އެމަނިކުފާނުގެ ވެރިކަމެއްގައި އައްޑޫ ސިޓީއާއި މާލޭގެ އިތުރުން އުތުރުގެ ރަށެއްގައި ނުކުޅެދުންތެރިކަން ހުންނަ ފަރާތްތަކަށް ޚާއްސަކޮށް ފަރުވާދޭ އިންޓަނޭޝަނަލް ހޮސްޕިޓަލް ގާއިމް ކޮށްދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

މި މަހު 30 ގައި ބާއްވާ ރިޔާސީ އިންތިހާބުގެ ކެމްޕެއިނަށް އައްޑޫއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ފޭދޫގައި ބޭއްވި ޖަލްސާގައި ވާހަކަދައްކަވަމުން މުއިއްޒު ވަނީ އެސިޓީގެ ރައްޔިތުން ސިޓީއަށްޓަކައި ބޭނުންވާ ކަންކަން ކޮށްދެއްވައި ނަތީޖާ ނެރެދެއްވާނެ ކަމުގެ ޔަގީންކަން ދެއްވާފައެވެ. 

އެގޮތުން އުމްރާނީ ގޮތުންނާއި، އިޖްތިމާއީ ގޮތުން އަދި އިގްތިސާދީ ކުރިއެރުން ގެނައުމަށް ކުރިއަށްގެންދަންޖެހޭ ކަންކަން ކުރައްވާނެ ކަމަށް މުޢިއްޒު ވިދާޅުވިއެވެ. 

Advertisement

އޭގެ ތެރެއިން މުޢިއްޒު ފާހަގަކުރެއްވި ކަންކަމުގެ ތެރޭގައި، އެއާޕޯޓު އިތުރަށް ތަރައްގީކުރުމާއި، ޓޫރިސްޓް ޑެސްޓިނޭޝަންތައް އިތުރުކޮށް އެކި ދިމަދިމާއި ފަތުރުވެރިން ގެނައުމަށް މަގުފަހިކޮށްދީ ސީޕްލޭން ހަބް ގާއިމުކުރައްވައި އެ ސިޓީގައި ފަތުރުވެރިކަން ކުރިއެރުވުން ހިމެނެއެވެ. އަދި އިގްތިސޯދީ ގޮތުން ފުދުންތެރި ބަޔަކަށް އެސިޓީގެ ރައްޔިތުން ހަދައިދެއްވާނެ ކަމަށް މުޢިއްޒު ވިދާޅުވިއެެވެ. 

މީގެ އިތުރުން މަސްވެރިކަމާއި ދަނޑުވެރިކަމުގެ ދާއިރާ ވެސް ކުރިއެރުވުމަށް މެނިފެސްޓޯ ގައިވާ ކަންކަން ކޮށްދެއްވާނެ ކަމުގެ ޔަގީންކަން އެމަނިކުފާނު ވަނީ އަރުއްވާފައެވެ. 

މުޢިއްޒު ވިދާޅުވީ ސިއްހީ އަދި އިޖުތިމާއީ ދާއިރާއަށް ބެލިނަމަވެސް، ޚާއްސަ އެހީއަށް ބޭނުންވާ ފަރާތްތަކަށް އެހީވުމަކީ މުހިންމު ކަމެއް ކަމަށާ، އެ މަނިކުފާނުގެ ސަރުކާރެއްގައި އެ ފަރާތްތަކަށް އެހީވުމަށް ސަރުކާރުގެ ތެރެއިން ގިނަ މަސައްކަތް ތަކެއް ކުރައްވާނެ ކަމަށެވެ. 

އެގޮތުން މާލޭގެ އިތުރުން އައްޑޫ ސިޓީ އަދި އުތުރުގެ ރަށެއްގައި ހާއްސަ އެހީއަށް ބޭނުންވާ މީހުންނަށް ކެއާ ކުރާ އިންޓަނޭޝަން ފެންވަރުގެ ހޮސްޕިޓަލެއް އެމަނިކުފާނުގެ ވެރިކަމެއްގައި ގާއިމް ކުރައްވާނެ ކަމަށް މުޢިއްޒު ވިދާޅުވިއެެވެ. 

އެތަނުން ހާއްސަ އެހީއަށް ބޭނުންވާ ފަރާތްތަކަށް ތެރަޕީއާއި ޓްރީޓްމަންޓްތައް ދީ ރަނގަޅު ނަތީޖާ ނެރެވޭނެ ކަމަށް ވިދާޅުވި އެވެ.

"މި ސިޓީއާއި އެންމެ އުތުރުގެ ރަށެއްގައި އަދި މާލެ ސިޓީގައި މިފަދަ އެއް ފެންވަރެއްގެ، އިންޓަނޭޝަނަލް ހޮސްޕިޓަލް ގާއިމުކުރާނަން. އެހެންވީމަ މިގޮތަށް ކުރިއަށް ގެންދަން ރާވާފައި އޮތީ. އޭރުން އަޅުގަނޑުމެންނަށް އެފަދަ ފަރާތްތަކަށް ދެވޭ ތެރަޕީއާއި ޓްރީޓްމަންޓާއި ފަރުވާއާއި މިހުރިހާ ކަންކަމުން ތަފާތު ނަތީޖާއެއް، ރަނގަޅު ނަތީޖާއެއް ނެރެވޭނެ،" މުއިއްޒު ވިދާޅުވި އެވެ.