ރައްޔިތުންގެ މަޖިލީހުގެ މިއަދުގެ ޖަލްސާ ކޯރަމް ހަމަނުވުމުގެ ސަބަބުން މެދުކަނޑާލަން ޖެހިއްޖެއެވެ.

މިއަދުގެ ޖަލްސާ ނުފެށި ލަސްވަމުންދާ ސަބަބު ހާމަ ކުރައްވަމުން މަޖިލީހުގެ ރިޔާސަތު ގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ ޖަލްސާ ނުފެށި ލަސްވަނީ މެންބަރުންގެ އަދަދު ހަމަ ނުވެގެން ކަމަށެވެ. އަދި ސަރުކާރުގެ މައި ޕާޓީ އެމްޑީޕީ އަށް ނިސްބަތްވާ އެޕާޓީގެ ޕާލިމެންޓްރީ ގުރޫޕުގެ މެމްބަރުން މަޖިލީހުގެ ޗެންބަރަށް ނުވަދެ ބޭރުގައި ތިއްބެވި ކަމަށްވެސް އެމަނިކުފާނު ވިދާޅުވިއެވެ. އަދި ދެ މެމްބަރަކު ހަމަވުމުން ޖަލްސާ ކުރިއަށް ދެވޭނެ ކަމަށްވެސް ރައީސް ނަޝިދު ވިދާޅުވިއެވެ.

ނަމަވެސް ތަކުރާރު ކޮށް ވިދާޅުވުމުންވެސް އެބޭފުޅުން ޖަލްސާ ކުރާ ޗެންބަރަށް ވަދެ ވަޑައި ނުގަތުމުން ކޯރަމް ހަމަވެފައި ނުވާތީ ޖަލްސާ ވަނީ އިރުކޮޅަކަށް މެދު ކަނޑާލާފައެވެ. 

އެއަށްފަހު އަލުން ފެއްޓެވި އިރުވެސް ކޯރަމް ހަމަ ނުވާތީ އެކަމާއި ގުޅޭގޮތުން ވާހަކަދައްކަވަމުން ރައީސް މުހައްމަދު ނަޝީދު ވިދާޅުވީ، ޖަލްސާގެ އެޖެންޑާއަ މެދު ބައެއް މެންބަރުން ޝަކުވާ ހުށަހަޅާފައިވާ ކަމަށެވެ. އެހެން ނަމަވެސް، މިއަދުގެ އެޖެންޑާގައި މަޖިލީހުގެ ގަވާއިދާއި ޚިލާފަށް އެއްވެސް ކަމެއް ހިމަނުއްްވާފައި ނުވާނެ ކަމަށް އެމަނިކުފާނު ވިދާޅުވި އެވެ. 

އެގޮތުން މިއަދުގެ އެޖެންޑާގައި އޮތް، ރާއްޖޭގެ މަސްކަނޑުން ގެއްލުނު ބައި ހޯދުމަށް ސަރުކާރަށް ގޮވާލައި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހެޅުއްވި ގަރާރުގެ މައްސަލަ އަކީ މެއި މަހުގެ 22 ވަނަ ދުވަހު ހުށަހެޅުއްވި މައްސަލައެއް ކަން އެމަނިކުފާނު ފާހަގަކުރެއްވިއެވެ. އެހެންކަމުން އެ މައްސަލަ ދެން އިތުރަށް ލަސް ކުރެވެން ނެތް ކަމަށްވެސް އެމަނިކުފާނު ވިދާޅުވި އެވެ. 

އެއަށްފަހު މަޖިލީހުގެ ޗެމްބަރަށް ވަޑައިގެން ދެއްވުން އެދި އަނެއްކާވެސް މެންބަރުންނަށް ދެންނެވުމުން ވަޑައިގެންފައިނުވާތީ ސައި ގަޑިއަށްފަހު މަޖިލިސް ފެށޭތޯ އަނެއްކާވެސް މަޖިލިސް ވަނީ މެދުކަނޑާލައިފަ އެވެ.