ވޯޓުލާމީހުންގެ ވޯޓުލާތަން އެމީހުންނަށް ނޭނގި ބަދަލުކުރާ ކަމުގެ ޝަކުވާ އެބަލިބޭ ކަމަށާއި އެކަން ކުރާ ބަޔަކު ބަލަން ޖެހޭ ކަމަށް އުނގޫފާރު ދާއިރާގެ މަޖިލިސް މެމްބަރު މުޙައްމަދު ވަޙީދު ވިދާޅުވެއްޖެއެވެ.
ވަޙީދު މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.
ވަޙީދު ވިދާޅުވެފައިވަނީ އިދިކޮޅަށް ވޯޓުދޭ މީހުން ވޯޓުލާން ރަޖިސްޓްރީވެފައި އޮންނަ ތަން، އެމީހުންނަށް ނޭނގި ބަދަލުކުރަމުން ގެންދާ ކަމުގެ ޝަކުވާ ބައެއް މީހުން ކުރަމުން ގެންދާ ކަމަށެވެ.
"މިއީ ރައްޔިތުންގެ ވޯޓުގެ ހައްޤަށް އަރައިގަތުން، މިއީ އެންމެ ބޮޑު އެއް ކުށް، މިކަން ކުރާ ބަޔަކު ހޯދައި ހައްޔަރުކުރަންޖެހޭނެ"
ވަޙީދު ވިދާޅުވެފައިވެއެވެ.
އިންތިޚާބުގެ ފުރަތަމަ ބުރުގައިވެސް ވޯޓްލާ މަރުކަޒަށް ދިޔައިރު ލިސްޓުގައި ނަން ނެތިގެން ހަމަނުޖެހުމެއް ވަނީ ހިނގައިފައެވެ.
އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބް ކުރެއްވި ޓުވިޓެއްގައި ވިދާޅުވީ އިއްޔެ އެކަނި ވެސް 9،000 އަށްވުރެ ގިނަ ފޯމު އިލެކްޝަންސް ކޮމިޝަނަށް ހުށަހެޅި ކަމަށާއި އޭގެ ތެރެއިން 7،000 އަށްވުރެ ގިނަ ފޯމު ހުށަހަޅާފައިވަނީ އޮންލައިންކޮށް ކަމަށެވެ.
ދެވަނަ ބުރަށް ރީރަޖިސްޓްރޭޝަނަށް އިލެކްޝަންސް ކޮމިޝަނުން ހުޅުވާލާފައިވަނީ އިއްޔެއިން ފެށިގެން މާދަމާގެ މެންދުރު ފަހު 3:00 އާއި ހަމައަށެވެ.
Advertisement
This content is created and paid for by advertisers and does not involve Voice Journalists
