މި ވަގުތު ކޮޅަކީ ދިވެހިރާއްޖޭގައި ވެރިކަން ކުރާނެ ނިޒާމާގުޅޭ ގޮތުން ބަސް ބުނަން ރައްޔިތުންނަށް ލިބޭނެ ވަގުތު ކޮޅެއް ކަމަށް، ރިޔާސީ އިންތިހާބުގެ ފުރަތަމަ ބުރުގައި ދަ ޑިމޮކްރެޓްސް ގެ ފަރާތުން ވާދަކުރެއްވި އިލްޔާސް ލަބީބު ގެ ރަނިންމޭޓް ހުސައިން އަމްރު ރަޝާދު ވިދާޅުވެއްޖެއެވެ. 

ޢަމްރު މިއަދު ކުރެއްްވި ޓުވީޓެއްގައި ވިދާޅުވީ، ރިޔާސީ އިންތިޚާބެއްގެ 2 ބުރު ދޭތެރެއިން ލިބޭ ވަގުތު ކޮޅު ނޫނީ ނިޒާމާ ބެހޭގޮތުން ރައްޔިތުންނަށް ބަހެއް ބުނުމުގެ ފުރުސަތު ނުލިބޭނެ ކަމަށެވެ. 

"(އިންތިހާބުގެ ފުރަތަމަ ބުރާއި ދެވަނަބުރުގެ ދެމެދުގެ ވަގުތު) މިއީ ބަސް ބުނެވޭނެ ހިނދުކޮޅު." އަމްރު ވިދާޅުވި އެވެ. 

Advertisement

މީގެ އިތުރުން އަމްރު ކުރެއްވި އެހެން ޓުވީޓެއްގައި ވަނީ، ރައްޔިތުން އެދޭ ގޮތަށް ވެރިކަން ކުރެވޭނީ ވެރިކަން ކުރާ ނިޒާމަށް ބަދަލު ގެނެސްގެން ކަން މިދިޔަ 3 ދައުރުން ސާފުވާ ކަމަށެވެ. އަދި ރައްޔިތުންނާ ހަމަޔަށް ގޮތް ނިންމަން ގެންދެވޭނެ ހަމައެކަނި ވަގުތަކީ އިންތިޚާބެއްގެ ފުރަތަމަ ބުރާ 2 ވަނަ ބުރާ ދޭތެރޭ ކަމަށެވެ. 

"ރައްޔިތުންގެ ވެރިކަމެއް، ރައްޔިތުންގެ ފަރާތުން، ރައްޔިތުންނަށްޓަކާ ކުރެވޭނީ އެކަން އޮގޮތަށް ކުރެވޭނެ ނިޒާމެއް އޮވެގެން. އެގޮތަކީ ރައްޔިތުންނާ ގާތުން ހިންގޭ ވެރިކަމެއް. އެ ނިޒާމަކީ މަޖިލިހުގެ ތެރެއިން ހިންގޭ ސަރުކާރެއް." އަމްރު ވިދާޅުވި އެވެ. 

‏މިއާއެކު އަމްރު ވަނީ، މި މަހު 25ގައި ރައްޔިތުންނަށް ނިޒާމާ ގުޅޭ ގޮތުން ބަސްބުނަން ފުރުސަތު ދީ އެދުވަހު، އެކަމާއި ގުޅޭ ވޯޓެއް ނެގުމަށް ގޮވާލާފައެވެ. އަދި އޭގެ ފަހުން 30 ވަނަ ދުވަހު 2 ވަނަ ބުރުގެ ވޯޓު ލުމަށް އޭނާ ވަނީ އެދިފައެވެ. 

"ނިޒާމަށް ބަދަލު ގެންނަން ފެނިއްޖެ ނަމަ 30 ވަނަ ދުވަހު ހޮވޭ ރައީސް އަކީ ބަރުލަމާނީ ނިޒާމެއްގެ ރައީސުލް ޖުމްހޫރިއްޔާ." އަމްރު ވިދާޅުވި އެވެ. 

އަމްރުގެ އިތުރުން އިލްޔާސްވެސް ވަނީ އެފުރުސަތު ރައްޔިތުންނަށް ދިނުމަށް އެދިލައްވާފައެވެ. އަދި އެފަދަ ވޯޓެއް ނެގުމަށް، އިލްޔާސް ގެ ފަރާތުން ވަނީ ރައްޔިތުންގެ މަޖިލީހަށް ގަރާރެއް ވެސް ހުށަހަޅުއްވާފައެވެ. އެ ގަރާރުގެ ފުރަތަމަ ކިޔުން ފާއިތުވި ބުދަ ދުވަހު ވަނީ އިއްވާފައެވެ.