ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލު ކުރަން ޑިމޮކްރެޓްސްއިން ހުށަހެޅި ގަރާރު، ވެރިކަންކުރާ އެމްޑީޕީގެ މެންބަރުންގެ ތާއީދާއެކު ރައްޔިތުންގެ މަޖިލީހުން ބަލައިގެންފިއެވެ.

ބަރުލަމާނީ ނިޒާމު ރާއްޖެއަށް ގެންނަން އެންމެ ބޮޑަށް ބާރުއަޅުއްވަމުންދާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ޕާޓީ، ޑިމޮކްރެޓްސްގެ ފަރާތުން ހުޅުދޫ ދާއިރާގެ މެންބަރު އިލްޔާސް ލަބީބު މަޖިލީހަށް ހުށަހެޅުއްވި އެ ގަރާރު މިއަދުގެ ޖަލްސާގައި ފާސްކޮށްފައިވަނީ މަޖިލީހަށް ހާޒިރުވެވަޑައިގެން ތިއްބެވި 37 މެންބަރުންގެ ތެރެއިން 35 މެންބަރުންގެ ތާއީދާއެކުގައެވެ. 

މި ގަރާރު މަޖިލީޙުން ބަލައި ގަތުމަށް ބޭނުންވަނީ 18 މެންބަރުންގެ ވޯޓެވެ.

Advertisement

މެންބަރު އިލްޔާސްގެ އެ ގަރާރު ބަލައިގަތުމާއެކު ޑިމޮކްރެޓްސްގެ ޕާލަމަންޓްރީ ގްރޫޕްގެ ލީޑަރު އަލީ އާޒިމް ހުށަހެޅުއްވީ އެ ގަރާރު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީއަށް ހުށަހެޅުއްވުމަށެވެ. އަދި އެކަމަށް ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒް ތާއިދު ކުރެއްވިއެވެ.

އެގޮތުން އެ ގަރާރު ގަރާރު މުޅި މަޖިލީހުގެ ކޮމިޓީއަށް ގެންދަން ނެގި ވޯޓުގައި ބައިވެރިވި 34 މެމްްބަރުންގެ ވޯޓާއެކު ގަރާރު ވަނީ މުޅި މަޖިލީހުގެ ކޮމިޓީއަށް ފޮނުވާފައެވެ.

އެއަށްފަހު މާދަމާ އެ ގަރާރުގެ މައްސަލަ މުޅި މަޖިލީހުގެ ކޮމިޓީގައި ފަށާނެ ކަމަށް ވިދާޅުވެ ރައީސް މުހައްމަދު ނަޝީދު ވަނީ މިއަދު ޖަލްސާ ނިންމާލައްވާފަވެ.