އަންނަ ހޮނިހިރު ދުވަހު އޮންނަ ރިޔާސީ އިންތިހާބުގައި ބޭނުން ކުރަން ނިންމާފައިވާ ވޯޓު ކަރުދާސްތަކެއް ބޭރުވެފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށާއި އެކަން އިލެކްޝަންސް ކޮމިޝަން (އީސީ) އިން ބަލަން ޖެހޭ ކަމަށް ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ލ. ގަމަށް ވަޑައިގެން އެ ރަށުގައި ބޭއްވެވި ބޮޑު ޖަލްސާގައި އަދުރޭ ރިޔާސީ އިންތިހާބުގެ ފުރަތަމަ ބުރުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ރައްޔިތުން ނޫނެކޭ ބުނުމުން މިހާރު ވެރިކަންކުރާ އެމްޑީޕީން ކުރަމުންދާ މަސައްކަތަކީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ އަބުރު ކަތިލުމުގެ މަސައްކަތް ކަމަށެވެ. އެހެންނަމަވެސް, އެ މަސައްކަތް ކާމިޔާބު ނުވާނެ ކަމަށް އޭނާ ވިދާޅުވި އެވެ.
މިއާއެކު އަދުރޭ ވިދާޅުވީ ބައެއް ރަށްރަށަށް އެމްޑީޕީގެ ބޭފުޅުން ވަޑައިގެން އުމުރުން ދުވަސްވީ ބޭފުޅުން ގާތަށް ވަޑައިގެން ކޮންމެހެން ވޯޓުލާން ވަޑައިގަންނަވާނެ ކަމެއް ނެތް ކަމަށާ، ގޭގައި ތިބީމަ، ކަރުދާސްކޮޅެއް ގެނެސްދޭނެ ކަމަށް ވިދާޅުވަމުންދާ ކަމަށް މައުލޫމާތު ލިބިލައްވާ ކަމަށެވެ. އަދި އެ ކަރުދާހުގައި ފާހަގަ ޖަހާލީމަ ނިމުނީ ކަމަށް އެމްޑީޕީގެ ބޭފުޅުން ވިދާޅުވަމުން ގެންދަވާ ކަމަށް ވެސް އަދުރޭ ވިދާޅުވިއެވެ.
"ވަރަށް ބޮޑަށް ވިސްނާވަޑައިގަންނަވަން ވާނެ. އަޅުގަނޑުމެން މި ތުހުމަތު ކުރަނީ ވޯޓު ކަރުދާސް ބޭރުވެއްޖެ ކަމަށް. އިލެކްޝަންސް ކޮމިޝަނުން މިކަން ބައްލަވާ ދެއްވަން އެބަޖެހޭ. އެއްގޮތަކަށް ވެސް ހީ ކުރައްވައިގެން ނުވާނެ މި އިންތިހާބުުގައި ވައްކަން ކުރެވިދާނެ ކަމަކަށް. އެކަން ކުރާކަށް ފުރުސަތު ދޭކަށް ނޫން ރައްޔިތުން ތިބީ. އިލެކްޝަންސް ކޮމިޝަނުން މިކަމަށް ސަމާލުވެދެއްވާ. އެގޮތަށް ކަރުދާސް ބޭރުކޮށްގެން ކަރުދާހުގައި ފާހަގަ ޖަހައިގެން މ، ވޯޓުފޮށި ކައިރިއަށްގޮސް، އެތަނުންދޭ ކަރުދާސްކޮޅު ޖީބަށްލާފައި، ފާހަގަޖަހާ ކަރުދާސްކޮޅު ވޯޓު ފޮށްޓަށް ލާން އަޅުގަނޑުމެން ފުރުސަތެއް ނުދޭނަން.
އަބްދުއްރަހީމް އަބްދުالله
މީގެއިތުރުން، އެމްޑީޕީން ކަޅުދަބަސް ހިފައިގެން ފައިސާ ހިފައިގެން އައިސް، ފައިސާ ދީގެން ވޯޓު ގަތުމަށް މަސައްކަތް ކުރަމުންދާ ކަމަށާ، އެހެން ނަމަވެސް، މި މަހުގެ 9 ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި ފައިސާއަށް ނުހެއްލޭނެ ކަން ރައްޔިތުން ބުނެފައިވާ ކަމަށް އޭނާ ވިދާޅުވި އެވެ. އަދި ފައިސާ އަށް ވުރެ ރައްޔިތުންގެ އަގު އަދި ގައުމު މާ މުހިންމު ކަން އެ ރައްޔިތުން ބުނެފައިވާ ކަމަށް ވެސް އޭނާ ވިދާޅުވިއެވެ.
"ބާކީ މިއޮތް ދެ ތިން ދުވަހުގެ ތެރޭގައި އަޅުގަނޑުމެން ވަރަށް ބޮޑަށް ފާރަވެރިވާން ވާނެ އެމްޑީޕީ މީހުން ކޮށްފާނެ ކަންތައްތަކާ ދޭތެރޭގައި. ޓީމު ހަދާފައި ކަޅު ދަބަސް ހިފާފައި އަރާނެ. އެމީހުން ގޭގެއަށް ވަންނަ އިރު ފާރަވެރިވާން ވާނެ. ފަހަތުން ދާން ވާނެ. އެމީހުންނަށް އެކަނި މީހުންނާ ބައްދަލު ކުރުމުގެ ޖާގަ ދީގެން ނުވާނެ. އެ މަންޒަރު ފޮޓޯ ނަގަން ވާނެ. އެމީހުންނަށް ވާހަކަ ދެއްކެން ވާނީ އަޅުގަނޑުމެންނާ އެކީގައި،" އަދުރޭ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
