ޕީޕީއެމް/ޕީއެންސީގެ ސަރުކާރެއްގައި ސޯޝަލް ހައުސިންގ މަޝްރޫޢުތަކުގެ ދަށުން އާއްމުންނަން ދޫކުރެވޭ ފުލެޓް ތަކުގެ ކުލި ކުޑަ ކުރައްވާނެ ގޮތުގެ ފޯމިއުލާ އެ ކޯލިޝަންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ހާމަކުރައްވައިފިއެވެ.
"އާސްކް މުޢިއްޒު"ގެ ނަމުގައި ޑރ. މުޢިއްޒު އާއި ބޭނުން ސުވާލެއް ކުރުމުގެ ފުރުސަތު ހުޅުވާލައިގެން ކުރިއަށް ގެންދެވުނު ޕްރޮގްރާމްގައި ހިޔާ ފްލެޓާ ވިނަރެސް ފްލެޓްގެ ކުލި ކުޑަކުރާނެ ވާހަކަ ޑރ. މުޢިއްޒު ވިދާޅުވެފައިވާތީ، ހިޔާ ނުވަތަ އެހެނިހެން ހައުސިންގް މަޝްރޫޢުތަކުގެ ކުލި ކުޑަކުރަން ޑރ.މުޢިއްޒުގެ ސަރުކާރެއްގަ ކަންކުރާނެ ގޮތަކީ ކޮބައިތޯ އާއި ފްލެޓްތައް ކުލި ކުޑަކުރާއިރު ނަގާފަހުރި ލޯނުތަކަށް ހަދާނީ ކިހިނެތްތޯ އާންމުންގެ މީހަކު ވަނީ ސުވާކު ކޮށްފައެވެ.
އެ ސުވާލަށް ޖަވާބު ދެއްވަމުން މުޢިއްޒު ވަނީ، މީގެ ކުރިންވެސް ކުރީގެ ރައީސް ޔާމީން އަބްދުލްގައްޔޫމްގެ ސަރުކާރުން ހިޔާ ފުލެޓް ތަކަށް ނެގުމަށް ނިންމެވީ 5,600 ރުފިޔާ ކަން ފާހަގަކުރައްވާފައެވެ. އެއީ މެއިންޓަނަންސް ފީއާއެވެސް ލައިގެން ނަގަން ނިންމި އަގެވެ. އަދި ބިމުގެ އަގާ ފައިނޭންސްއާއި އޭގެ ހުރިހާ އަގެއް ހެދީމަވެސް މަހަކަށް އެވަރަށް ނެގީމަ ކުންފުންޏަށް ފައިދާވާނެ ކަމަށް މުޢިއްޒު ވިދާޅުވިއެެވެ.
އެހެންނަމަވެސް މިސަރުކާރުން އެ ހިސާބު ރަނގަޅު ނޫންކަމަށްބުނެ ފުރަތަމަ ކުލީގެ ގޮތުގައި 11 ހާސް އަދި، ފަހުން 7 ހާސް އަދި މިހާރު މެއިންޓަނަންސް ފީ ނުލައި 5300 އަށް ހަދާފައިވާ ކަމަށް މުޢިއްޒު ވިދާޅުވިއެެވެ.
މުޢިއްޒު ވިދާޅުވީ މިސަރުކާރުން ކަން ކުރި ގޮތުން އެނގިގެންދަނީ ކުރީ ސަރުކާރުން ޖެހި ހިސާބު ދިމާވެފައިވާކަމަށެވެ.
"ހިޔާ ފްލެޓްގެ އަގު މިސަރުކާރުން ބޮޑުކުރީ. އަޅުގަނޑުމެން ރައީސް ޔާމީންގެ ވެރިކަމުގަ ބިމުގެ އަގާ ފައިނޭންސްއާއި އޭގެ ހުރިހާ އަގެއް ހެދީމަވެސް މަހަކަށް 5600 ރުފިޔާ ރައްޔިތުން އަތުން ނެގީމަވެސް ޕްރޮފިޓް ފައިވާ އެބަވޭ ކުންފުންޏަށް. އެހެންނަމަވެސް މިސަރުކާރުން ވިދާޅުވީ އެއީ ރަނގަޅު ހިސާބެއްނޫނޭ. މިސަރުކާރުން ފުރަތަމަ 11 ހާސް ފަހުން 7 ހާސް އަދި މިހާރު 5300 އަށް ހެދީމަ އަޅުގަނޑުމެން ޖެހި ހިސާބާއި ހަމަޔަށް އައިސްސަ އެއޮތީ. އަޅުގަނޑުމެން އޭރު ދެންނެވީ މެއިންޓެނެންސް ފީއާއެކު 5600 ގޮތުގަ ކަމަށް ކުރިއަށް ގެންދާނީ. އެ ހިސާބު ދިމާވާތީ ނޫންތޯ މިސަރުކާރުން އެހެން އެ ހެދީ. އެ އަގު ދިމާވާނެ"
ޑރ. މުހައްމަދު މުޢިއްޒު
މީގެއިތުރުން މުޢިއްޒު ވަނީ ކުރީގެ ރައީސް ޔާމީންގެ ވެރިކަމުގައި ފެށި ބޯހިޔާވަހިކަމުގެ އަނެއް މަޝްރޫޢުގެ ނަން ވިނަރެސް ފްލެޓްގެ ނަމަށް ބަދަލުކުރިކަމަށް ވިދާޅުވެފައެވެ.
