ރައްޔިތުންގެ މަޖިލީހުގެ މިއަދުގެ މަސައްކަތް ވެސް، މެންބަރުން ހަމަނުވުމުގެ ސަބަބުން ކުރިއަށް ނުގެންދެވި، ޖަލްސާ މެދުކަނޑާލައިފިއެވެ.

ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލު ކުރަން ޑިމޮކްރެޓްސްއިން ހުށަހެޅި ގަރާރު، ވެރިކަންކުރާ އެމްޑީޕީގެ މެންބަރުންގެ ތާއީދާއެކު ރައްޔިތުންގެ މަޖިލީހުން އިއްޔެ ވަނީ ބަލައިގެންފައެވެ. 

ބަރުލަމާނީ ނިޒާމު ރާއްޖެއަށް ގެންނަން އެންމެ ބޮޑަށް ބާރުއަޅުއްވަމުންދާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ޕާޓީ، ޑިމޮކްރެޓްސްގެ ފަރާތުން ހުޅުދޫ ދާއިރާގެ މެންބަރު އިލްޔާސް ލަބީބު މަޖިލީހަށް ހުށަހެޅުއްވި އެ ގަރާރު މިއަދުގެ ޖަލްސާގައި ފާސްކޮށްފައިވަނީ މަޖިލީހަށް ހާޒިރުވެވަޑައިގެން ތިއްބެވި 37 މެންބަރުންގެ ތެރެއިން 35 މެންބަރުންގެ ތާއީދާއެކުގައެވެ. 

މެންބަރު އިލްޔާސްގެ އެ ގަރާރު ބަލައިގަތުމާއެކު ޑިމޮކްރެޓްސްގެ ޕާލަމަންޓްރީ ގްރޫޕްގެ ލީޑަރު އަލީ އާޒިމް ހުށަހެޅުއްވީ އެ ގަރާރު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީއަށް ހުށަހެޅުއްވުމަށެވެ. އަދި އެކަމަށް ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒް ތާއިދު ކުރެއްވިއެވެ.

އެގޮތުން އެ ގަރާރު ގަރާރު މުޅި މަޖިލީހުގެ ކޮމިޓީއަށް ގެންދަން ނެގި ވޯޓުގައި ބައިވެރިވި 34 މެމްްބަރުންގެ ވޯޓާއެކު ގަރާރު ވަނީ މުޅި މަޖިލީހުގެ ކޮމިޓީއަށް ފޮނުވާފައެވެ.

މިއަދުގެ މަޖިލީހުގެ ޖަލްސާގައި، މުޅި މަޖިލިސް ކޮމިޓީއަށް ގޮސް، އެ ގަރާރާމެދު މަޝްވަރާކުރުން ކުރިއަށް ގެންދަން ނިންމާފައިވާއިރު، ޖަލްސާ ފަށްޓަވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، މިއަދު ކުރަމުން ދާނެ މަސައްކަތަކީ ނިޒާމް ބަދަލުކުރުމާ ގުޅޭ ގަރާރުގެ މަސައްކަތް ކަމަށާ، އެހެން ކަމުން އެ މަސައްކަތަށް މުޅި މަޖިލިސް ވަނީ ކޮމިޓީއަކަށް ގޮސްފައެވެ.

އެއަށްފަހު ނަޝީދު ވިދާޅުވީ ރައްޔިތުންގެ މަޖިލީހުގެ ގަވައިދު ބުނާ ގޮތުން ނަމަ މުޅި މަޖިލިސް އެކުގައި ކޮމިޓީއަކަށް ހިނގައްޖެ ނަމަ، މަޖިލީހުގެ ތިންބައިކުޅަ އެއްބައި މެންބަރުން ހާޒިރުވެ ތިބެން ޖެހޭނެއެވެ. އެއީ 29 މެންބަރުންނެވެ. ނަމަވެސް މިއަދު މަޖިލިހަށް އަދި ވަޑައިގަތީ 18 މެންބަރުން ކަމުން، ކޮމިޓީގެ މަސައްކަތް ފެށޭނީ މެންބަރުން ހަމަވުމުން ކަމަށް ނަޝީދު ވިދާޅުވިއެވެ.

އެހެންކަމުން މެންބަރުން ހަމަވޭތޯ މަޑު ކުރެއްވުމަށްފަހު، ނަޝީދު ވިދާޅުވީ، ސިޔާސީ ޕާޓީތަކުގެ ޕާލިމެންޓްރީ ގްރޫޕްތަކުގެ ލީޑަރުންގެ މެދުގައި، ރައްޔިތުންގެ މަޖިލީހަށް މެންބަރުން ވަޑައިގަތުމާ ގުޅޭ ގޮތުން މަޝްވަރާ ކުރައްވަމުންދާ ކަމަށެވެ. އެހެންކަމުން، ޕާލިމެންޓްރީ ގްރޫޕްތަކުގެ ލީޑަރުންނަށް ވަގުތު ދިނުމުގެ ގޮތުން ޖަލްސާ މެދުކަނޑާލައްވަން ނަޝީދު ނިންމެވީއެވެ.