މިއަދު މެންދުރު ފަހު 2 ޖަހާއިރު ބޭއްވުމަށް ތާވަލު ކުރެވިފައިވާ، ކުރީގެ ރައީސް ޔާމީން އަބްދުލްގައްޔޫމްގެ ފަރާތްޕުޅުން އިސްތިއުނާފު ކުރައްވާފައިވާ މައްސަލައިގެ އަޑު އެހުން ކެންސަލް ކޮށްފިއެވެ. 

ހައިކޯޓުން ދާދި ދެންމެ އަކު ބުނީ މިއަދުގެ އަޑު އެހުން ކެންސަލް ކުރެވިފައިވަނީ ޕްރޮސިކިއުޓަރ ޖެނެރަލް އޮފީހުގެ އެދިވަޑައިގަތުމަށް ކަމަށެވެ. 

މިއަދު ބޭއްވުމަށް ހަމަޖެހިފައި އޮތީ މި މައްސަލައިގައި ބާއްވާ އެންމެ ފަހު އަޑުއެހުމެވެ. މީގެކުރިން ވަނީ މި މައްސަލައާއި ގުޅިގެން 8 އަޑުއެހުން ބާއްވާފަ އެވެ. 

Advertisement

މިއަދުގެ އަޑުއެހުމާއި ގުޅޭގޮތުން އިއްޔެ ރައީސް ޔާމީންގެ އިސް ވަކީލު ޑރ މުހައްމަދު ޖަމީލު ވިދާޅުވީ މިއަދުގެ އަޑުއެހުން ކުރިއަށް ގެންދެވިއްޖެ ނަމަ ދެން އޮންނާނީ އެ މައްސަލައިގެ ހުކުމްކުރުން ކަމަށެވެ.

އާރަށު މައްސަލައިގެ އަޑުއެހުންތައް ނިމުމަކާއި ހަމަޔަށް ގޮސްފައިވަނިކޮށް އެކި ސަބަބުތަކާއި ހުރެ އަޑުއެހުންތައް މެދުކެނޑި ގިނަ ދުވަސްތަކެއް ވެފައިވާއިރު، އެއީ ރައީސް ޔާމިނުގެ އިންސާފަށް ހުރަސްއެޅިގެން ދިއުންކަން ފާހަގަކޮށް ޤާނޫނީ ވަކީލުން ވަނީ ބޮޑެތި ކަންބޮޑުވުންތަކެއް ފާޅުކޮށްފަ އެވެ. 

އޭގެ އާރަށު އިސްތިއުނާފު ދިގުލައިގެންދާތީ އޮތް ކަންބޮޑުވުންތަކާއެކު އިދިކޮޅު ކޯލިޝަންގެ ލީޑަރުން ވަނީ ހައިކޯޓަށް ވެސް ވަޑައިގެންފައެވެ. 

އިދިކޮޅުން ތުހުމަތުކުރާ ގޮތުގައި އާރަށު މުއާމަލާތާއި ގުޅުވާ ރައީސް ޔާމިނުގެ މައްޗަށް ކޮށްފައިވަނީ ނުހައްގު ހުކުމެކެވެ. އެއީ ސިޔާސީ ގޮތުން ނުފޫޒު ފޯރުވައިގެން ފާސިގުންގެ ހެކިބަސް ބޭނުންކޮށްގެން އަދި ފަނޑިޔާރުންނަށް ރިޝްވަތުހުށައަޅައިގެން އިއްވާފައިވާ ހުކުމެއްކަމަށް އިދިކޮޅުން ދަނީ ބުނަމުންނެވެ. 

އޭގެ އިތުރުން ރައީސް ޔާމިނުގެ ފަރާތްޕުޅުން އާރަށު ހުކުމް އިސްތިއުނާފުކުރިތާ 7 މަސްދުވަސް ވެގެންދިޔައިރު މައްސަލައާއި މެދު ގޮތެއް ނުނިންމާ ދިގުދަންމާލާފައިވަނީ ވެސް ސަރުކާރުން ނުފުޒު ފޯރުވައިގެން ކަމަށާއި އެއީ ގަސްދުގައި ރައީސް ޔާމިނަށް އަނިޔާވެރިވުމަށް ސަރުކާރުން ކުރަމުންދާ ކަމެއްކަމަށް އިދިކޮޅުން ވަނީ ތުހުމަތުކޮށްފަ އެވެ. 

ރައީސް ޔާމިނަކީ މައުސޫމު ބޭފުޅެއްކަމަށާއި، މިނިވަންކަމާއި އިންސާފުވެރިކަމާއެކު އެ މައްސަލަ ބައްލަވައިފި ނަމަ ރައީސް ޔާމީން މިނިވަންވެވަޑައިގަންނަވާނެކަމުގެ ފުރިހަމަ ޔަގީންކަން އޮތްކަމަށް އެމަނިކުފާނުގެ ގާނޫނީ ވަކީލުންވެސް ގެންދަވަނީ ވިދާޅުވަމުން ނެވެ.