ރިޔާސީ ނިޒާމަކުން ރަނގަޅު ރައީސްއަކު ލިބޭތޯ 50 އަހަރު ވަންދެން މަސައްކަތް ކުރެވުނު އިރުވެސް އެކަން ނުވި ކަމަށް އުނގޫފާރު ދާއިރާގެ މެމްބަރު މުހައްމަދު ވަހީދު(ވައްޑެ) ވިދާޅުވެއްޖެއެވެ.
ވަހީދު މި ފަދައިން ވިދާޅުވެ މިއަދު ކުރެއްވި ޓުވީޓެއްގައި ވަނީ، ފާއިތުވި ފަންސާސް އަހަރުގައި ވެސް ރިޔާސީ ނިޒާމުން ރަނގަޅު ރައީސް ލިބުނުތޯ ސުވާލު ކުރައްވައިފައެވެ. އަދި އެކަން ވެފައި ނުވާކަމަށްވެސް ވަހީދުގެ ވަނީ ވިދާޅުވެފަ އެވެ.
ވަހީދު މިފަދައިން ވިދާޅުވެފައިވަނީ އެ ބޭފުޅާވެސް ނިސްބަތްވެވަޑައިގަންނަވާ ޑިމޮކްރެޓްސްއިން ބަރުލަމާނީ ނިޒާމަށް ފުރޮޅާލަން ރައްޔިތުންގެ ފެންނަ ނުފެންނަ ވޯޓަށް ނަގަން މަޖިލީހަށް ހުށަހަޅައި މަޖިލީހަށް ބަލައިވެސްގަނެފައި ވަނިކޮށެވެ. މަޖިލީހުން އެ ގަރާރު ފާސްކުރީ ވެރިކަން ކުރާ އެމްޑީޕީގެ ތާއިދުވެސް ލިބިގެންނެވެ.
އެކަމަކު ޕީއެންސީގެ ރިޔާސީ ކެނޑިޑޭޓް ޑރ. މުހައްމަދު މުއިއްޒު ވިދާޅުވީ ނިޒާމީ ވޯޓަކަށް މިވަގުތު ޝައުގުވެރިކަމެއް ނެތް ކަމަށެވެ.މަޖިލީހުގެ ގަރާރާ އެއްގޮތަށް ވޯޓެއް ނެގުމަށް އިލެކްޝަންސް ކޮމިޝަނުން މިހާރު މަސައްކަތް ކުރަމުން އަންނަ ކަމުގައި އެ ކޮމިޝަނުންވެސް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
