ރައްޔިތުންގެ މަޖިލީހުގެ ޗެމްބަރަކީ ވަކި ބަޔަކު ހިންގާ ސިޔާސީ ޖަގަހައަކަށް ނުހެއްދެވުމަށް މަޖިލީހުގެ ވިލިނގިލީ ދާއިރާގެ މެންބަރު ސައުދު ހުސައިން ގޮވާލައްވައިފި އެވެ. 

ސައުދު މިފަދައިން ގޮވާލައްވާފައި ވަނީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ނުސީދާ ބަހުގެ ހަމަލާތަކެއް އަމާޒުކުރައްވާ ކުރެއްވި ޓްވީޓެއްގަ އެވެ. 

އެގޮތުން ސައުދު ވިދާޅުވީ ވެރިކަމުގެ ދަހިވެތިކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ޒާތީވެ، އެމަނިކުފާނާއި ދޭތެރޭގައި އާންމު ރައްޔިތުންގެ ހިތްތަކުގައި ނަފްރަތު އުފެއްދުމަށް ތަފާތު ގަރާރުތައް މަޖިލީހަށް ހުށައަޅައިގެން ނުވާނެ ކަމަށެވެ. އަދި އެފަދަ ގަރާރުތައް ކުރިއަށް ގެންދިއުމަށް މަޖިލީހުގެ ޗެމްބަރުން ވެސް ޖާގަދީގެން ނުވާނެ ކަމަށެވެ. 

Advertisement

ރައްޔިތުންގެ މަޖިލީހުގެ ޗެމްބަރަކީ ވަކި ބައެއްގެ ސިޔާސީ ޖަގަހަ ހިންގާ އުސޫލުން ހިންގާ ތަނަކަށް ނަހައްދަވާ ސިޔާސީ ގޮތުން ޚިޔާލު ތަފާތުވާ ވާހަކަތައް ދައްކާ ޖަގަހަ ޖަލްސާތައް ކުރިއަށް ގެންދަވަން ބޭނުންފުޅުވާނަމަ އަމިއްލަ ސިޔާސީ ޕާޓީގެ ޖަގަހައިގައި އެކަން ކުރެއްވުމަށް ސައުދު ވަނީ ގޮވާލައްވާފަ އެވެ. 

އެމްޑީޕީގައި ތިއްބެވުމަށްފަހު މަޖިލީހުގެ ރައީސް މުހައްމަދު ނަޝީދަށް ތާއީދުކުރައްވާ ގިނަ މެމްބަރުންތަކެއް ޕާޓީން ވަކިވުމާއި ގުޅިގެން، އުފެދުނު ކޯޅުން ގަނޑާއެކު މަޖިލީހުގެ މަސައްކަތްތައް ވަނީ ކުރިއަށް ނުގެންދެވި ހުއްޓިފައެވެ.

އެގޮތުން މަޖިލީހުގެ ރައީސް އަދި ނައިބު ރައީސްގެ އިތުބާރު ނެތްކަމުގެ ވޯޓު އެއްފަހަރާ މަޖިލީހަށް ވައްދާ، އެ މަޤާމުތަކުން އެމްޑީޕީގައި ތިއްބެވުމަށްފަހު ވަކިވެވަޑައިގެން ނަޝީދާއި އީވާ ދުރުކުރުމަށް އެމްޑީޕީގެ މެމްބަރުން ދަނީ މަސައްކަތް ކުރަމުންނެވެ. 

އެމްޑީޕީގެ ތެރޭގައި އުފެދުނު ކޯޅުންތަކާއެކު ޕާޓީން ނިކުމެ ވަޑައިގެން ނަޝީދު ވަނީ އެމްޑީޕީ ރޫޅާލާނެކަމުގެ އިންޒާރުދެއްވާ، މި ރިޔާސީ އިންތިޚާބުގައި އެމްޑީޕީގެ ގިނަ ވޯޓުތަކަށް "ދަ ޑިމޮކްރެޓްސް" އަށް ހޯއްދަވާފަ އެވެ. 

ރިޔާސީ އިންތިޚާބުގެ ދެވަނަ ބުރު ކުރިމަތީގައި އޮއްވާ "ދަ ޑިމޮކްރެޓްސް" އިން ނިޒާމީ ވޯތެއް ނެގުމަށް މަސައްކަތް ކުރަމުންދާއިރު، މިހާރު އެކަމާއި ގުޅޭގޮތުން މަޖިލީހަށް ހުށައަޅާފައިވާ ގަރާރުގެ މަސައްކަތް އެމްޑީޕީން އަވަސްކުރުމަށް އެއްބަސްވެފައިވާކަން ނަޝީދު ވަނީ ހާމަކުރައްވާފަ އެވެ.