ސިޔާސީ މައިދާނަށް ނިކުމެ ސިޔާސީ ވާހަކަތައް ދައްކަންވާނީ އާންމުންގެ ފާޑުކިޔުންތަކާއި ހިތްހަމަ ނުޖެހުންތަކާއި ކުރިމަތިލާންޖެހިދާނެކަން ދަނެ ތިބެ ކަމަށް ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިން ވިދާޅުވެއްޖެއެވެ. 

އިދިކޮޅު ޕީޕީއެމްއަށް ވެރިކަން ލިބިއްޖެނަމަ ރާއްޖެ އަނެއްކާ ވެސް ވެއްޓޭނީ ބިރުވެރި ހާލަތަކަށް ކަމަށް ވިދާޅުވެ މީޑިއާތަކަށް އިންޓަވިއު ދެއްވަމުން ދިޔަ ކުރީގެ އޮޑިޓާ ޖެނެރަލް ނިޔާޒް އިބްރާހީމަށް މަގުމަތިން ފުރައްސާރަ ކުރުމުން އެކަން ފުލުހަށް ހުށަހަޅައި ޕީޕީއެމަށް ނުރުހުން އަމާޒުކުރައްވަމުންދާ މި ދަނޑިވަޅުގައި މުހުތާޒު ކުރެއްވި ޓްވީޓެއްގައި ވަނީ އެފަދައިން ސިޔާސީ ވާހަކަ ދައްކަވަން ވަނީ އެކަންކަމާއި ގުޅިގެން ފުރައްސާރައާ ކުރިމަތިލާންޖެހޭނެކަން ވެސް ދަނެގެން ކަމަށެވެ. 

"އެކަން ހަޖަމުނުވާނަމަ އެމަގުން ހިނގުން ބުއްދިވެރިއެއްނޫން." މުހުތާޒު ވިދާޅުވި އެވެ. 

ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި އޮޑިޓަރ ޖެނެރަލްގެ މަގާމުގައި ހުންނަވަނިކޮށް މަގާމުން ވަކިކުރެވުނު ނިޔާޒު ޕީޕީއެމަށް ފާޑުކިޔަމުންދާތީ، މީހަކު ވަނީ ނިޔާޒާ މަގުމަތިން ދިމާކޮށްލައިފައެވެ.

ސޯޝަލް މީޑިއާގައި އެމީހާ ދައުރު ކޮށްފައިޗާ ވީޑިއޯއިން ފެންނަ ގޮތުގައި ބީއެމްއެލް އިސްލާމިކް ބޭންކަށް ނިޔާޒު ސައިކަލުގައި ދަނިކޮށް އެ މީހާ ވަނީ ނިޔާޒުގެ ފަހަތުންގޮސް އެއްޗެހި ގޮވައި ތުހުމަތުތަކެއް ކޮށްފައެވެ. އެ ތުހުމަތުތަކުގެ ތެރޭގައި އެމްއެމްޕީއާރުސީގެ ހިޔާނާތުގެ ފައިސާ އޭނާއަށް ލިބިފައިވާ ކަމަށް ގޮވިއެވެ. ނިޔާޒު ސައިކަލް ޕާކްކޮށްފައި ބޭންކަށް ހިންގަވާފައި ވަޑައިގެންނެވި މަގުމަތީވެސް އެ މީހާ ވަނީ ކެމަރާ ކުރަމުން، ނިޔާޒަށް އެއްޗެހި ގޮވަމުން ފަހަތުން ގޮސްފައެވެ. އެ މީހާ އެންމެ ބޮޑަށް ރުޅިވެރިކަން ފާޅުކުރި އެއް ކަމަކީ ޕީޕީއެމްއާ ދެކޮޅަށް ނިޔާޒު އިންޓަވިއުތައް ދިނުމެވެ.

އެކަމާއި ގުޅިގެން ނިޔާޒް ވަނީ، އޭނާ ބޭންކަށް ވަޑައިގެންނެވި މަގުމަތީގައި "ބޯދިގުކޮށްފައިވާ" "ގުންޑާއެއް" އޭނާއާއި މަގުމަތިން ދިމާކޮށް ފުރައްސާރަކޮށް އިންޒާރު ދީފައިވާކަމަށެވެ. އަދި މިހާރުއްސުރެ ޕީޕީއެމްގެ އަސްލު ސިފަ މިދަނީ ފެންނަމުން ނިޔާޒް ވިދާޅުވެފައިވެއެވެ.