ވެރިކަމަކަށް އިންތިޚާބު ކޮށްދެއްވައިފި ނަމަ، ރައްޔިތުންގެ އުއްމީދުތައް ޙާސިލްވާ ޢަދުލުވެރި، އިންސާފުވެރި، ދެފުށްފެންނަ، ނަތީޖާ ނެރެދޭ، ހިންގުންތެރި ވެރިކަމެއް ކޮށްދެއްވާނެ ކަމުގެ ޔަގީންކަން ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ދެއްވައިފި އެވެ. 

ރިޔާސީ އިންތިހާބުގެ ދެވަނަ ބުރުގެ ކެންޕެއިން ނިންމާލައި، މަދަމާ ވޯޓުލާން ހަމަޖެހިފައިވާއިރު، އެކަމާއި ގުޅުވައި މުޢިއްޒު ވިދާޅުވީ އެމަނިކުފާނު ރައްޔިތުން ގާތަށް ވަޑައިގަންނަވަނި އިޚްލާޞްތެރި ނިޔަތެއްގައި ގައުމުގެ މިނިވަންކަން ޔަގީންކޮށްދެއްވުމަަށްޓަކައި ކަމަށެވެ. އަދި އަނިޔާވެރިކަން ގައުމުން އެއްކޮށް ފޮހެލައްވާނެ ކަމަށާ، ކޮންމެ ރައްޔިތަކީވެސް ފުދުންތެރި ރައްޔިތަކަށް ހަދައި ދެއްވާނެ ކަމަށް ވިދާޅުވި އެވެ. 

މީގެ އިތުރުން މުޢިއްޒު ކުރެއްވި ޓުވީޓެއްގައި އެމަނިކުފާނު ވަނީ، ވެރިކަން ހަވާލު ކުރައްވައިފި ނަމަ، ހުރިހާ ގޮތަކުން މިނިވަންކަން ޔަޤީންވެފައިވާ، އިޤްތިޞާދު ހަރުދަނާ ކުރެވިފައިވާ، ގެދޮރުވެރިކަން ޔަޤީންކޮށްދެވިފައިވާ، ފުދުންތެރި، ޢަބުރުވެރި، އެކަކު އަނެކަކަށް އަޅާލާ އޯގާތެރި ޤައުމެއް އަދި މުޖުތަމަޢުއެއް ޤާއިމުކޮށްދެއްވާނެ ކަމުގެ ޔަގީންކަން ދެއްވާފައެވެ. 

"އިންޝާ الله އަޅުގަނޑު ދޭ ޔަޤީން ކަމަކީ ރައްޔިތުންގެ އުއްމީދުތައް ޙާސިލްވާ ޢަދުލުވެރި، އިންސާފުވެރި، ދެފުށްފެންނަ، ނަތީޖާ ނެރެދޭ، ހިންގުންތެރި ވެރިކަމެއް ކޮށްދީ، ހުރިހާ ގޮތަކުން މިނިވަންކަން ޔަޤީންވެފައިވާ، އިޤްތިޞާދު ހަރުދަނާ ކުރެވިފައިވާ، ގެދޮރުވެރިކަން ޔަޤީންކޮށްދެވިފައިވާ، ފުދުންތެރި، ޢަބުރުވެރި، އެކަކު އަނެކަކަށް އަޅާލާ އޯގާތެރި ޤައުމެއް، މުޖުތަމަޢުއެއް ޤާއިމުކޮށްދޭނެކަން. އަޅުގަނޑުގެ ކެނޑިޑޭޓު ނަންބަރަކީ 4. ޝުކުރިއްޔާ!" ޑރ. މުޢިއްޒު ވިދާޅުވިއެެވެ. 

ރިޔާސީ އިންތިހާބުގެ ފުރަތަމަ ބުރުގައި 15,000 އަށްވުރެ ގިނަ ވޯޓުގެ ބޮޑު ފަރަގަކުން، އެ އިންތިހާބު ކާމިޔާބު ކުރައްވާފައިވަނީ ޑރ. މުޢިއްޒު އެވެ. އެގޮތުން ބުރުގައި ޑރ. މުޢިއްޒަށް ލިބިލެއްވީ %46.06 އެވެ. އަދި ރައީސް ޞާލިހަށް ލިބިލެއްވީ %39.05 އެވެ.