ނޭނގި ރަޖިސްޓްރީވެފައިވާ ތަން ނޫން އެހެން ތަންނަނަށް ބަދަލުކޮށްފައިވާ ކަމުގެ ޝަކުވާތައް އިތުރުވެއްޖެ އެވެ. 

ރިޔާސީ އިންތިޚާބުގެ ދެވަނަ ބުރުގައި ވޯޓުލުމަށް ރީ-ރަޖިސްޓްރޭޝަނަށް ހުޅުވާލި ހިސާބުން މިހާތަނަށް 25000 މީހުން ރީ-ރަޖިސްޓްރީކުރުމަށް ހުށައަޅާފައިވާކަމަށް އިލެކްޝަންސް ކޮމިޝަނުން އާންމު ކުރުމާއި ގުޅިގެން އިދިކޮޅުން ވަނީ އެ ފޯމުތަކުގެ ޞައްހަކަމާއި މެދު ސުވާލު އުފެދޭކަން ފާހަގަކޮށް، އެ ޕްރޮސެސް ކުރިއަށް ގެންގޮސްފައިވާ ގޮތް ބެލުމަށް ގޮވާލާފަ އެވެ. 

އޭގެ އިތުރުން ސަރުކާރުގެ ތެރެއިން ރީ-ރެޖިސްޓްރޭޝަން ޕްރޮސެސް ބޭނުންކޮށްގެން ޕްރޮގްރެސިވް ކޮންގްރެސް ކޯލިޝަނަށް ވޯޓުދިނުމަށް ތައްޔާރަށް ތިބި ރައްޔިތުން އެކި ތަންތަނަށް ރަޖިސްޓްރީ ބަދަލުކޮށް ވޯޓުލުމުގެ ފުރުސަތު ގެއްލުވާލުމަށް މަސައްކަތް ކުރަމުންދާކަމަށް ތުހުމަތުކޮށްފަ އެވެ. އަދި އެކަމަށް ރައްޔިތުން ފާރަވެރިވުމަށް އިދިކޮޅުން ވަނީ ގޮވާލާފަ އެވެ. 

އިދިކޮޅުން މި ކަން ސަމާލުކަމަށް ގެނައުމާއެކު ނޭނގި ރީ-ރަޖިސްޓާކޮށްފައިވާ ކަމުގެ ގިނަ ޝަކުވާތަކެއް އާންމުން ވަނީ ކުރަން ފަށާފައެވެ. އަދި އޮޅުވާލުމުގެ ތެރެއިން ރީ-ރެޖިސްޓާކޮށްފައިވާކަން ފާހަގަކޮށް ސޯޝަލް މީޑިއާގައި އެކަމުގެ ޝަކުވާތައް ކުރަމުން އަންނަ މީހުން ވަނީ އިތުރުވާން ފަށައިފަ އެވެ. 

އެގޮތުން "ވޮއިސް" އަށް ވެސް އެފަދަ ގިނަ ޝަކުވާތަކެއް ވަނީ ލިބިފައެވެ. ނޭނގި ރީ-ރެޖިސްޓާކޮށްފައިވާކަމަށް ބުނެ ޝަކުވާ ހުށައެޅި ގިނަ މީހުންނަކީ ރިޔާސީ އިންތިޚާބުގެ ފުރަތަމަ ބުރުގައި ޑރ މުހައްމަދު މުއިއްޒަށް ވޯޓުދެއްވި ޕީޕީއެމްގެ އާންމު މެމްބަރުންކަން ފާހަގަކޮށްލެވެއެވެ. 

އެގޮތުން "ވޮއިސް" އަށް މައުލޫމާތު ހިއްސާކުރި މީހަކު ބުނި ގޮތުގައި ރީ-ރެޖިސްޓާކުރުމަށް ފޯމު ހުށައަޅައިގެން ޕީޕީއެމްގެ ބައެއްގެ ގޮތުގައި ދެމީހަކު ގެއަށް އައިސް ރީ-ރަޖިސްޓާ ކުރުމަށް ފޯމުތަކެއްގައި ސޮއިކުރުވިއެވެ.

