ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ މައްޗަށް އާރަށު މުއާމަލާތާއި ގުޅުވާ އިއްވާފައިވާ ހުކުމް އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާއިރު، އެ މައްސަލައިގެ އަޑުއެހުމެއް ބުރާސްފަތި ދުވަހަށް ތާވަލުކޮށްފި އެވެ. 

އެކަން ރައީސް ޔާމީނުގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވަނީ ކަށަވަރުކޮށްދެއްވާފަ އެވެ. މިއީ މި މައްސަލައިގައި ބާއްވާ އެންމެ ފަހު އަޑުއެހުމެވެ. މީގެކުރިން ވަނީ މި މައްސަލައާއި ގުޅިގެން 8 އަޑުއެހުން ބާއްވާފަ އެވެ. 

ޑރ ޖަމީލު ވިދާޅުވީ ބުރާސްފަތި ދުވަހު އަޑުއެހުން ކުރިއަށް ގެންދެވިއްޖެ ނަމަ ދެން އޮންނާނީ އެ މައްސަލައިގެ ހުކުމްކުރުން ކަމަށެވެ.

Advertisement

އާރަށު މައްސަލައިގެ އަޑުއެހުންތައް ނިމުމަކާއި ހަމަޔަށް ގޮސްފައިވަނިކޮށް އެކި ސަބަބުތަކާއި ހުރެ އަޑުއެހުންތައް މެދުކެނޑި ގިނަ ދުވަސްތަކެއް ވެފައިވާއިރު، އެއީ ރައީސް ޔާމިނުގެ އިންސާފަށް ހުރަސްއެޅިގެން ދިއުންކަން ފާހަގަކޮށް ޤާނޫނީ ވަކީލުން ވަނީ ބޮޑެތި ކަންބޮޑުވުންތަކެއް ފާޅުކޮށްފަ އެވެ. 

އޭގެ އާރަށު އިސްތިއުނާފު ދިގުލައިގެންދާތީ އޮތް ކަންބޮޑުވުންތަކާއެކު އިދިކޮޅު ކޯލިޝަންގެ ލީޑަރުން ވަނީ ހައިކޯޓަށް ވެސް ވަޑައިގެންފައެވެ. 

އިދިކޮޅުން ތުހުމަތުކުރާ ގޮތުގައި އާރަށު މުއާމަލާތާއި ގުޅުވާ ރައީސް ޔާމިނުގެ މައްޗަށް ކޮށްފައިވަނީ ނުހައްގު ހުކުމެކެވެ. އެއީ ސިޔާސީ ގޮތުން ނުފޫޒު ފޯރުވައިގެން ފާސިގުންގެ ހެކިބަސް ބޭނުންކޮށްގެން އަދި ފަނޑިޔާރުންނަށް ރިޝްވަތުހުށައަޅައިގެން އިއްވާފައިވާ ހުކުމެއްކަމަށް އިދިކޮޅުން ދަނީ ބުނަމުންނެވެ. 

އޭގެ އިތުރުން ރައީސް ޔާމިނުގެ ފަރާތްޕުޅުން އާރަށު ހުކުމް އިސްތިއުނާފުކުރިތާ 7 މަސްދުވަސް ވެގެންދިޔައިރު މައްސަލައާއި މެދު ގޮތެއް ނުނިންމާ ދިގުދަންމާލާފައިވަނީ ވެސް ސަރުކާރުން ނުފުޒު ފޯރުވައިގެން ކަމަށާއި އެއީ ގަސްދުގައި ރައީސް ޔާމިނަށް އަނިޔާވެރިވުމަށް ސަރުކާރުން ކުރަމުންދާ ކަމެއްކަމަށް އިދިކޮޅުން ވަނީ ތުހުމަތުކޮށްފަ އެވެ. 

ރައީސް ޔާމިނަކީ މައުސޫމު ބޭފުޅެއްކަމަށާއި، މިނިވަންކަމާއި އިންސާފުވެރިކަމާއެކު އެ މައްސަލަ ބައްލަވައިފި ނަމަ ރައީސް ޔާމީން މިނިވަންވެވަޑައިގަންނަވާނެކަމުގެ ފުރިހަމަ ޔަގީންކަން އޮތްކަމަށް އެމަނިކުފާނުގެ ގާނޫނީ ވަކީލުންވެސް ގެންދަވަނީ ވިދާޅުވަމުން ނެވެ.