ދިވެހިރާއްޖޭގެ ވެރިކަމުގެ ނިޒާމު އޮންނާނީ ރިޔާސީ ނިޒާމަކަށްތޯ ނުވަތަ ބަރުލަމާނީ ނިޒާމަކަށްތޯ ބެލުމަށްޓަކައި ނަގާ ނިޒާމާ ގުޅޭ ގޮތުން ފެންނަ ނުފެންނަ ވޯޓެމު އަންނަ މަހު 30ގެ ކުރިން ނެގުމަށް އެންގޭނީ، އެކަމާ ގުޅޭ ގޮތުން ނިންމާގޮތް ރައްޔިތުންގެ މަޖިލީހުގެ ބޮޑު މެޖޯރިޓީއާ އެކު ފާސްކޮށް ތަސްދީގު ކުރުމަށް ފަހު އެ މަނިކުފާނަށް ފޮނުވުމުން، އިލެކްޝަންސް ކޮމިޝަން (އީސީ)އަށް ހުށަހެޅުމަށް ފަހުގައި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ޞާލިހު މިފަދައިން ވިދާޅުވީ ރިޔާސީ އިންތިހާބުގެ ދެވަނަބުރުގެ ކެމްޕެއިންގައި މާލޭގެ ބައެއް ގެތަކަށް ޒިޔާރަތްކުރެއްވުމަށް ނޫސްވެރިންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ނޫސްވެރިންނާއި ވާހަކަ ދައްކަވަމުން ރައީސް ވިދާޅުވީ، އެ ގަރާރު، މަޖިލީހުގެ އިދާރާއިން އެ މަނިކުފާނަށް ފޮނުވާފައި އޮތް ކަމަށް ވާނަމަ، އެކަން ކުރިއަށް ގެންދިޔުމަށް އީސީއަށް އަންގަވާނެ ކަމަށެވެ.
އަޅުގަނޑަށް އެނގިފައި އޮތްގޮތުން، ގާނޫނުއަސާސީއަށް ބަދަލެއް ގެންނަންޏާ އެބައޮތް ޕްރޮސެސްއެއް ކުރިއަށް ގެންދަން ޖެހޭ. (މިހާރު އޮތް ގޮތަކީ) މަޖިލީހުން ވަކި ގޮތެއް ނިންމުމަށް ފަހު އަޅުގަނޑާ ހަމައަށް އައުމުން ވޯޓަކަށް ދިޔުމަށް ކުރަން ޖެހޭ ކަންކަން އީސީގައި އެދިގެން ކުރުން
ރައީސް އިބްރާހިމް މުހައްމަދު ޞާލިހް
މީގެ އިތުރުން ރައީސް ވިދާޅުވީ، ނިޒާމު ބަދަލުކުރުމާ ގުޅޭ ވޯޓަކީ ޑިމޮކްރެޓްސްގެ މެމްބަރުން އެމްޑީޕީއިން ވަކި ނުވާއިރު ވެސް ޕާޓީ ތެރޭގައި ދެކެވިފައިވާ ވާހަކަތަކެއް ކަމަށާއި އެއީ މިއަދަކު ފެންމަތިވި، އާ ވާހަކަތަކެއް ނޫންކަމަށެވެ. އަދި އެއީ އެ މެމްބަރުން އެހާ ބޮޑަށް އެދޭ ކަމަކަށް ވާނަމަ ރައްޔިތުންގެ ވިސްނުން ހުރިގޮތް ބެލުމަށްފަހު ރިޔާސީ އިންތިހާބަށް ފަހު ވޯޓަކަށް ދިޔުމަކީ މާބޮޑު މައްސަލައެއް ނޫން ކަމަށް އޭރު ވެސް ވިދާޅުވެފައިވާނެ ކަމުގައި ރައީސް ޞާލިޙް ވިދާޅުވިއެވެ.
ރިޔާސީ އިންތިހާބުގެ ދެ ވަނަ ބުރުގެ ކުރިން ނިޒާމު ބަދަލުކުރުމަށް، ފެންނަ ނުފެންނަ ވޯޓެއް ނެގުމަށް އީސީއަށް އެންގުމަށް، ޑިމޮކްރެޓްސްގެ ފަރާތުން ހުށަހަޅައިގެން ރައްޔިތުންގެ މަޖިލީހުން އިއްޔެ ވަނީ ގަރާރެއް ފާސްކޮށްފައެވެ. މި ގަރާރު ފާސްކޮށްފައިވަނީ އެމްޑީޕީގެ މެންބަރުންވެސް ހިމެނޭހެން ވޯޓުގައި ބައިވެރިވެވަޑައިގެންނެވި 35 މެމްބަރުންގެ އިއްތިފާގުންނެވެ. އަދި ފާސްކުރި އެ ގަރާރު މަޖިލީހުގެ އިދާރާއިން މިއަދު ވަނީ އީސީއަށް ފޮނުވާފައެވެ.
މަޖިލީހުން ފާސްކުރި ގަރާރު އެ އިދާރާއިން މިއަދު އީސީއަށް ފޮނުވާފައިވާއިރު، އެކަމާ ގުޅޭގޮތުން އީސީ އިން މިހާރު ވަނީ ގާނޫނީ ލަފާ ހޯދާފަ އެވެ. ނަމަވެސް އިލެކްޝަންސްގެ ނައިބު ރައީސް އަދި ތަރުޖަމާނު އިސްމާއިލް ހަބީބު ވިދާޅުވީ ގާނޫނީ ލަފައަށް ފަހު، އެ ފަދަ ވޯޓެއް ނެގުމުގެ ކުރިން ޖަވާބު ބޭނުންވާ ކަންކަން ހުރުމުން، އެ ކަންކަން ސާފުކުރުމަށް މަޖިލީހުގެ އިދާރާގައި މިހާރު އެދިފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
