ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރަން ރައްޔިތުންގެ ފެންނަ ނުފެންނަ ވޯޓެއް ނަގަން ގޮވާލައި ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި ގަރާރު، ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން ފާސްކޮށްފި އެވެ.

ބަރުލަމާނީ ނިޒާމު ރާއްޖެއަށް ގެންނަން އެންމެ ބޮޑަށް ބާރުއަޅުއްވަމުންދާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ޕާޓީ، ޑިމޮކްރެޓްސްގެ ފަރާތުން ހުޅުދޫ ދާއިރާގެ މެންބަރު އިލްޔާސް ލަބީބު މަޖިލީހަށް ހުށަހެޅުއްވި އެ ގަރާރު މަޖިލީހަށް ބަލައިގަންނަން އިއްޔެގެ ޖަލްސާގައި ފާސްކޮށްފައިވަނީ މަޖިލީހަށް ހާޒިރުވެވަޑައިގެން ތިއްބެވި 37 މެންބަރުންގެ ތެރެއިން 35 މެންބަރުންގެ ތާއީދާއެކުގައެވެ. 

މެންބަރު އިލްޔާސްގެ އެ ގަރާރު ބަލައިގަތުމާއެކު ޑިމޮކްރެޓްސްގެ ޕާލަމަންޓްރީ ގްރޫޕްގެ ލީޑަރު އަލީ އާޒިމް ހުށަހެޅުއްވީ އެ ގަރާރު ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީއަށް ހުށަހެޅުއްވުމަށެވެ. އަދި އެކަމަށް ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒް ތާއިދު ކުރެއްވިއެވެ.

Advertisement

އެގޮތުން އެ ގަރާރު ގަރާރު މުޅި މަޖިލީހުގެ ކޮމިޓީއަށް ގެންދަން ނެގި ވޯޓުގައި ބައިވެރިވި 34 މެމްްބަރުންގެ ވޯޓާއެކު ގަރާރު ވަނީ މުޅި މަޖިލީހުގެ ކޮމިޓީއަށް ފޮނުވާފައެވެ.

އެހެންކަމުން މިއަދުގެ މަޖިލީހުގެ ޖަލްސާގައި އޮތީ، އެ ގަރާރާއި ގުޅޭގޮތުން މުޅި މަޖިލީހުގެ ކޮމިޓީގައި މަޝްވަރާކޮށް އެއަށް އިސްލާހު ހުށަހެޅުމެވެ. އެ މަސައްކަތަށްފަހު ގަރާރަށް ވޯޓަށް ހުށަހެޅުމުން، މަޖިލީހަށް ހާޒިރުވެވަޑައިގެން ތިއްބެވި 35 މެންބަރުންގެ ވޯޓާއެކު، އޮކްޓޯބަރ 30 ވަނަ ދުވަހު ފެންނަ ނުފެންނަ ވޯޓެއް ނަގަން ނިންމައި އެ ގަރާރު ވަނީ ފާސްކޮށްފައެވެ. 

މިއަދު އެ ގަރާރު މުޅި މަޖިލީހުން ފާސްކުރުމުން ދެން އޮންނާނީ މަޖިލީހުގެ ތަޅުމުގައި ބަހުސްކޮށް ތަޅުމުން ފާސްކުރުމެވެ.