މި ވަގުތަކީ ވެރިކަމުގެ ނިޒާމާއި ގުޅޭގޮތުން ފެންނަ ނުފެންނަ ވޯޓުލުމަށް އެންމެ އެކަށީގެންވާ މުއްދަތު ކަމަށާއި، 10 ދުވަސް ތެރޭ ބަރުލަމާނީ ނިޒާމާއި ގުޅޭގޮތުން ރައްޔިތުން ހޭލުންތެރިކޮށް، ނިޒާމީ ވޯޓުނެގުމުގެ އެންމެހާ އިންތިޒާމުތައް ހަމަޖެއްސޭނެކަމަށް ޤަބޫލުފުޅު ކުރައްވާކަމަށް ދަ ޑިމޮކްރެޓްސް އިން ބުނެފި އެވެ. 

ރިޔާސީ އިންތިޚާބާއި ގުޅޭގޮތުން ދަ ޑިމޮކްރެޓްސްއިން ހާމަކުރަން ހުރި މުހިންމު ކަންކަން ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ ބަރުލަމާނީ ނިޒާމަށް ވެރިކަމުގެ ނިޒާމު ބަދަލުކުރަން ޖެހޭކަމަށް އެ ޕާޓީން އަބަދުވެސް ވަކާލާތު ކުރަމުން އައިސްފައިވާ ކަމަށެވެ. 

ރިޔާސީ އިންތިޚާބަށް އެ ޕާޓީން ކުރިމަތިލީ ވެސް ވެރިކަމުގެ ނިޒާމު ބަދަލުކުރުމުގެ މަޤްސަދުގައި ކަމަށާއި، ރިޔާސީ އިންތިޚާބުގެ ފުރަތަމަ ބުރު ދެވަނަ ބުރަކަށް ތައްޔާރުވަމުންދާއިރު، އަދި ސިޔާސީ ޕާޓީތަކާއެކު ކޯލިޝަން ހެދުމުގެ މަޝްވަރާތައް ދެވަނަ ބުރުގައި ވާދަކުރާ ޕާޓީތަކުން މިހާރު ފައްޓާފައިވާއިރު، މީ ނިޒާމު ބަދަލުކުރުމާއި ގުޅޭގޮތުން ރައްޔިތުންގެ ޚިޔާލު ހޯދުން އެންމެ މުހިންމު ދަނޑިވަޅުކަމުގައި ހަސަން ލަތީފު ވިދާޅުވި އެވެ. 

Advertisement

އޭނާ ވިދާޅުވި ގޮތުގައި، ދެން އުފެދޭ ސަރުކާރަކީ ވެސް މީގެކުރީ ސަރުކާރުތަކެކޭ އެއްގޮތަށް ގިނަ ސިޔާސީ ޕާޓީތަކާއެކު ކޯލިޝަން ހަދައިގެން އުފެދޭ ސިޔާސީ ޕާޓީތަކަށް ވެދާނެތީ ރައްޔިތުންގެ ބޮޑެތި ކަންބޮޑުވުންތަކެއް އެބަހުރި ކަމަށެވެ. އެގޮތުން 2008 ވަނަ އަހަރުން ފެށިގެން މިހާތަނަށް ކޯލިޝަން ހަދައިގެން ވެރިކަން ކުރަމުންދާއިރު، އެ ދިމާވި މައްސަލަތައް ރައްޔިތުންނަށް ތަޖުރިބާ ކުރެވިފައިވާ ކަމަށާއި، އެކަން އަލުން ތަކުރާރުވާން ރައްޔިތުން ބޭނުން ނުވާކަމަށް ހަސަން ލަތީފު ވިދާޅުވި އެވެ. 

އެ ވާހަކަތަކާއި ގުޅިގެން ނޫސްވެރިއަކު ވަނީ ވެރިކަމުގެ ނިޒާމު ބަދަލުކުރުމާއި ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމުގެ ވާހަކަ ދައްކަވާއިރު، އެކަން ކުރަން ދެން އޮތީ 10 ވަރަކަށް ދުވަސްކަމަށް ވުމުން، އެއީ އެފަދަ ބޮޑު ކަމެއް ކުރުމަށް އެކަށީގެންވާ މުއްދަތުތޯ ސުވާލުކޮށްފަ އެވެ. އަދި ނިޒާމީ ވޯޓެއް ނަގާނަމަ އެއީ ބަޖެޓުގައި ހިމަނާފައި ނެތް ބޮޑު ޚަރަދެއް ކުރަން ޖެހޭ ކަމަކަށް ވުމުން، އެ ޚަރަދު ކުރެވިދާނެކަމަށް ދެކިވަޑައިގަންނަވަންތޯ ވެސް ނޫސްވެރިއާ ސުވާލު ކުރިއެވެ. 

އެ ސުވާލުތަކަށް ޖަވާބުދެއްވަމުން ހަސަން ލަތީފު ވިދާޅުވީ ދަ ޑިމޮކްރެޓްސް އިން މަސައްކަތް ކުރަމުންދާ ސްޕީޑަށް ބަލާއިރު ބަރުލަމާނީ ނިޒާމާއި، ނިރާސީ ނިޒާމާއި ގުޅޭގޮތުން ރައްޔިތުން ހޭލުންތެރިކުރުމަށް 10 ދުވަހުގެ މުއްދަތަކީ ހަމަ އެކަށީގެންވާ މުއްދަތެއް ކަމަށެވެ. އަދި އެ މުއްދަތުގެ ތެރޭގައި، އިލެކްޝަންސް ކޮމިޝަނަށް ވެސް ވޯޓުލުމުގެ އިންތިޒާމުތައް ހަމަޖެއްސިދާނެކަމަށް ހަސަން ލަތީފު ވިދާޅުވި އެވެ. 

ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސްއިން ވަކި ގޮތެއް އަދި މިހާތަނަށް ނިންމާފައި ނުވާކަމަށް ހަސަން ލަތީފު ވިދާޅުވި އެވެ. 

އެއާއެކު އޭނާ ވިދާޅުވީ ވެރިކަމުގެ ނިޒާމު ބަރުލަމާނީއަށް ބަދަލުކުރުމަށް ޕީޕީއެމް-ޕީއެންސީ އަދި އެމްޑީޕީއަށް ވެސް ހުށައަޅާފައިވާ ކަމަށެވެ. އެހެން ނަމަވެސް ސީދާ އެއްވެސް ޕާޓީއަކާއި އެކު އެއްބަސްވުމަކަށް މިހާތަނަށް އާދެވިފައި ނުވާކަމަށާއި، އެމްޑީޕީން ނިޒާމު ބަދަލުކުރުމާއި ގުޅޭގޮތުން މިހާރު މަޝްވަރާތައް ކުރައްވަމުން ގެންދަވާކަމަށް ދެކެވަޑައިގަންނަވާކަމަށް ހަސަން ލަތީފު ވިދާޅުވި އެވެ.