ރިޔާސީ އިންތިޚާބުގެ ދެވަނަ ބުރުގައި އެއްވެސް ބޭފުޅަކަށް ތާއީދު ނުކުރައްވަން، މި އިންތިޚާބުގައި އަމިއްލަގޮތުން ވާދަކުރެއްވި ފާރިސް މައުމޫނު ނިންމަވައިފި އެވެ. 

ރިޔާސީ އިންތިޚާބުގެ ފުރަތަމަ ބުރުގެ ނަތީޖާއަށް ފަހު ފާރިސް ވަނީ ދެވަނަ ބުރުގައި ވާދަކުރައްވާ ފަރާތްތަކުގެ މެނިފެސްޓޯއަށް އިތުރުކުރުމަށް ބައެއް ކަންތައްތައް ހުށައަޅުއްވާފަ އެވެ.

އެގޮތަށް ހުށައެޅުއްވީ ބުރަތަމަ ބުރުގައި އެއްވެސް ބަޔަކަށް 50 އިންސައްތަ ނުލިބުމުން، ކޮންމެ ބައެއްގެ މެނިފެސްޓޯގައި ވެސް ރައްޔިތުންނަށް އެންމެ ގަބޫލު ނުކުރެވޭ ކަންތައްތަކެއް ހުުރުމުންކަމަށް ދެކިވަޑައިގެން އެކަންކަން ބަދަލުކޮށް ރައްޔިތުންނަށް އެންމެ ފައިދާކުރަނިވި ސިޔާސަތުތަކެއް އެކުލަވާލުމަށް ކަމަށް ފާރިޝްވިދާޅުވި އެވެ. 

ފާރިޝް ވިދާޅުވީ އެމަނިކުފާނުގެ ފަހަތްޕުޅުގައި މިހާރު ތިއްބެވި ފަރާތްތަކާއި، އަދި އެމަނިކުފާނާއި ގުޅިވަޑައިގެން މަސައްކަތް ކުރައްވަމުން ގެންދަވާ ފަރާތްތަކާއި އެކު ކުރެވުނު މަޝްވަރާތަކުން، އެބޭފުޅުން ގައުމަށް ގެނައުމަށް ވިސްނަވާ ހެޔޮ ބަދަލު ބޮޑު ސިޔާސީ ޕާޓީއަކުން އިންތިޚާބުވާ ކެންޑިޑޭޓަކަށް ގެނެސްދެވިދާނެކަމަށް ދެކެވަޑައި ނުގަންނަވާ ކަމަށެވެ. 

ސިޔާސީ ޕާޓީތައް ހަރަކާތްތެރިވާ ގޮތަށް ބަލާއިރު، އަދި ޕާޓީތަކުން ކުރާ ވެރިކަމަށް ބަލާއިރު، ހުރިހާ ރައްޔިތުންގެ މަސްލަހަތަށްވުރެ ޕާޓީގެ މަސްލަހަތު އިސްކުރެވޭތަން ފެންނަކަމަށާއި، އެ އުސޫލުން ކަން ހިނގާނަމަ ރާއްޖެއަށް އެބޭފުޅުން ގެންނަން ބޭނުންވާ އިސްލާހީ ބަދަލު ނުގެނެވޭކަމަށް ދެކިވަޑައިގަންނަވާކަމަށް ފާރިޝް ވިދާޅުވި އެވެ. 

އެއާއެކު އޭނާ ވިދާޅުވީ އެފަދަ ސަބަބުތައް ހުރުމުން ރިޔާސީ އިންތިޚާބުގެ ދެވަނަ ބުރުގައި އެއްވެސް ބޭފުޅަކަށް ތާއީދު ނުކުރުމަށް އެމަނިކުފާނު ނިންމަވާފައިވާ ކަމަށެވެ. 

ފާރިސް ވިދާޅުވީ ރިޔާސީ އިންތިޚާބުގެ ދެވަނަ ބުރުގައި ވަކި ބަޔަކަށް ތާއީދުނުކުރި ނަމަވެސް އެބޭފުޅުން ފަށާފައިވާ މަސައްކަތްތައް ހުއްޓާނުލައްވާނެ ކަމަށެވެ. އަދި މިހާރު ވެސް ގިނަ ބަޔަކަށް އެބޭފުޅުންގެ ސިޔާސަތުތައް ގަބޫލުކުރެވޭތީ ގުޅިވަޑައިގަންނަމުންދާ ކަމަށާއި، އެބޭފުޅުންނާއި އެކު އެ މަސައްކަތް ފުޅާކުރެއްވުމަށް މަސައްކަތްޕުޅު ކުރައްވާނެކަމަށް ފާރިޝް ވިދާޅުވި އެވެ.