ރާއްޖޭގެ ވެރިކަމުގެ ނިޒާމު އޮންނަން ފެންނަނީ ބަރުލާމާނީއަށްތޯ ނުވަތަ ރިޔާސީ ނިޒާމަށްތޯ ބެލުމަށް، ނިޒާމު ބަދަލުކުރުމާ މެދު ނަގާ ވޯޓަށް މި ވަގުތު އެއްވެސް ޝައުގުވެރިކަމެއް ނެތް ކަމަށާއި މިވަގުތު ފޯކަސް އޮތީ ކުރިއަށް މިއޮތް ރިޔާސީ އިންތިޚާބުގެ ދެވަނަ ބުރަށް ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

މިމަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަބުރުގެ ކެމްޕެއިންގައި ރޭ ހދ ކުޅުދުއްފުށީގައި ބޭއްވި ޖަލްސާއަށްފަހު ނޫސްވެރިންނާއި ވާހަކަދައްކަވަމުން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ޑރ މުއިއްޒު ވިދާޅުވީ، ނިޒާމީ ވޯޓެއް ނެގުމާ މެދު އޭނާގެ އެއްވެސް ޝައުގުވެރިކަމެއް ނެތް ކަމަށެވެ.

އިންތިހާބުގެ ފުރަތަމަ ބުރަށް ފަހުގައި މިހާތަނަށް 50ކަށް ރަށަށް ދެއްވިއްޖެ ކަމަށާއި ކޮންމެ ރަށެއްގެ ރައްޔިތުންގެ ކިބައިންވެސް ފެންނަނީ އިންތިހާއަށް މާޔޫސްކަން ކަމުގައި ޑރ މުއިއްޒު ވަނީ ވިދާޅުވެފައެވެ. 

އަދި ހަމައެހެން ކޮންމެ ރަށެއްގެ ރައްޔިތުންވެސް އެ ބޭފުޅުންނަށަށް އިތުބާރުކޮށް ގިނަ ކަންކަމަކަށް އެދޭކަމަށާއި އެކަންކަން މުއިއްޒުގެ ވެރިކަމެއްގައި ކޮށްދެއްވާނެ ކަމުގައި އެނާ ވިދާޅުވިއެވެ. 

މުއިއްޒު އިތުރަށް ވިދާޅުވީ ފުރަތަމަ ބުރުގައި ވާދަކުރެއްވި އެހެން ކެންޑިޑޭޓުންގެ ތެރެއިން ދެވަނަ ބުރުގައި ވަކިކޮޅަކަށް އަރުއްވަން ނިންމާފައި ނުވާ ކެންޑިޑޭޓުންނަށް ތާއީދުކޮށް ވޯޓުދިން ފަރާތްތަކުން ވެސް އޭނާއަށް ދެވަނަ ބުރުގައި ވޯޓު ދެއްވާނެ ކަމަށް އުންމީދުކުރައްވާ ކަމަށެވެ. އަދި, ދެވަނަ ބުރު ކާމިޔާބު ކުރެވޭނެ ކަމުގެ ވަރަށް ބޮޑު ޔަގީންކަމެއް އެބައޮތް ކަމަށް މުއިއްޒު ވިދާޅުވިއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައިގެން އުފެއްދި އާ ޕާޓީ "ދަ ޑިމޮކްރެޓްސް"އިން މަސައްކަތް ކުރަނީ ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވުމުގެ ކުރިން ނިޒާމާގުޅޭ ވޯޓެއް ނެގުމަށެވެ. ނަމަވެސް އެމްޑީޕީއާއި ޕީޕީއެމުން ވެސް އެއްބަސް ވަނީ ރިޔާސީ އިންތިޚާބަށް ފަހު ނިޒާމާ ގުޅޭ ވޯޓެއް ނެގުމަށެވެ.