ރައްޔިތުންގެ މަޖިލީހުގެ ކެޔޮދޫ ދާއިރާގެ ކުރީގެ މެމްބަރު، އަދި ޖުމްހޫރީ ޕާޓީގެ ކައުންސިލް މެންބަރު އައްޝައިޚް މޫސާ ނިޒާރު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒަށް ތާއިދު ކުރައްވައިފިއެވެ. 

ޑރ. މުޢިއްޒަށް ތާއީދު ކުރައްވާކަން ހާމަކުރައްވައި އެކަމާއި ގުޅޭ ގޮތުން "ވޮއިސް" އަށް ދެއްވި ބަސްދީގަތުމެއްގައި ނިޒާރު ވިދާޅުވީ ރާއްޖޭގެ މިނިވަންކަމާއި ސިޔާދަތުގެ ވާހަކަ އަކީ ޖުމްހޫރީ ޕާޓީގެ ލީޑަރ ގާސިމް އިބްރާހިމް ވެސް ކެންޕެއިންގެ ތެރެއިން އެންމެ ބޮޑަށް ދެއްކެވި ވާހަކަ ކަމަށެވެ. އަދި މިހާރު މިނިވަންކަމާއި ސިޔާދަތަށް އޮތް ނުރައްކަލުގެ މައްސަލަ ހައްލު ކުރަންޖެހޭ ކަންވެސް އޭނާ ފާހަގަކުރެއްވިއެވެ. 

މީގެ އިތުރުން ރާއްޖޭގެ ދަރަނީގެ ވާހަކަ އާއި އިގްތިސާދު އޮތް ނާޒުކު ހާލަތުން އަރައިގަނެ އެ މައްސަލަ ހައްލު ކުރަންވެސް ޖެހޭ ކަމަށާ، އަދި އިޖްތިމާއީ މައްސަލަތައްވެސް ހައްލު ކުރަންޖެހޭއިރު އެކަމަށް ޑރ. މުޢިއްޒު ނޫން އިތުރު ޗޮއިސްއެއް މިވަގުތު ނެތް ކަމަށް އޭނާ ވިދާޅުވި އެވެ. 

ނިޒާރު އިތުރަށް ވިދާޅުވީ މުޅި ރާއްޖޭގެ ގިނަ ބޭފުޅުންގެ ވެސް ވިސްނުމަކީ ރާއްޖޭގެ މައްސަލަތައް ހައްލު ކުރެވޭނީ މުއިއްޒު އަށް ކަމަށެވެ. 

ހަމައެހެންމެ މުޢިއްޒު އަކީ ވަތަނީ ބޭފުޅެއް ކަމަށާ، ރާއްޖޭގައި މިފަހުން ކުރެވުނު އެންމެ ބޮޑެތި މަސައްކަތްތައް ކުރެއްވިފައިވާނީ ޑރ މުޢިއްޒަށް ކަމަށާ، އެމަނިކުފާނަކީ ހިކުމަތްތެރި، ވިސްނުންތެރި އަދި ގާބިލް ބޭފުޅެއް ކަމަށްވެސް ނިޒާރު ފާހަގަކުރެއްވިއެވެ. 

މުޢިއްޒުގެ އެ ސިފަ ތަކުގެ އިތުރުން އެމަނިކުފާނަކީ ދީނީ ގޮތުން ބެލި ނަމަވެސް، ވަރަށް ރަނގަޅު ބޭފުޅެއް ކަމަށާ، ރާއްޖެ އަކީ މުސްލިމު ގައުމެއް ކަމަށް ވުމުން ވެރި އަކަށް އައްޔަނު ކުރައްވާ ބޭފުޅެއްގެ އެ ސިފަ ހުރުމަކީ މުހިންމު ކަމެއް ކަމަށް އޭނާ ވިދާޅުވި އެވެ.