ކްރިމިނަލް ކޯޓުގެ ކުރީގެ އިސް ޤާޒީ އަޙްމަދު ހައިލަމް ޕީއެންސީ ޕީޕީއެމްގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒަށް ތާއީދު ކުރައްވާ ކަން ހާމަކުރައްވައިފިއެވެ.

އެކަން ހާމަކުރައްވައި ހައިލަމް ކުރައްވައިފައިވާ ޓްވީޓެއްގައި ވިދާޅުވެފައިވަނީ ދިވެހިރާއްޖެއަށް މިވަގުތު ދިމާވެފައިވާ މައްސަލަތައް ހައްލު ކުރެވޭނީ ތަޢުލީމާއި ތަޖުރިބާ ލިބިވަޑައިގެން ހުންނެވި ބޭފުޅަކު ރައީސް ކަމަށް އައްޔަނު ވެގެން ކަމަށް ޤަބޫލުފުޅު ކުރައްވާތީ ޑރ މުޢިއްޒަށް ތާއީދު ކުރައްވަން ނިންމަވައިފައިވާ ކަމަށެވެ.

ހައިލަމް ވިދާޅުވީ ދިވެހިރާއްޖޭގެ ސިޔާދަތާއި އަމާންކަމަށް ކުރިމަތިވެފައިވާ ނުރައްކާތަކާއި ގޮންޖެހުންތައް ނައްތާލައި، ޤައުމުގައި ހަމަޖެހުމާއި އަމާންކަން ޤާއިމުކޮށް، މާތްވެގެންވާ އިސްލާމްދީނަށް މިޤައުމުގައި ކުރިމަތިވަމުންދާ ފުރައްސާރަކުރުންތައް ހުއްޓުވައި، އަޅުގަނޑުމެންގެ ތެރޭގައި ދީނީ ވަޙުދަތު ޤާއިމްކޮށް، އިޤްތިޞާދީގޮތުން މިޤައުމު ވެއްޓިފައިވާ އަނދަވަޅުން ސަލާމަތްކޮށް ފުދުންތެރި ޖީލެއް ބިނާކުރެވޭނީ ތަޢުލީމާއި ތަޖުރިބާ ލިބިވަޑައިގެންހުންނެވި، ބަހާއި ޢަމަލު ދިމާވާފަދަ އިޚްލާޞްތެރި ބޭފުޅަކު މި ރާއްޖޭގެ ރައީސްކަމަށް ޢައްޔަންކުރެވިގެންކަމަށް ޤަބޫލުކުރެވޭތީ، ޑރ މުޢިއްޒަށް ތާއީދު ކުރަންވަން ނިންމަވާފައިވާ ކަމަށެވެ.

ހައިލަމް އިތުރަށް ވިދާޅުވީ ޤައުމުގައި ޢާންމުވެފައިވާ ކޮރަޕްޝަންގެ ނުރައްކާތެރި ވަބާއިން މިރާއްޖެ ސަލާމަތްކުރެވޭނީ، ޑރ މުޢިއްޒު ފަދަ ބޭފުޅަކު ރާއްޖޭގެ ރައީސް ކަމަށް އައްޔަން ކުރެވިގެން ކަމަށް ޤަބޫލުފުޅު ކުރައްވާ ކަމަށެވެ.

ހައިލަމް ރިޔާސީ އިންތިޚާބުގެ ފުރަތަމަ ބުރުގައި ހުންނެވީ ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހިމްގެ ފަހަތްޕުޅުގައެވެ.