މުޢިއްޒު ވިދާޅުވީ ވިނަރެސް ފްލެޓްތަކުގެ ހިސާބު ކިތާބާއި، ލޯނުތަކާއި ގުޅެ ހުރިހާ ކަމެއް އެނގިވަޑައިގަންނަވާ ކަމަށާއި، އެއްބަސްވުންތަކުގައި ސޮއި ކުރެއްވީވެސް މުޢިއްޒު ކަމަށެވެ. އަދި މި ފްލެޓްތަކުގެ ލޯނުތައް ދައްކާ މިހާރު ހުރި ވަރަށްވުރެ ކުލި މާބޮޑަށްވެސް ކުޑަ ކުރެވޭނެކަމަށް މުޢިއްޒު ވިދާޅުވިއެވެ.
"ދެން ވިނަރެސް ފްލެޓް މިބޭފުޅުން އާނަމެއް ދިނީ. އެތަނުގެ ހިސާބު ކިތާބާއި ހުރިހާ ލިޔެކިޔުމެއް ހެދިއިރު އެކަން ހިންގީ ހައުސިންގ މިނިސްޓްރީގަ އަޅުގަނޑު ހުރިއިރު. ފުރަތަމަ އެގްރީމެންޓްގަ ސޮއިކުރީވެސް އަޅުގަނޑު،ފަހުން އެޗްޑީސީއަށް އެގްރީމެންޓް ބަދަލުކުރީ. އެކަމަށް 2 ލޯނެއް އޮންނާނެ . މިހާރު ދައްކަންޖެހޭ ޑައުންޕޭމަންޓް އަދި މަހަކު ދައްކަންޖެހޭ ވަރު ބޮޑު. އެ ކުޑަކުރެވޭނެ އެއީ ހައި އެންޑް ނޫނީ މީޑިއަމް ޓު ހައި އެންޑް ގެ ފްލެޓް ތަކެއްނޫން. އެއީ އާދައިގެ އާމްދަނީއެއްލިބޭ ރައްޔިތުންނަށް ދޭން ނިންމާފަހުރި ތަންތަން. އެތަންތަނުގެ އަގުތައް މިހާރަށްވުރެ ކުޑަވާންޖެހޭނެ" މުޢިއްޒު ވިދާޅުވިއެވެ.
މީގެ އިތުރުން މުޢިއްޒު ވިދާޅުވީ ވިނަރެސް ފްލެޓްތަކަކީ ހިޔާ ސޯޝަލް ހައުސިންގއަށް ވުރެ ރަނގަޅަށް ފިނިޝިންގ ނިންމާފައިހުރި ފްލެޓްތަކަށް ވުމުން ރޭންޖެއް ގެންގުޅޭވޭނެ ކަމަށާއި އެހެންނަމަވެސް މިހާރު ހުރި އަގަށްވުރެ މާ ރަނގަޅަށްވެސް ކުލި ކުޑަކުރެވޭނެކަމަށެވެ.
ކުލި ކުޑަކުރިނަމަވެސް ކުންފުންޏަށް ފައިދާވެ ލޯނު ދައްކާ ހުރިހާކަމެއްކުރެވޭނެކަން ފާހަގަކުރައްވާ މުޢިއްޒު ތަކުރާރުކޮށް ދެންނެވީ މިސަރުކާރުން ވިނަރެސް ފްލެޓްތަކުގެ ކުލީގެ ގޮތުގައި ނަގަނީ މާ ބޮޑު އަގެއްކަމަށާއި، ވިނަރެސް ފްލެޓްތަކުގެ ކުލި ޔަޤީނުންވެސް އެއަށްވުރެ ކުޑަކުރެވޭނެ ކަމަށެވެ.
Advertisement
This content is created and paid for by advertisers and does not involve Voice Journalists
