އެމަނިކުފާނުގެ ވެރިކަމެއްގައި އަނިޔާވެރިކަމެއް ނުވަތަ ބަދަލު ހިފުމެއްވެސް ނޯންނާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރިޔާސީ އިންތިހާބުގެ ދެވަނަ ބުރުގައި ޑރ. މުޢިއްޒުއާއި ދެކޮޅަށް ވާދަކުރައްވާ އެމްޑީޕީގެ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި އެމަނިކުފާނުގެ ކެންޕެއިން ޓީމުން އެންމެ ބޮޑަށް ދައްކަވާ ވާހަކަ އަކީ މުޢިއްޒު ވެރިކަމަށް ވަޑައިގެންފި ނަމަ އަނިޔާވެރިވެ، މީހުން ނުހައްގުން ޖަލަށް ލާނެ ކަމުގެ ވާހަކަ އެވެ. އެވާހަކަ ތަކަށް އެކި ފަހަރު މަތިން އެމާނިކުފާނު ރައްދު ދެއްވާފައިވާ އިރު އިއްޔެގެ  ކެންޕެއިންގެ ތެރެއިންވެސް ވަނީ އެފަދައިން ކަން ނުކުރައްވާނެ ކަމުގެ ޔަގީންކަން ދެއްވާފައެވެ. 

އެގޮތުން މުއިއްޒު ވިދާޅުވީ، އެމަނިކުފާނުގެ ވެރިކަމެއްގައި އަނިޔާވެރިކަމަށް އެއްވެސް ވަރަކަށް ޖާގަ ނުދެއްވާނެ ކަމަށެވެ. އަދި ވެރިކަމަށް ވަޑައިގަންނަވަނީ އަދުލުވެރި، އިންސާފުވެރި ސަރުކާރެއް ގާއިމް ކުރައްވަން ކަމަށްވެސް ވިދާޅުވި އެވެ. އެހެންކަމުން އަދުލުވެރިކަމާ އެކު މެނުވީ އެއްވެސް މީހަކާ މެދު އަމަލު ނުކުރައްވާނެ ކަމަށް ވިދާޅުވި އެވެ.

"އަޅުގަނޑު މި އުޅެނީ ވެރިކަމަށް ކުރިމަތިލައިގެން. އަޅުގަނޑު މި ދަންނަވަނީ އަޅުގަނޑު ކަން ކުރާނެ ގޮތް. އަޅުގަނޑުގެ ވެރިކަމެއްގަ އަނިޔާވެރިކަމެއް ނޯންނާނެ. ބަދަލު ހިފުމެއް ނޯންނާނެ،" މުއިއްޒު ވިދާޅުވި އެވެ.

މިއާއެކު މުއިއްޒު ވަނީ އެއްވެސް ހާއްލެއްގައި އެމަނިކުފާނުގެ ސަރުކާރުގެ ތެރެއިން އަނިޔާވެރިކަން ނުފެންނާނެ ކަމަށާއި ބަދަލު ނުހިފާނެ ކަމުގެ ޔަގީންކަން ދެއްވާފަ އެވެ. އަދި އެމަނިކުފާނުގެ ސަރުކާރު ވާނީ ރައްޔިތުންނަށް ހަމަޖެހޭ ދިރިއުޅުމެއް ހޯދައިދިނުމަށް ކުރަންޖެހޭ ހުރިހާ މަސައްކަތެއް ކުރާނެ ސަރުކާރެއް ކަމަށްވެސް މުޢިއްޒު ވިދާޅުވިއެެވެ.