މި ފަހަރުގެ ރިޔާސީ އިންތިހާބު ކާމިޔާބު ވެއްޖެ ނަމަ ދެން އުފެދިގެން އަންނަ ޕީޕީއެމް/ޕީއެންސީގެ ސަރުކާރެއްގައި އަދާލަތު ޕާޓީއަށް އެންމެ އިންސައްތަ އެއްވެސް ދެވެން ނެތް ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ. 

އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއެކު ރިޔާސީ އިންތިހާބުގެ ފުރަތަމަ ބުރުގައި ކޯލިޝަން ހެދި އެމްޑީއޭ އިން ރޭ ބޭއްވި ކައުންސިލް ބައްދަލުވުމުގައި ވަނީ އެމްޑީޕީއާ އެކުގައި އެ ޕާޓީން ހެދި ކޯލިޝަން ރޫޅާލައި، ރިޔާސީ އިންތިހާބުގެ ދެވަނަ ބުރުގައި އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ތާއީދު ކުރަން ފާސްކޮށްފައެވެ. 

އެކަމާއި ގުޅިގެން ޠާރިގު ކުރެއްވި ޓްވީޓެއްގައި ވިދާޅުވީ، އެ ނިންމުން ނިންމެވުމުނާ އެމްޑީއޭގެ ރައީސް އަހުމަދު ސިޔާމް އަށް ވިސްނޭކަން އެނގޭ ކަމަށެވެ. 

"އަދާލަތުޕާޓީގެ ޝެއިޚް އިމްރާން، ޑރ.މުއިއްޒާ ގުޅުއްވަން އުޅުއްވާ ޚަބަރުތައް އަންނަނީ ލިބެމުން. އެއްވެސް ޕަސެންޓެެއް ދެވޭކަށް މިފަހަރު އަދާލަތައްނެތް. އަންނަންޏާ އާދޭ، ކުރާ މަސައްކަތަށް ކޮންމެސް އުޖޫރައެއް ލިބިދާނެ ތޯއްޗެ." ޠާރިގު ވިދާޅުވި އެވެ. 

ޠާރިގުގެ މި ވާހަކަތައް ދޮގު ކުރައްވައި އިމްރާން ކުރެއްވި ޓްވީޓެއްގައި ވަނީ، އެއީ ޠާރިގުއަށް ފެނުނު ހުވަފެނެއްތޯ އައްސަވާފައެވެ. 

އަދި އަދާލަތުން ރައީސް ޞާލިހު އާއި އެކު ނުކުންނަވައި ހުންނެވީ މިގައުމާ ރައްޔިތުންގެ ހައްގުގައި ކަމަށްވެސް އޭނާ ވިދާޅުވި އެވެ.