި ބެއިތިއްބުމަށް ވެފައިވާ އަޑިނޭނގޭ އެއްބަސްވުން ތަކުން ގައުމީ ސަލާމަތަށް ނުރައްކާވާ ކަމަށް އިދިކޮޅުުން ވިދާޅުވަމުން އަންނައިރު، އެފަދަ ވާހަކަ ތަކުން އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ލިބޭ ވޯޓު މަދުވާ ކަމަށް ޚުދު އެމަނިކުފާނު ވަނީ ދާދިފަހުން ވިދާޅުވެފައެވެ. 

އެފަދައިން ވިދާޅުވެފައި ވަނިކޮށް، އިދިކޮޅުގެ ވާހަކަތަކަށް ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުالله ޝަމާލް ވަނީ ގައުމީ ޓީވީ، ޓީވީއެމް އަށް އަރައި ރައްދު ދެއްވާފައެވެ. 

Advertisement

އެކަމާއި ގުޅިގެން ސިޔާސީ ހަރަކާތްތަކުގައި ސިފައިން ބައިވެރިވާ ކަމަށް ބުނެ، ގިނަ ބައެއްގެ ފާޑުކިޔުންތައް ސިފައިންނަށް އަމާޒުވަމުންދާ އިރު، މި މައްސަލައިގައި ސިޔާޒް ކުރެއްވި ޓްވީޓެއްގައި ވިދާޅުވީ، ރިޔާސީ އިންތިޚާބުގެ ކެމްޕޭނުގައި ސަރުކާރަށް ތާއީދު ހޯދުމަށް ސީދާކޮށް އަދި ނުސީދާކޮށް ސިފައިން ބޭނުންކުރި ކުރުމަކީ ޤާނޫނު އަސާސީގެ 246 ވަނަ މާއްދާގެ (ށ) އާ ޚިލާފް ޢަމަލެއް ކަމަށެވެ.

"ސިޔާސީ ހަރާކާތުގައި ބައިވެރިވި ސިފައިން މިހާރު އެވަނީ ޤާނޫނު އަސާސީއާ ޚިލާފް ވެފައެވެ." ސިޔާޒް ވިދާޅުވި އެވެ.