އެމްޑީޕީގެ އެކްޓިވިސްޓެއްގެ ގޮތު މަސައްކަތް ކުރެއްވުމަށްފަހު ދަ ޑިމޮކްރެޓްސް އާއި ގުޅިވަޑައިގެންނެވި ޝަފީއާ ޒުބައިރު އިދިކޮޅުގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒަށް ކެމްޕޭން ކޮށް ދެއްވަން ފައްޓަވައިފި އެވެ. 

ޝަފީއާއަކީ ރައީސް މުހައްމަދު ނަޝީދަށް ވަރަށް ބޮޑަށް ތާއީދު ކުރައްވާ ބޭފުޅެކެވެ. މީގެ ކުރިން އެމްޑީޕީގެ މައު ހަރުގޭގެ ގޮތުގައި ބޭނުން ކުރަމުންދިޔަ އިމާރާތް، ހ. ވެޔޮވިލާގެ ވެރިޔާ އަކީވެސް އޭނާ އެވެ. ނަމަވެސް، އެމްޑީޕީގެ ތެރޭގައި ބައިބައިވުން އުފެދި އެޕާޓީގެ ތެރެއިން ދަ ޑިމޮކްރެޓްސް އުފެދުމާއިއެކު ޝަފީއާ އެ ކޮޅަށް ޖެހި، އެމްޑީޕީގެ އަތުން އެ އިމާރާތް ނަގަން ނިންމެވިއެވެ. 

އެއަށްފަހު އެމްޑީޕީގެ އެ މައި ޖަގަހަ އޭނާ ވަނީ ދަ ޑިމޮކްރެޓްސްއަށް ދޫކުރަން ނިންމާފައެވެ. އެހެންކަމުން މިހާރު އެތަން ބޭނުންކުރަމުން އަންނަނީ ޑިމޮކްރެޓްސް އިންނެވެ. 

ރިޔާސީ އިންތިހާބުގެ ފުރަތަމަ ބުރުގައި ޑިމޮކްރެޓްސް ގެ ކެންޑިޑޭޓް އިލްޔާސް ލަބީބަށް ކާމިޔާބީ ނުލިބުމުން އެ ޕާޓީން ނިންމީ ދެވަނަ ބުރަށް ދިޔަ އެއްވެސް ކެންޑިޑޭޓަކަށް ތާއީދު ނުކުރާށެވެ. އެހެންނަމަވެސް، ޑިމޮކްރެެޓްސްގެ ގިނަ މެންބަރުންގެ ތާއީދު ދެމުން ގެންދަނީ އިދިކޮޅު ކެންޑިޑޭޓް މުއިއްޒަށެވެ.

އެގޮތުގެ މަތީން ޝަފީއާވެސް މުޢިއްޒަށް ތާއީދު ކޮށްފައިވާއިރު އޭނާ އަކީ ސިޔާސީ ގޮތުން ނުފޫޒުގަދަ، ފަހަތްޕުޅުގައި ބޮޑު ޓީމެއް އޮންނަ މެންބަރެކެވެ.