8 ސެޕްޓެމްބަރ ވީ ހުކުރުދުވަހުގެ ރޭ މޮރޮކޯއަށް އައި 6.8 މެގްނެޓިޔުޓްގެ ބިންހެލުމުގައި ސަލާމަތްވެ އެތައް ބަޔަކު ވަނީ ޙާލުގައި ޖެހިފައެވެ.

ބިންހެލުން އައި ސަރަހައްދުގައި އޮންނަ  އިޖޫކަކް ކިޔާ އަވަށެއްގެ  އާބާދީގެ ދެބައިކުޅަ އެއްބައި ވަނީ ބިނެހެލުމުގެ ސަބަބުން މަރުވެފައި ވާކަމަށް ލަފާކުރެވޭ ކަމަށް އަލްޖަޒީރާގައި ބުނެފައިވެއެވެ.

ބިންހެލުން އައިސްފައިވަނީ ފަރުބަދަ މަތީގެ ސަރަހައްދަކަށް ކަމުން މަރުބަދަ ތަކުގެ އެންމެ އުސް ހިސާބުގައި އޮންނަ އިޖޫކަކް އަށް އެހީގެ ސާމާނާއި މީހުން ސަލާމަތްކުރާ ރެސްކިޔު ވޯކަރުންނަށް އިޖޫކަކް އަށް ދެވިފައިވަނީ ބިންހެލުން އައިތާ ތިން ދުވަސް ފަހުންނެވެ. ނަމަވެސް އަދިވެސް ހާލުގައި ޖެހިފައި ތިބި މީހުންނާއި ހަމައަށް ފޯރައިފައެއް ނުވެއެވެ.  

ކުޑަ އާބާދީ އެއް އޮންނަ އިޖޫކަކްގައި ދިރިއުޅެނީ ގާތްގަނޑަކަށް 100 އެއްހާ މީހުންނެވެ. އޭގެ ތެރެއިން ދެބައިކުޅަ އެއްބައި މީހުން ވަނީ މަރުވެފައި ކަމަށް ލަފާ ކުރެވޭއިރު އަނެއް ބަޔަކު އަދިވެސް ތިބީ ރެސްކިޔު ވޯކަރުންގެ އިންތިޒާރުގައެވެ.

ރެސްކިޔު ވޯކަރުންގެ އިންތިޒާރުގައި އަތް އުރާލައިގެން ތިބުމުގެ ބަދަލުގައި އަވަށުގެ މީހުން ވަނީ ގެއްލިފައިވާ ޢާއިލާގެ މީހުންނާއި ރައްޓެހިން ހޯދުމަށް ވެރިފައިވާ ޢިމާރާތްތައް އަމިއްލައަށް ކޮންނަން ފަށައިފައެވެ.

އިޖޫކަކްގެ ހެންޔާ ބިލާއޫ އަކީ ބޮޑު ޢާއިލާއަކަށް ނިސްބަތްވާ މީހެކެވެ. މިބިންހެލުމުގައި އޭނާ އާއި އެކު އޭނާގެ ޢާއިލާގެ ނުވަ މެމްބަރަކު ވަނީ މަރުވެފައެވެ.

ހެންޔާ ގެ ކުދިން ކަމަށްވާ ފަސް އަހަރުގެ ޔޫސުފް އާއި  ދެ އަހަރުގެ ޖިހާން އެކުދިންގެ ބޮޑު ދައިތަގެ ބެލުމުގެ ދަށުގައި ތިބި އިރު، ބޮޑުދައިތަ ސައިދާ ބެން ނަސީރް ބުނެފައިވަނީ ފާރު ވެއްޓުނީ ހެންޔާގެ ގައިމައްޗަށް ކަމަށެވެ. އޭނާ ފެންކަޅިވެ ހުރެ ބުނެފައިވަނީ ކުދިން އެކަނި ވެއްޖެ ކަމަށާއި ފަސްއަހަރުގެ ޔޫސުފް އަށް އެކަން ބުނެދޭނެ ގޮތެއް ނޭނގޭ ކަމަށެވެ.

ބިން ހެލުމުގައި މަރުވި މީހުންގެ ޢަދަދު 3000 ގާތް ކޮށްފައިވާއިރު އަދިވެސް އެއްވެސް ވަރަކަށް އެހީ ނުލިބޭ މީހުން އުޅޭ ކަމަށްވެސް މީޑީއާތަކުން ވަނީ ބުނެފައެވެ.