މަޖިލީހުގެ ރައީސް މުޙައްމަދު ނަޝީދުގެ އަތްޕުޅުން އަތުލެވުނު ޕާޓީ ހޯދައިދީ އެމަނިކުފާނަށް ދެވުނު ހަމަލާގެ މައްސަލައިގައި އެމަނިކުފާނަށް އިންސާފު ހޯދައި ދެވޭނީވެސް ޕީޕީއެމް/ޕީއެންސީގެ ސަރުކާރަކަށް ކަމަށް ނައިފަރު ދާއިރާގެ މެމްބަރު އަޙްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.
ޝިޔާމް މިފަދައިން ޓްވީޓް ކުރައްވައިފައި މިވަނީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ދެއްކެވި ވާހަކަ ފުޅަކާއި ގުޅިގެނެވެ.
އިމްތިޔާޒް ވިދާޅުވީ ރައީސް ނަޝީދަށް ދިން ބޮމުގެ ހަމަލާގައި އެމަނިކުފާނުގެ ހަށިކޮޅަށް ލިބިވަޑައިގެންނެވި އަނިޔާތަކުގެ ފޮޓޯތައް އެމަނިކުފާނުގެ އާއިލާއިން ހާމަ ނުކުރިނަމަ ސަރުކާރުން އެކަންކަން ތަހްޤީޤް ނުކުރީސް ކަމަށެވެ.
މިކަމާއި ގުޅިގެން ޝިޔާމް ކުރައްވާފައިވާ ޓްވީޓެއްގައި އިމްތިޔާޒްގެ ވާހަކަ ފުޅަށް ޝިޔާމް ތާއީދު ކުރައްވައިފައިވެއެވެ.
އަދި އެހަމަލާގެ މަޢުލޫމާތު ދިފާޢީ ވަޒީރު މާރިޔާ އަހްމަދު ދީދީއަށް ލިބިވަޑައިގަތުމުންވެސް ފިޔަވަޅެއް ނޭޅުއްވި ކަމަށާއި، އަދި އެކަން ހިނގައިގެން މިއަދާއި ހަމައަށްވެސް ރައީސް އިބްރާހިމް މުޙައްމަދު ޞާލިޙްގެ ޅިޔަނު ސީޕީ މުޙައްމަދު ޙަމީދު މެދުވެރި ކުރައްވައި ރަނގަޅު ތަހްޤީޤެއް ހިންގައިފައި ނުވާ ކަމަށްވެސް ޝިޔާމް ވިދާޅުވެފައި ވެއެވެ.
"ނިގުޅައި ގަތް ޕާޓީވެސް ހޯދައިދޭނީ އަޅުގަނޑުމެން، ރައީސް ނަޝީދަށް އިންސާފުވެސް ހޯދައިދޭނީ އަޅުގަނޑުމެން" ޝިޔާމް ވިދާޅުވެފައިވެއެވެ.
ރައީސް ނަޝީދަށް ދިން ހަމަލާއަށް ގިނަ ދުވަސް ތަކެއް ވެފައިވާއިރު އަދިވެސް އެކަމުގައި އެމަނިކުފާނަށް އިންސާފު ލިބިވަޑައިގެންފައެއް ނުވެއެވެ.
Advertisement
This content is created and paid for by advertisers and does not involve Voice Journalists
