ޕީޕީއެމް/ ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުޢިއްޒުގެ ވެރިކަމެއްގައި އީ- ސްޕޯރޓްސްގެ އިންޓަރނޭޝަނަލް ފެންވަރުގެ ތިން ސްޕޯރޓްސް އެރީނާ މާލެއާއި ރާއްޖޭގައި އުތުރާއި ދެކުނުގައި ގާއިމް ކުރައްވާނެ ކަމަށް އެމަނިކުފާނު ވިދާޅުވެއްޖެއެވެ. 

އީ-ސްޕޯޓްސް ކޮމިއުނިޓީގެ ޒުވާނުންނާއި އަދި މިއަހަރު އަލަށް ވޯޓުލުމުގެ ޙައްޤު ލިބޭ ޒުވާނުންނާއިއެކު ރޭ ބޭއްވުނު "މުޢިއްޒު 4 އީ-ސްޕޯރޓްސް" އިވެންޓްގައި ވާހަކަ ދައްކަވަމުން މުޢިއްޒު ވިދާޅުވީ އެމަނިކުފާނުގެ ވެރިކަމެއްގައި އިންޓަނޭޝަނަލް އީސްޕޯޓްސް އެރީނާއެއް މާލޭގެ އިތުރުން، ރާއްޖޭގެ އުތުރާއި، ދެކުނުގެ ދެ ރަށެއްގައި ގާއިމުކޮށްދެއްވާނެ ކަމަށެވެ. 

އަދި އޭގެ އިތުރުން އެހެނިހެން ކުޅިވަރުތައް ވެސް ކުރިއަރުވައި ޒުވާނުން ބާރުވެރިކޮށް، އިގްތިޞާދީ ގޮތުން އަމިއްލަ ހުނަރުތައް ބޭނުންކޮށް ވިޔަފާރިކޮށްގެން ހިތްހަމަޖެހޭ ފަދަ އާމްދަނީއެއް ހޯދޭނެ ގޮތް ފަހިކޮށްދެއްވާނެ ކަމަށްވެސް އެމަނިކުފާނު ވިދާޅުވި އެވެ. 

މިއާއެކު މުޢިއްޒު ވިދާޅުވީ، ކުދިކުދި ތަންތަންކޮޅުގައި ވަރަށް ހާލުގައި އުޅޭ ޒުވާން ކުދިން އުޅޭ ކަމަށާ، އެހެންކަމުން ކައިވެނި ނުކޮށް ތިބޭ ޒުވާނުންނަށް އަގުހެޔޮކޮށް ގޯތި ގެދޮރު ލިބޭނެ ގޮތް އެމަނިކުފާނުގެ ވެރިކަމެއްގައި ފަހިކޮށްދެއްވާނެ ކަމަށް މުޢިއްޒު ވިދާޅުވިއެެވެ. 

"ފުދުންތެރި ދިރިއުޅުމެއް ލިބުން. ގޯތިގެދޮރު. ތަޢުލީމު. ރަނގަޅު މާޙައުލެއް. މިކަހަލަ ކިތަންމެ ކަމެއް ޒުވާނުންނަށް ބޭނުންވޭ. ވެރިކަމަށް އަންނަ ބަޔެއްގެ ފަރާތުން ޒުވާނުން އުންމީދުކުރާ ވަރަށް ގިނަ ކަންތައްތަކެއް ހުންނާނެ. އަޅުގަނޑަށް އެނގޭ މާލޭގައި ވަރަށް ކުދިކުދި ޖާގައިގާ ވަރަށް ދަތީގައި އުޅޭ ޒުވާނުންވެސް އެބަ ތިބިކަން. އެފަދަ ހުރިހާ ޒުވާނުންނަށްވެސް ހިޔާވަހިކަން ހޯދައިދިނުން، ދިރިއުޅުމުގެ އުންމީދުތައް ފުރިހަމަކޮށްދިނުން، މިއީ ކޮށްދޭން ޖެހޭ ކަންކަން.". މުއިއްޒު ވިދާޅުވިއެވެ.

މީގެ އިތުރުން ވެސް އެކުއްޖެއްގެ ހުނަރު ބޭނުންކޮށްގެން އިންޓަރނޭޝަނަލް މާރކެޓްގައި ސެލަރ އެކައުންޓް ހުޅުވައި ޕޭމަންޓް ސިސްޓަމް ގާއިމްކޮށްދީ އާމްދަނީ ހޯދޭނެ ގޮތް ހަމަޖައްސައިދެއްވާނެ ކަމަށް މުޢިއްޒު ވަނީ ވިދާޅުވެފަ އެވެ.