އުމުރުން 18 އަހަރު ފުރުމުން ކައިވެނި ނުކޮށް ތިބިނަމަވެސް ޒުވާނުންނަށްވެސް ގޯތިގެދޮރު ދެއްވާނެ ކަމުގެ ޔަގީންކަން ޕީޕީއެމް-ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުއިއްޒު ދެއްވައިފިއެވެ.
މުއިއްޒު ފޯ އީ-ސްޕޯރޓްސް ގެ ނަމުގައި ގިނަ ޢަދަދެއްގެ ޒުވާނުން ޗަމްޕާ ސެންޓްރަލް ހޮޓެލްގައި އިއްޔެ މެންދުރުން ފެށިގެން ރޭ 11 އާއި ހަމައަށް އެމަނިކުފާނަށް ތާއީދުކުރާ ޒުވާނުން ވަނީ ކާމިޔާބު އިވެންޓެއް ބާއްވާފައެވެ.
މި އިވެންޓް ހިނގަމުން ދިޔަ މާލަމަށް ޑރ. މުޙައްމަދު މުޢިއްޒާއި އެމަނިކުފާނުގެ ރަނިންމޭޓް ޙުސައިން މުޙައްމަދު ލަޠީފްވެސް ވަނީ ޒިޔާރަތްކުރައްވައިފައެވެ. އެ ދެ ބޭފުޅުންވެސް ވަނީ ޒުވާނުންނާއިއެކު ވަގުތު ހޭދަކުރައްވާ ކުޅިވަރުތަކުގައި ބައިވެރިވެ ވަޑައިގަންނަވާފައެވެ.
މި އިވެންޓުގައި ވާހަކަ ފުޅު ދައްކަވަމުން ޑރ.މުޢިއްޒު ވިދާޅުވީ އިންޓަނޭޝަނަލް އީސްޕޯޓްސް އެރީނާއެއް މާލޭގެ އިތުރުން، ރާއްޖޭގެ އުތުރާއި، ދެކުނުގެ ދެ ރަށެއްގައި ގާއިމުކޮށްދެއްވާނެ ކަމަށެވެ.
މީގެ އިތުރުން ޒުވާނުން މާލޭގައި އުޅޭ ދަތި ހާލު އެނގިވަޑައިގަންނަވާ ކަމަށެވެ. އެހެން ކަމުން، 18 އަހަރު ފުރުމާ އެކު، އަމިއްލަ ހައުސިން އެއް ލިބޭނެ ގޮތް ހައްދަވައިދެއްވާނެ ކަމަށް މުއިއްޒު ވިދާޅުވިއެވެ.
"ފުދުންތެރި ދިރިއުޅުމެއް ލިބުން. ގޯތިގެދޮރު. ތަޢުލީމު. ރަނގަޅު މާޙައުލެއް. މިކަހަލަ ކިތަންމެ ކަމެއް ޒުވާނުންނަށް ބޭނުންވޭ. ވެރިކަމަށް އަންނަ ބަޔެއްގެ ފަރާތުން ޒުވާނުން އުންމީދުކުރާ ވަރަށް ގިނަ ކަންތައްތަކެއް ހުންނާނެ. އަޅުގަނޑަށް އެނގޭ މާލޭގައި ވަރަށް ކުދިކުދި ޖާގައިގާ ވަރަށް ދަތީގައި އުޅޭ ޒުވާނުންވެސް އެބަ ތިބިކަން. އެފަދަ ހުރިހާ ޒުވާނުންނަށްވެސް ހިޔާވަހިކަން ހޯދައިދިނުން، ދިރިއުޅުމުގެ އުންމީދުތައް ފުރިހަމަކޮށްދިނުން، މިއީ ކޮށްދޭން ޖެހޭ ކަންކަން."
"އަޅުގަނޑު ބޭނުން އެފޯޑަބަލް ހައުސިންއެއް ޒުވާނުންނަށް ފޯރުކޮށްދީގެން ލައިފް އެއް ބިލްޑު ކުރަން ފުރުސަތު ދޭން" އެމަނިކުފާނު ވިދާޅުވިއެވެ.
400 އަށް ވުރެ ގިނަ ޒުވާނުން ބައިވެރިވި މި އިވެންޓުގައި އީ-ސްޕޯޓްސް މުބާރާތުގެ އިތުރުން، މިއަހަރުގެ ރިޔާސީ އިންތިޚާބުގައި އަލަށް ވޯޓުލާ ގިނަ ޒުވާނުންތަކެއްވެސް ވަނީ ބައިވެރިވެފައެވެ. އަދި އަލަށް ވޯޓުލާ ކުދީންނަށް ޚާއްޞަކޮށްގެންވެސް ތަފާތު ގޭމްތަކެއް ކުރިއަށް ދިޔައެވެ.
މި އިވެންޓުގައި ބޭއްވި މުބާރާތްތަކުން ވަނަ ހޯދި ފަރާތްތަކަށް ވަނީ އިނާމު ދީފައެވެ. ފީފާ-23 އީގޭމް މުބާރާތުން އެއްވަނަ ހާސިލްކޮށްފައިވަނީ ހާއިސް ޙުސައިން ޙީލްމީއެވެ. ހާއިސް މި މަޤާމު ހޯދީ 31 ކުޅުންތެރިންނާއި ވާދަކޮށްގެންނެވެ. މި މުބާރާތުން އެއްވަނައަށް ދާ ކުޅުންތެރިއަކަށްވަނީ 15،000 ރުފިޔާގެ އިނާމެއް ހުށަހަޅާފައެވެ.
Advertisement
This content is created and paid for by advertisers and does not involve Voice Journalists
