ރިޔާސީ އިންތިޚާބުގެ ދެވަނަ ބުރުގެ ވޯޓުލުމަށް ކުޑަތަން ވެފައި ވަނިކޮށް، ވެރިކަމުގެ ނިޒާމު ބަދަލުކުރުމުގެ ވާހަކަ ދައްކަވަނީ ވެރިކަމަށް ޝައުގުވެރިކަން ބޮޑު ސިޔާސީ ލީޑަރުން ޤައުމީ މަސްލަހަތު ނަގާލުމުގެ މަޤްސަދުގައި ކަމަށް ޕީއެންސީގެ ޕީޖީ ލީޑަރު އަދި އެ ޕާޓީގެ ނައިބު ރައީސް އާދަމް ޝަރީފު އުމަރު ވިދާޅުވެއްޖެ އެވެ.

އާދަމް ޝަރީފު މިފަދައިން ވިދާޅުވެފައި ވަނީ ރ ހުޅުދުއްފާރުގައި ބޭއްވި ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ. 

އެގޮތުން އާދަމް ޝަރީފު ވިދާޅުވެފައި ވަނީ ރިޔާސީ އިންތިޚާބުގެ ދެވަނަ ބުރަކަށް ގޮސްފައިވަނިކޮށް ނިޒާމީ ވޯޓެއް ނެގުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އެއްބަސްވެވަޑައިގަތީ ހަގީގައުގައި ވެސް މި އިންތިޚާބު ކާމިޔާބު ނުވާނެކަން އެމަނިކުފާނަށް ވެސް ޔަގީންކުރެވޭތީ ކަމަށެވެ. 

ނިޒާމީ ވޯޓެއް ނެގުމަށް ސިޔާސީ ލީޑަރުން މަސައްކަތް ކުރައްވަނީ ފަހަރެއްގައި ރައްޔިތުންނަށް ހެޔިއެދޭތީ ނޫން ކަމަށާއި، އެމީހުންގެ ވެރިކަމުގެ ޝައުގުވެރިކަން ބޮޑުވެ ގައުމީ މަސްލަހަތު ގެއްލުވާލާފައި ނަމަވެސް، ވެރިކަން ކުރައްވަން ބޭނުންފުޅުވާތީކަމަށް އާދަމް ޝަރީފު ވިދާޅުވި އެވެ. 

އާދަމް ޝަރީފު ވިދާޅުވީ މި ސަރުކާރުން ރިޔާސީ އިންތިޚާބުގެ ވޯޓު އޮޅުވާލުމަށް ވެސް މަސައްކަތް ކުރާނެކަމަށެވެ. އެގޮތުން ވެރިކަމުގައި ދެމިތިބުމަށް އެމްޑީޕީން ހީލުންތެރި ރޭވުންތައް ރާވާނެކަމާއި ދޭތެރޭ ޝައްކެތް ނެތް ކަމަށާއި، ރައްޔިތުން ވަރަށް ބޮޑަށް އެކަމަށް ފާރަވެރި ތިއްބެވުމަށް އާދަމް ޝަރީފް ވަނީ އެދިވަޑައިގެންފަ އެވެ. 

އޭނާ ވިދާޅުވި ގޮތުގައި ޕްރޮގްރެސިވް ކޮންގްރެސް ކޯލިޝަންގެ ވެރިކަމެއް އުފެއްދުމަށް ރިޔާސީ އިންތިޚާބުގެ ދެވަނަ ބުރު ބޮޑު ތަފާތަކުން ޑރ މުއިއްޒަށް ކާމިޔާބުކޮށްދިނުމަކީ މުހިންމު ކަމެކެވެ.

ރައްޔިތުން އެދޭ ވެރިކަމެއް ނެގެހެއްޓޭނީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ކަމަށާއި، އެ ވެރިކަން އުފެއްދުމަށް ރައްޔިތުން ކުރިއަށް މި އޮތް ދުވަސްތަކުގައި ވަރަށް ގަދައަޅައި މަސައްކަތްކޮށްދެއްވުމަށް އާދަމް ޝަރީފު ވަނީ އެދިވަޑައިގެންފަ އެވެ.