އޭރު އެއީ ކޮން ބައެއްކަން ސާފު ނުވާ ކަމަށާއި، އަދި އޮޅުވާލައިގެން ރީ-ރެޖިސްޓްރޭޝަން ކަންކަން ކުރަމުންދާކަމަށް އިދިކޮޅުން ބުނުމުން، އެކަން ކަށަވަރު ކުރުމަށް ބެލެއިރު، މިހާރު ކުރިން ރަޖިސްޓްރީވެފައި އޮތް ތަން، އެހެން ހިސާބަކަށް ބަދަލުވެފައިވާކަމަށް އެމީހާ ކިޔައިދިނެވެ. 

ރިޔާސީ އިންތިޚާބުގެ ފުރަތަމަ ބުރުގައި އެ ފަރާތްތައް ވޯޓުލާފައި ވަނީ މާލެއަށް ނަމަވެސް މިހާރު އޮތީ ހުޅުމާލެއަށް ކަމަށާއި، އެހެންކަމުން ވޯޓުލާން ހުޅުމާލެ ދިއުމަކީ ތަކުލީފަކަށް ވާނެކަމަށް އޭނާ ކިޔައިދިނެވެ. އަދި އެ ފަހުން ރީ-ރަޖިސްޓްރީކުރުމަށް އެ ގެއަށް ބަޔަކީ ޕީޕީއެމްގެ ޓީމެއް ނޫންކަން ވެސް އެނގިފައިވާކަމަށް އެމީހާ ކިޔައިދިނެވެ. 

މިފަދަ އެތައް ކަމެއް އެކި ގޮތްގޮތަށް ދިމާވެގެން އާންމުންގެ ޝަކުވާތައް ވަނީ އިންތިހާއަށް އިތުރުވެފަ އެވެ. 

އޭގެ އިތުރުން އިދިކޮޅުން ތުހުމަތުކުރާގޮތުގައި ސަރުކާރުގެ ކުންފުނިތަކުގައި މަސައްކަތްކުރާ ފަރާތްތަކާއި، މުވައްޒަފުންނަށް ބިރުދައްކައިގެން ވެސް ދުރު ތަންތަނަށް ރީ-ރަޖިސްޓާ ކުރުވަމުންދާ ކަމުގެ ޝަކުވާތައް ވެސް އެ ކޯލިޝަނަށް ވަނީ ލިބެން ފަށާފައެވެ. އަދި މިކަން ކުރަނީ ރިޔާސީ އިންތިޚާބުގެ ދެވަނަ ބުރު ގަޑުބަޑުކޮށް އިންތިޚާބު ވަގަށް ނެގުމަށް ކަމަށް ވެސް އިދިކޮޅުން ދަނީ ތުހުމަތުކުރަމުން ނެވެ. 

ނޭނގި ރީ-ރެޖިސްޓްރީ ކޮށްފައިވާ މައްސަލަތައް އިތުރުވެފައިވާއިރު، އިދިކޮޅުން ވަނީ ރަޖިސްޓްރީވެފައިވާ ތަން ބަލާ ކަށަވަރުކުރުމަށް އާންމު ރައްޔިތުންނަށް ގޮވާލައްވާފަ އެވެ. އަދި ނޭނގި ނުވަތަ އޮޅުވާލައިގެން ރީ-ރަޖިސްޓާކޮށްފައިވާ ފަރާތްތަކުން ޝަކުވާއަށް ހުށައަޅާލުމަށް ދުރާލާ ތައްޔާރުވެގެން ތިއްބެވުމަށް ވެސް އިދިކޮޅުން ވަނީ ގޮވާލައްވާފަ އެވެ. 

ވޯޓުލުމަކީ ކޮންމެ ރައްޔިތަކަށް ވެސް ލިބޭ އަސާސީ ހައްގަކަށް ވާއިރު، އެ ހައްޤު ގެއްލުވާލުމުގެ ފުރުސަތު އިލެކްޝަންސް ކޮމިޝަނުން ނުދިނުމަށް އިދިކޮޅުން ވަނީ އިލްތިމާސްކުރައްވާފަ އެވެ. އަދި ފަރުދީ ޒިންމާ އަދާކުރައްވާ ރިޔާސީ އިންތިޚާބާއި މެދު ރައްޔިތުން ފާރަވެރިވެ ތިއްބެވުމަށް ވެސް އިދިކޮޅުން ވަނީ ގޮވާލާފަ އެވެ.