އެއްވެސް މީހެއްގެ ހައްގަކަށް ދުވަހަކުވެސް އަރައިގަނެފައި ނުވާނެ ކަމަށާ، އަދި މީހަކަށް އަނިޔާވެރި ވެފައިވެސް ނުވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.

މުއިއްޒު ދައުލަތުގެ ނުފޫޒު ބޭނުންކުރައްވައިގެން އޭނާގެ ދޮންމަންމަ ރާއްޖެއިން ޑީޕޯޓްކޮށްލި ކަމަށް ބުނެ ކުރާ ތުހުމަތުތައް ދޮގު ކުރައްވައި އެ ވާހަކަތަކަށް ރައްދު ދެއްވަމުން ރޭ ފުވައްމުލަކުގައި ބޭއްވި ކެންޕެއިން ޖަލްސާގައި ވާހަކަ ދައްކަވަމުން މުޢިއްޒު ވިދާޅުވީ، އެމްޑީޕީގެ ސިޔާސަތުތައް ރައްޔިތުން ބަލައިނުގަތީމަ، ޒާތީ ގޮތުން އެމަނިކުފާނާ ދިމާކުރަމުންދާ ކަމަށެވެ. އަދި އެފަދައިން ކަން ކުރި ނަމަވެސް އެއްވެސް ފަރުވާލެއް ނެތް ކަމަށާ، އެފަދަ ކަންކަމުން ފަޟީހަތް ވާނީ އެ ވާހަކަތައް ދައްކާ މީހުން ކަމަށް މުޢިއްޒު ވިދާޅުވިއެެވެ. 

މުޢިއްޒު ވިދާޅުވީ ޒާތީ ގޮތުން ދިމާކުރުމަކީ ކެމްޕެއިން ކުރުމެއް ނޫން ކަމަށެވެ. އަދި އެމަނިކުފާނާއި ގުޅޭ އެފަދަ މައްސަލައެއް އޮތް ނަމަ ރަސްމީ އިދާރާތަކުން، ސިޔާސީ ނުފޫޒުން އެއްކިބާވެ، އިންސާފުވެރިކަމާއި މިނިވަންކަމާއި އެކު އެ ކަމެއް ބައްލަވަންވީ ކަމަށެވެ. އެގޮތަށް ބަލައިފިނަމަ އެކަންކަމުގެ ހަގީގަތް މާރީތިކޮށް ސާފުވާނެ ކަމަށްވެސް އެމަނިކުފާނު ވިދާޅުވިއެވެ. 

މުއިއްޒު އިތުރަށް ވިދާޅުވީ އެމަނިކުފާނު ރައްޔިތުން ގާތަށް ވަޑައިގަންނަވަނީ ސިޔާސަތުތަކެއް ހިފައިގެން ކަމަށާއި ބޭނުން ވަނީ ގައުމަށް ހަމަޖެހުން އަންނަން ކަމަށާއި ގައުމަށް ހަމަޖެހުން އަންނާނީ އަނިޔާވެރިކަން ނިމި، އިންސާފުވެރިކަން ގާއިމުވެގެން ދިޔުން ކަމަށެވެ.