ޕީޕީއެމް ޕީއެންސީގެ ސަރުކާރެއްގައި އިލެކްޓްރޯނިކް އުޅަނދުތަކަށް އިންވެސްޓް ކުރަން ބޭނުންވާ ފަރާތްތަކަށް އެ އިންވެސްޓްމަންޓަށް އެހީތެރިކަން ފޯރުކޮށްދޭނެ ކަމުގައި ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ރޭ ކުޅުދުއްފުށީ ގައި ކުރިއަށް ދިޔަ ރިޔާސީ އިންތިހާބުގެ ދެވަނަބުރުގެ ކެމްޕެއިންގައި ޖަލްސާގައި ވާހަކަ ދައްކަވަމުން ޑރ މުއިއްޒު ވިދާޅުވީ، ރާއްޖޭގެ ސިޓީތަކުގައި ވަރަށް ގިނަ އަދަދަކަށް ވެހިކަލްތައް އެބަހުރި ކަމަށެވެ. ނަަމަވެސް، ތިމާވެއްޓަށް ވިސްނައި އިންޖީނުލީ އުޅަނދުތައް މަދުކުރުމަށް މަސައްކަތްކުރަން ޖެހޭ ކަމަށް ވެސް ވިދާޅުވިއެވެ.

މީގެ އިތުރުން މުއިއްޒު ވިދާޅުވީ އިލެކްޓްރިކް ވެހިކަލަށްތައް ގެނެސް އެންމެ ފުރަތަމަ އެ ކަން ތައާރަފު ކުރާނީ ސިޓީތަކަށް ކަމަށާއި އެ ފަދަ ވެހިކަލްތައް ޗާޖުކުރާނެ ސްޓޭޝަންތައް ވެސް އެ ސިޓީތަކުގައި ގާއިމުކުރައްވާނެ ކަމަށެވެ. އަދި، ބައިސްކަލް ދުއްވުން އިތުރުކުރުމަށް ޓަކައި އީ ބައިކް ރާއްޖޭގައި ތައާރަފުކުރައްވާނެ ކަމުގައިވެސް ރޭގެ ޖަލްސާގައި މުއިއްޒު ވަނީ ވިދާޅުވެފައެވެ. 

ރޭގެ ޖަލްސާގައި ޑރ މުއިއްޒު ވިދާޅުވީ، ރާއްޖެ ތަރައްގީކުރުމުގައި ވިސްނުމަކީ ސަރަހައްދީ ތަރައްގީ އެއްފަސްކުރުން ކަމަށާއި އެ ކަން ކުރާނީ ހުރިހާ ރައްޔިތުންގެ މަޝްވަރާއާ އެކު ހެދޭ ނެޝަނަލް ޑިވަލޮޕްމަންޓް ޕްލޭނަކާ އެކު ކަމުގައެވެ. 

އެގޮތުން ކުޅުދުއްފުށްޓަށް ދިމާވެފައިވާ ގެދޮރުގެ މައްސަލަ ހައްލުކުރުމުގެ ގޮތުން 2000 ހައުސިން ޔުނިޓް އަޅައިދޭނެކަން ރޭ އިއުލާންކޮށްފައިވާއިރު، އޭގެ އިތުރުންވެސް އެ ސިޓީގެ ހުރިހާ މަގުތައް ޒަމާނީ ފެންވަރަށް ތަރައްގީ ކުރާއިރު ވަކި މަގުތަކެއް ރޭސިންގް އަށް ތަރައްގީ ކޮށްދެއްވާނެ ކަމުގައި މުއިއްޒުވަނިީ ވިދާޅުވެފައެވެ. އަދި މީގެ އިތުރުންވެސް ޓާޝަރީ ހޮސްޕިޓަލް ހަގީގީ މާނައިގައި ބޭނުންކުރެވޭ ގޮތަށް ތަރައްގީ ކުރުމާއެކު އެރަށުގައި ދަމަނަވެއްޓެއް ގާއިމްކުރުމުގެ އިތުރުން ޑޮލަރު ނެގޭނެ އޭޓީއެމްއެއް ތަރައްގީ ކޮށްދެއްވާނެ ކަމުގައި ޑރ މުއިއްޒު ވަނީ ވިދާޅުވެފައެވެ.