އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒުއާއި ގުޅިގެން، ސަރުކާރަށް ތާއީދު ކުރާ ފަރާތްތަކުން ހަދަހަދައިގެން ދޮގު ވީޑިއޯ ތައް ފަތުރަމުންދަނީ "ޑެސްޕަރޭޓް" ނުވަތަ ވެރިކަމަށް ބޭނުންވެފައި ތިބިލެއް ބޮޑު ކަމުން ކަމަށް އެމަނިކުފާނު ވިދާޅުވެއްޖެއެވެ. 

އެމްޑީޕީ އާއި ގުޅިފައިވާ ޕާޓީތަކާއި އަދި ސަރުކާރަށް ތާއީދުކުރާ ގިނަ ފަރާތްތަކުން ހީކުރި ގޮތާއި ޚިލާފަށް ރިޔާސީ އިންތިޚާބުގެ ފުރަތަމަ ބުރުގައި ރައީސް އިބްރާހީމް މުޙައްމަދު ޞާލިޙަށް ލިބިލެއްވީ ވަރަށް ދަށް ނަތީޖާއެކެވެ. އެގޮތުން، އެމަނިކުފާނަށް ލިބުނު ވޯޓުގެ އިންސައްތަ 40 އަށްވެސް ނާރައެވެ.

އެއާއެކު މިހާރު ފެނިގެންދަނީ ރައީސް ޞާލިހަށް ތާއީދުކުރާ ފަރާތްތަކާއި، މީޑިއާ ތަކުން އެމަނިކުފާނަށް ކެންޕެއިން ކުރުން ހުއްޓަވާލައްވައި އިދިކޮޅު ކެންޑިޑޭޓު ޑރ.މުޢިއްޒާމެދު ސާބިތުނުހިފޭ ދޮގު ވާހަކަތައް ފަތުރައި އެންޓި ކެމްޕެއިން ކުރަމުންދާ ތަނެވެ.

އެގޮތުން އޯޑިއޯ އެޑިޓުކޮށްގެންނާއި، ފޭކު ހެޑްލައިންތައް ލިޔެގެން މީސްމީޑިއާގައި ތަފާތު ގިނަ ޕޯސްޓުގައް އަންނަނީ ހިއްސާކުރަމުންނެވެ. 

އެފަދަ ދޮގު އޯޑިއޯއެއްގައި މި ސަރުކާރުން ހިންގި ބިންވެރިޔާ ސްކީމުގެ ދަށުން ހުޅުމާލެއާއި ގުޅިފަޅާއި ގިރާވަރުފަޅުން ގޯތި ދޫކުރި މީހުންގެ ގޯތިތައް ފުށިދިއްގަރުފަޅަށް ބަދަލުކުރަން ނިންމާފައިވާ ކަމަށާއި، އެކަން ވެރިކަން ބަދަލުވުމުން ދެތިން މަސް ފަހުން އިއުލާނުކުރާނެ ކަމަށް ބުނެފައިވެއެވެ. އެ ވީޑިއޯ ހިއްސާ ކޮށްފައިވަނީ މި ސަރުކާރަށާއި ރައީސް ޞާލިހަށް ވަރަށް ބޮޑަށް ތާއީދު ކުރައްވާ އެކްޓިވިސްޓެއް ކަމުގައިވާ މޫސާ އަންވަރު އެވެ. 

އެ އޯޑިއޯއަށް ރައްދުދެއްވައި ޑރ.މުޢިއްޒު ކުރެއްވި ޓުވީޓެއްގައި ވިދާޅުވީ އެ އޯޑިއޯއަކީ މުޅިން ފޭކު އަސްލެއް ނެތް އޯޑިއޯއެއް ކަމަށެވެ. އަދި އެފަދަ އޯޑިއޯތައް ފެތުރުމުން ފެންނަނީ ރެއާއި ދުވާ އެންޓި-ކެމްޕެއިން ކުރުމުގައި ބިޒީވެގެން އުޅޭ މީހުން ގޮސްހުވެ "ޑެސްޕަރޭޓު"ވެފައި ތިބި މިންވަރު ކަމަށެވެ.

އެ އޯޑިއޯ ނޫންވެސް އެތައް ފޭކު އޯޑިއޯ ތަކެއް، ސަރުކާރަށް ތާއީދުކުރާ ފަރާތްތަކުން މިފަހުން ވަނީ މީސް މީޑިއާގައި، ދައުރު ކުރަން ފަށާފައެވެ.