ރައްޔިތުންނަށް ދިމާވެފައިވާ ބޯހިޔާވެހިކަމުގެ މައްސަލައަށް ހައްލު ގެނެސްދޭނީ ދައުރު ނިމެން ދެ ދުވަހަށް ވީމަ ނެރޭ އިޢުލާނަކުން ނޫން ކަމަށް ވިދާޅުވެ، އިދިކޮޅުގެ ރިޔާސީ ކެނޑިޑޭޓް ޑރ. މުހައްމަދު މުއިއްޒު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ފާޑު ވިދާޅުވެއްޖެއެވެ.
އިދިކޮޅުން އިއްޔެ ގަލޮޅުގައި ބޭއްވި ކަންމަތީ ޖަލްސާގައި ވާހަކަފުޅުދައްކަވަމުން މުއިއްޒު ވަނީ އެމަނިކުފާނު ވެރިކަމަށް ވަޑައިގެންފި ނަމަ ކުރައްވާނީ އަނިޔާވެރި ވެރިކަމެއް ކަމަށް ރައީސް ޞާލިހާއި އެމަނިކުފާނަށް ތާއީދު ކުރާ ފަރާތްތަކުން ވިދާޅުވަމުންދާ ވާހަކަތަކަށް ރައްދު ދެއްވާފައެވެ. އެގޮތުން މުޢިއްޒު ވިދާޅުވީ އެމަނިކުފާނު ވެރިކަމަށް ވަޑައިގަންނަވަނީ އަނިޔާވެރި ކަމާއި ބޭއިންސާފު ތާ އަބަދަށް ނިމުމަކަށް ގެންނެވުމަށް ކަމަށް މުޢިއްޒު ވިދާޅުވިއެެވެ.
އަދި މީގެ އިތުރުން ދިވެހިރާއްޖޭގެ ޚާރިޖީ ސިޔާސަތު ކައްސާލައިގެން ގޮސްފައިވާ ކަމަށާ، އެމަނިކުފާނު ވެރިކަމަށް ވަޑައިގެން އެންމެ ފުރަތަމަ ވެސް ކުރައްވާނެ ކަންކަމުގެ ތެރޭގައި ޚާރިޖީ ސިޔާސަތު ހަމަ މަގަށް އެޅުވުމުގެ މަސައްކަތް ހިމެނޭނެ ކަމަށް މުޢިއްޒު ވިދާޅުވިއެެވެ.
ގަލޮޅުގައި ބޭއްވި ކަންމަތީ ޖަލްސާގެ ތެރެއިން--ފޮޓޯ/ޕީޕީއެމް
މިއާއެކު މުޢިއްޒު ވިދާޅުވީ އެމަނިކުފާނުގެ ވެރިކަމެއްގައި ގެދޮރުވެރިކަން މާލޭގެ ހުރިހާ ރައްޔިތުންނާއި މާލޭގައި ދިރިއުޅޭ ހުރިހާ ރައްޔިތުންނަށްވެސް ކަށަވަރު ކަމާއެކު ފޯރުކޮށްދެއްވާނެ ކަމަށެވެ. ހަމަ އެހެންމެ ރާއްޖޭގެ އުތުރާއި ދެކުނުން ހުރިހާ ރައްޔިތުންނަށް، ތަފާތުކުރުމެއްނެތި އެ މީހަކު ބޭނުންވާ ތަނަކުން ގެދޮރުވެރިކަން ކަށަވަރުކޮށްދެއްވާނެ ކަމަށްވެސް ވިދާޅުވިއެވެ.
"އިގްތިސޯދު ނަގާ ކޮޅަށް ޖަހަމުން، އިގްތިސޯދުުގައި ބުންވަރާއި ހަކަތަ އުފައްދަމުން ތަރައްގީގެ މަޝްރޫތައް ގެނެސް ގައުމުގައި ތަރައްގީ ބާރު ދުވެލީގައި އަނެއްކާވެސް ދާތަން އިރާދަކުރެއްވިޔާ ފެނިގެންދާނެ. އަޅުގަނޑުމެންގެ ނެހެދި މިހިރަ މަގުތައް ހަދައިދީ، މާލޭގައި އޮތް ޕާކިން މައްސަލަ ހައްލުކޮށްދީ، މާލޭގައި ހުރި އެކި ކަހަލަ ނޭދެވޭ ކަންތައްތަކަށް ދާއިމީ ނިމުން އިރާދަކުރެއްވިޔާ ގެނެސްދޭނަން". މުއިއްޒު ވިދާޅުވިއެވެ.
ގަލޮޅުގައި ބޭއްވި ކަންމަތީ ޖަލްސާގެ ތެރެއިން--ފޮޓޯ/ޕީޕީއެމް
މީގެ އިތުރުން "ކަނޑު އަޑިންނާއި ޖައްވުންނާއި އެކި ތަންތަނުން ދީފައިވާ ގޯތިތަށް" ހަގީގަތަކަށް ހަދައިދެއްވައި އެ ގޯތިތަކުގައި ގެދޮރު އިމާރާތްކުރުމަށްޓަކައި ފަހި ފުރުސަތުތައް ހޯދައިދެއްވާނެ ކަމަށް މުޢިއްޒު ވިދާޅުވިއެވެ.
"އަޅުގަނޑު ވަރަށް ގިނަ ގެތަކަށް ވަދެފައި ހުންނާނެ. ވަރަށް ވަރަށް ނިކަމެތިކޮށް އެތައް ރައްޔިތުންނަށް އުޅެމުންދަނީ. އެކަން ނިމުމަކަށް ގެންނަންޖެހޭ. އެކަން ނިކުމަކަށް ގެންނާނީ ދައުރު ނިމި. ފުރަތަމަ ބުރު ނިމި ދެވަނަ ބުރު ނިމެން ދެ ދުވަހަށްވީމަ ނެރޭ އިއުލާނަކުން ނޫން. އެކަން ނިމުމަކަށް ގެންނާނީ އަޅުގަނޑު މި ހަމުށަހަޅާ ގޮތަށް ކަންކަން ކޮށްގެން. އަޅުގަނޑުމެންގެ ސަރުކާރެއްގައި ފުރަތަމަ އަހަރު، ހަމާއި ބާރަމަސް ދުވަހުގެ ތެރޭގައި އިރާދަކުރެއްވިޔާ، މި ސަރަހައްދު ގައި ހިއްކަން އަޅުގަނޑުމެން ހުށަހަޅާ މި ހުރިހާ ތަނެއް ހިއްކައި ނިންމަދޭނަން"
ޑރ. މުހައްމަދު މުޢިއްޒު
މުއިއްޒު ވިދާޅުވީ އެތަންތަން ހިއްކުމަށްފަހު އެތަންތަނަށް އިގްތިސޯދީގޮތުން ގެންނަންޖެހޭ ހުރިހާ ކުރިއެރުންތަކެއް ގެނެސް، ފުރުސަތުތައް ފަހިކޮށްދީ، އިންވެސްޓްމަންޓްގެ އެކި ފުރުސަތުތަކަށް ހުޅުވާލައްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
